Հայոց Ցեղասպանութեան 110-րդ տարեդարձի առիթով Ատրպատականի հայոց թեմի ոգեկոչական կենտրոնական ձեռնարկը՝ Թաւրիզում
Ատրպատական, ազգային առաջնորդարան, Թաւրիզ – Ապրիլ 24-ի նախօրէին, 23 ապրիլ 2025-ի երեկոյեան ժամը 7:30-ին, Թաւրիզում կայացաւ Հայոց Ցեղասպանութեան 110-րդ տարեդարձի կենտրոնական ձեռնարկը, հովանաւորութեամբ եւ նախագահութեամբ Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի:
Թեմում կեանքի կոչւած 110-րդ տարեդարձի յանձնախմբի եւ Ազգային իշխանութեան միջոցով, սքանչելի ծրագիր էր կազմակերպւել թաւրիզահայ բեմում, իսկ օրւայ գլխաւոր բանախօս էր ընտրւել Պատգամաւորական ժողովի ատենապետուհի՝ Արմինէ Վահրամեանը:
Ազգային առաջնորդարանի «Համազասպ Ոսկանեան» սրահում կայացած երկու ժամւայ հանդիսութեան բացման խօսքը կատարեց Սաթուշ Բաբայեանը: Նա վեր առաւ հայ նահատակների նւիրական այն սկզբունքները, որոնց միջոցով ցարդ գոյութիւն ունի մեր ազգը, իր հայրենիքով. «Մեր ազգի անմեղ զաւակները զոհելով, թուրքերը ուզեցին սպանել նաեւ նրանց հաւատը, յոյսը, մշակոյթը, լեզուն, ընտանիքը. բայց չկարողացան վերցնել, նրանցից մեզ հաղորդւած ոգին, մեր գոյութեան իրաւունքը, մերր սէրն ու կապւածութիւնը հայրենիքին: Ապրիլի 24-ը պարզապէս օր չէ. դա մեր ժողովրդի խաչն է. խաչ՝ որ կրում են հպարտութեամբ, որովհետեւ չընկանք, չկորչեցինք, չմոռացանք. մենք ապրեցինք, մենք կանգնած ենք», վճռապէս շեշտեց նա:
Հանդիսութեան ընթացքում, հերթաբար ելոյթ ունեցան Թաւրիզի հայոց դպրոցի աշակերտներ՝ Յասմիկ Մուրադեանը եւ Տաթեւ Աբրահամեանը, որոնք յատուկ խօսքերով ամփոփեցին հայոց Ցեղասպանութեան նկատմամբ հայ երիտասարդութեան մօտեցումը: Ապա Շաղիկ Գէորգեանը Յովհաննէս Թումանեանի «Հայրենիքիս» բանաստեղծութիւնը ասմունքեց,եւ Արսինէ Բաբայեանը երկար եւ անգիր արած լինելով իրանահայ բանաստեղծ Վարանդի «Արեան մղձաւանջ»-ը, հիացրեց ներկայ բազմութեանը:
Օրւայ բանախօս Արմինէ Վահրամեանը, Հայոց Ցեղասպանութեան 110-րդ տարւայ յիշատակի ոգեկոչման առիթով, իր նիւթը սկսեց ներկայ ժամանակների դժբախտ իրավիճակներից՝ շրջափակման, հողային կորստեան, եւ գերիների դրութեան ակնարկելով, որը 110 տարիներ առաջւայ պատմութեան սեւ էջերի կրկնութիւնն էր. «Նպատակ չունեմ պատմական որեւէ դրւագ յիշելու, որովհետեւ բոլորդ լաւատեղեալ էք, որ ինչ պատահեց հայ ժողովդի հետ: Տարիներ լսում էք կատարւած մասին, տարիներ ապրում էք հայ ժողովրդի կեանքն ու պատմութիւնը. սակայն ես լինելով շատ պարզ եւ համեստ, հարկ եմ համարում մի քանի մտածումներ եւ խորհրդակցութիւն ձեզ հետ փոխանակելու: Միասին մտածենք, միասին խորհենք, թէ դէպի ո՞ւր ենք քայլում», ասաց Արմինէ Վահրամեանը, շեշտակի ընդգծումներով անդրադառնալով հայ ժողովրդի ապրած ներկայ դէպքերին, Հայաստանում եւ Սփիւռքում: Ապա, նա գծեց այն ուղղութիւնները, որոնք հաւաքական ոյժի եւ հայրենիքի փայլուն ապագային են առաջնորդելու մեր ժողովրդի զաւակներին:
Գեղարւեստական բաժնի գլխաւոր ծրագիրը իրականացւեց Կոմիտաս վարդապետի կենդանի պատկերով, որը կատարեց Թադէ Նազարբէգեանը, վարդապետական տարազով, երբ միաժամանակ դաշնամուրի նւագով ելոյթ ունեցաւ, մինչ իրեն ընկերակցեցին ջարդի տեսարանով բեմը լցրած դերակատարները՝ Շարա Բաղդասարեանը, Մեղմիկ Ոսկանեանը, Արէն Ասատուրեանը, Անդրէ Վարդանեանը եւ Վանէ Բահադորեանը: Նոյն բաժնի վերջին մասում, Ռեբեկա Սարգսեանը հրաշալի ձայնով ներկայացրեց «Կռունկ»-ը, իսկ դաշնամուրով նրան ընկերակցեց Կարէն Սարգսեանը. մարտական երգով հանդիսականներին հմայեց Միրօ Աբրահամեանը, դարձեալ ընկերակցութեամբ Կարէն Սարգսեանի: Ամբողջ երեկոյի տեւողութեան, բեմի յատուկ լուսաւորութիւնը դասաւորեց եւ Կոմիտաս վարդապետի պատմական լուսանկարները ցուցադրեց Սեւադա Սաֆարեանը: Կենդանի պատկերի ամբողջ տեւողութեան, պատմական դրւագների ընթերցումը կատարւեց Փաթրիշիա Դանղեանի միջոցով: Սոյն ներկայացման ընդհանուր ծրագրաւորումը կատարւել էր Անահիտ Յակոբեանի միջոցով, օժանդակութեամբ Վարդան Ենովքեանի: Յայտնենք, որ գեղարւեստական ծրագրի վերջին բաժնում «Տաթեւ» պարախմբի շնորհալի տղաները ելոյթ ունեցան, ազգային անվերջանալի պայքարի խորհուրդը ներկայացնելով, գեղարւեստական ղեկավարութեամբ բեմադրիչ Կարինէ Մանուչերեանի:
Եզրափակիչ եւ օրհնութեան պատգամը փոխանցելով, առաջնորդ Սրբազանը լայնօրէն անդրադարձաւ մեր ժողովրդի ներկայ կացութեան եւ միասնականութիւնը համարեց վերականգնումի առաջին քայլը. «Թշնամին միշտ մօտկից է հետեւում մեր ազգի բոլոր քայլերին, արտայայտութիւններին եւ ներքին խռովութիւններին, որոնք առանց զէնքի վնասում են մեր ազգ գոյատեւմանը եւ յառաջադիմութեանը», ասաց նա: Առաջնորդ Սրբազանը սոյն առիթով բարձր գնահատեց բոլոր մասնակիցներին, յատկապէս շեշտելով եւ ասելով. «Փոքրաթիւ համայնք լինելը յուսահատական չէ, երբ մեր երիտասարդ սերունդը այսքան կարճ ժամանակում կարողացաւ պատրաստել սոյն գեղարւեստական ծրագիրը եւ մատուցել մեզ, այսքան ինքնավստահութեամբ եւ կատարելութեամբ: Մեծ հիացմունքով հետեւեցինք սոյն ծրագրին, եւ նոր յոյսերով լցւեց մեր հոգին», յաւելեց Սրբազանը, եւ թեմի համար վառ ապագայի յոյսերով օրհնեց բոլորին:
