Մեկնարկում է Սուրբ Աստւածածնի Վերափոխման շաբաթապահքը
«ԱԼԻՔ» – Տաղաւար տօներին նախորդում են շաբաթապահքեր: Տաղաւար տօն է նաեւ Սուրբ Աստւածածնի Վերափոխումը, որն այս տարի նշւելու է օգոստոսի 18-ին:
Այսօրւանից սկսւում է շաբաթապահքը, որը տեւելու է մինչեւ ուրբաթ: Բոլոր ցանկացողները, կիրակնօրեայ Սուրբ Պատարագին մասնակցելով եւ Սուրբ Հաղորդութիւն ստանալով, դուրս են գալիս պահքից:
Սակայն ի՞նչ է առհասարակ պահքը, ի՞նչ խորհուրդ ունի:
Պահք ասելով առաջին հերթին պատկերացնում ենք սննդի ու հոգեւոր պահեցողութեան ընդհանուր դրոյթները։ Իսկ գործնականում այն ենթադրում է հսկել, պահպանել։ Պահքն այն ժամանակն է, երբ մեր միտքը հսկում է հոգուն՝ այնտեղ պահւած գանձը պահպանելու համար։
Մարդը յանուն շահի, սեփականութեան, դրամի պատրաստ է ցանկացած քայլի։ Եւ որքան ագրեսիւ է արտաքնապէս, ակտիւ՝ նիւթական արժէքները պահպանելու առումով, այնքան պասիւ է հոգեւոր արժէքների պահպանման հարցում։
Եւ ահա պահքը հնարաւորութիւն է` փոխելու իրավիճակը եւ նախանձախնդիր լինելու հոգեւոր արժէքների պահպանմանը։
Ժամանակի մէջ իր հետքը թողնելու համար մարդը ստեղծել է օրացոյց, որի ամէն օրն իր «անունն» ու խորհուրդն ունի։ Եկեղեցին էլ ունի իր օրացոյցը, որը մարդուն յիշեցնում է, որ ինքը ոչ միայն աշխատուժ է, այլ նաեւ Աստծոյ զաւակ, ոչ միայն հասարակութեան անդամ է, այլեւ երկնքի քաղաքացի։ Իսկ եկեղեցական օրացոյցի մէջ առանձնայատուկ են պահոց օրերը։
Պահքը տալիս է հնարաւորութիւն եւ ժամանակ՝ վերագտնելու հոգու ազատութիւնը։ Այդ ազատութիւնը պայմանաւորւած է ոչ միայն մեղքից, մոլութիւններից, կախւածութիւններից ու պարապ զբաղմունքներից հրաժարւելով, այլ նաեւ յարատեւ աղօթքով, բարի ընթացքով ու պատւիրանապահութեամբ:
Պահքին մշտապէս յաջորդում է տօնն ու հոգեւոր ուրախութիւնը: Շաբաթապահքի այս շրջանում խնդրենք Սուրբ Աստածամօր բարեխօսութիւնը ողջ սրտով, զղջանք եւ ապաշխարենք: Յիշենք՝ չապաշխարելով՝ մարդը քարանում է մեղքի մէջ. ուստի՝ օգտագործենք մեզ տրւած այս թանկ ժամանակը՝ մաքրագործւելու, ապաշխարելու։ Այսպիսով` մաքրւած հոգիներով եւ մարմիններով տօնենք Տիրամօր վերափոխման տօնը` մասնակցելով այդ օրը բոլոր եկեղեցիներում մատուցւող Սուրբ Պատարագին: Նշենք, որ յաւարտ Վերափոխման տօնի Սուրբ Պատարագի` բոլոր եկեղեցիներում կը կատարւի Խաղողօրհնութեան կարգ:
