Ատրպատականի պատմական վանքերի յանձնախմբի նիւթա-բարոյական զեկոյց-հանդիպում՝ Թեմական խորհրդի հետ

Ատրպատական, ազգային առաջնորդարան, Թաւրիզ – Հոկտեմբեր 17-ին, Ատրպատականի հայոց թեմի պատմական վանքերի Ուխտագնացութեան գործադիր յանձնախմբի անդամները ներկայացան Թեմական խորհրդին, Ս. Թադէի վանքի անցնող եռօրեայ ուխտագնացութեան իրենց կատարած աշխատանքի նիւթա-բարոյական զեկոյցը ներկայացնելու:

Նիստը նախագահեց Ատրպատականի հայոց թեմի առաջնորդ Տ. Գրիգոր արք. Չիֆթճեանը: Յանձնախմբից ներկայ էին՝ Գագիկ Յարութիւնեանը, Վարդան եւ Սեւան Ենովքեանները եւ Թադէ Կարապետեանը: Նիստից բացակայում էին յանձնախմբի վաստակաշատ անդամներ՝ Ազատ Մատթէոսեանը եւ Ռազմիկ Օրդուխանեանը:

Թեմական խորհուրդը իր ամբողջ կազմով ներկայ էր, գլխաւորութեամբ ատենապետ Գագիկ Ջորջեանի, եւ մասնակցութեամբ Ալէն Սայեադեանի, Վարդան Կարապետեանի, Հենրիկ Աբրահամեանի եւ Քաթրին Դիլանեանի:

 Սրբազան Հայրը ողջունելով բոլորին, վերյիշեցում կատարեց անցնող յուլիսի 20-22-ին տեղի ունեցած եռօրեայ ուխտագնացութեան դէպի Ս. Թադէոս Առաքեալի վանքը: Նա բացառիկ համարեց այս տարւայ Ուխտագնացութիւնը, առաջին հերթին իւրայատուկ կազմակերպւածութեան համար, որով ոչ մի անախորժ միջադէպ տեղի չէր ունեցել ուխտաւորների շարքերում, որը այնքան սովորական երեւոյթ էր նախորդ տարիներին: Բոլոր ուխտաւորների գոհունակ ժպիտը, ուրախութիւնը եւ հաւատաւոր մօտեցումը ուխտագնացութեանը, Սրբազան Հայրը վերագրեց յանձնախմբի նւիրեալ աշխատանքին եւ Թեմական խորհրդի բծախնդիր հովանաւորութեանը. «Հակառակ փոքրաթիւ լինելուն, յանձնախմբի անդամները բացառիկ պատւով դուրս եկան, մեր թեմի կեանքի տարեկան բարձրակէտը հանդիսացող այս ուխտագնացութեան կազմակերպման աշխատանքի տակից, նոր մրցանիշ արձանագրելով դրա պատմութեան մէջ: Թեմական խորհուրդը եւս, իր պետական բարձրամակարդակ եւ ազնիւ յարաբերութիւններով մեծ վստահութիւն շահած, կարողացաւ յանձնախմբի աշխատանքները հովանաւորել եւ մօտկից հետեւել դրա գործունէութեան», – ասաց Սրբազան Հայրը:

Յանձնախմբի անունից նիւթա-բարոյական զեկոյց ներկայացրեց Գագիկ Յարութիւնեանը: Մանրամասն զեկոյցում նշւած էին նախապատրաստական այն աշխատանքները, որոնք հակառակ շատ ուշ սկսւելուն, յաջողութեամբ էին աւարտւել: Նիւթական զեկոյցի պատկերը եւս ներկայացնելով, յանձնախումբը իր առաջիկայ ծրագրերը ներկայացրեց Թեմական խորհրդին, յաջորդ Ուխագնացութեան նախապատրաստական աշխատանքները աւելի շուտ սկսելու անհրաժեշտութիւնը ընդգծելով:

Թեմական խորհրդի ատենապետ Գագիկ Ջորջեանը, ինչպէս նաեւ միւս անդամները իրենց գնահատանքը յայտնեցին յանձնախմբի անդամներին, նշելով, որ շուտով նոր նշանակումներ կը լինի, բազմացնելու համար կազմը եւ թեթեւացնելու դրա վրայ ծանրացած աշխատանքային դժւարին բեռը:

Թեմական խորհուրդը նաեւ յայտնեց Վանքում առաջնորդարանի տրամադրութեան ներքոյ գտնւող խուցերի վերանորոգման աշխատանքի շարունակման անհրաժեշտութիւնը, մատնանշելով, որ ցարդ վերանորոգւած խուցերը, որոնք տասնամեակներ շարունակ լքւած վիճակում էին գտնւում, մեծապէս փոփոխութեան էին ենթարկել Վանքի տարածքում յանձնախմբի գործունէական պատկերը, Մշակութային Ժառանգութեան հիմնարկի եւ Չալդրանի կուսակալութեան մօտ:

Թեմական խորհուրդը այս առիթով գնահատանք արձանագրեց այն բոլոր մարմիններին՝ սարկաւագաց եւ դպրաց դասերին, «Կոմիտաս» քառաձայն երգչախմբին, Թաւրիզի եկեղեցիների Կանանց խնամակալ մարմնին, «Տաթեւ» եւ «Ակունք» պարախմբերին, եւ յատկապէս կարգապահների կազմին, ինչպէս նաեւ Իրանի Եկեղեցիների Պահպանութեան հիմնարկութիւն՝ գլխաւորութեամբ դոկտ. Շերլի Աւետեանն, որոնք ժամացուցային ճշգրտութեամբ իրենց աշխատանքն էին կատարել, բարձր պահելով Ատրպատականի թեմի պատկերը, Իրանից եւ արտասահմանից ժամանած բոլոր ուխտաւորների առջեւ:

Վերջապէս, Սրբազան Հայրը խոր գոհունակութիւնը յայտնեց յանձնախմբի կանոնագրային հետեւողութեամբ աշխատանքի համար, որը շատ աւելի էր հեշտացրել դրա գործունէութիւնը:

Նշենք, որ հոկտեմբերի 28-ին, աւանդական դարձած թէյասեղանով, Թաւրիզի «Համազասպ Ոսկանեան» սրահում գնահատւելու են բոլոր նւիրեալ աշխատողները: