Հանդիսաւոր Ս. Պատարագ, մատաղօրհնէք եւ տօնակատարութիւն Գեարդաբադում

Ատրպատական, ազգային առաջնորդարան, Թաւրիզ – Հինգշաբթի՝ սեպտեմբերի 26-ին Ս. Գէորգ Զօրավարի տօնի եւ Գեարդաբադի համանուն եկեղեցու անւանակոչութ­եան առիթով, 24-րդ տարին լինելով, երեկոյեան ժամը 6-ից մինչեւ կէս գիշերւան 12-ը, եպիսկոպոսական հանդիսաւոր Ս. Պատարագով, մատաղօրհնէքով ու ժողո­վրդական տօնախմբութեամբ նշւեց դարաւոր եկեղեցու տօնը: Շուրջ 2000 հաւա­տացեալներ, Ուրմիայից, Թաւրիզից եւ տարբեր շրջան­ներից ժամանել էին պատ­մա­կան գիւղը, աղօթելու ու ապա խանդավառ մթնոլորտ ապրելու, հայութեան ջերմ սիրով բա­բա­խող Գեարդաբադում: Սոյն ուխտի պատա­րագին ներկայ գտնւեց նաեւ Իրանի Իսլամական խորհրդարանում Թեհրանի եւ Հիւսիսային իրանահայութեան պատգամա­ւոր՝ դոկտ. Արա Շահվերդեանը:

Հանդիսաւոր Ս. Պատարագը մատոյց եւ իր պատգամը փոխանցեց, Ատր­պա­­տականի հայոց թեմի առաջնորդ՝ Տ. Գրիգոր արք. Չիֆթճեանը: Պա­տա­րա­գի սրբազան երգեցողութիւնը կա­տար­ւեց «Կոմիտաս» երգչախմբի կողմից, ղե­կավարութեամբ երաժիշտ Վարդան Վահ­րամեանի:

Գեարդաբադ գիւղի եկեղեցւու Հոգաբարձութեան եւ Խնամակալ մարմնի տիկնանց միջոցով կազ­մա­­կեր­պւած ուխտագնացութիւնը լաւագոյն պայմաններ էր ստեղծել ուխտաւոր­ների հա­մար, որոնցից շատեր մի օր շուտ գալով, մինչեւ լու­սա­բաց եղել էին եկե­ղեցու շրջափակում, որտեղ Խնամակալ մարմինի ժրաջան տիկինների ձեռամբ եփւում էր մատաղը՝ տեղական կոչմամբ՝ «հալիմ»-ը:

Ս. Պատարագի ընթացքում իր պատգամը փոխանցելով, առաջնորդ Սրբա­զան Հայրը Սուրբ Գէորգի անձին եւ նահատակութեան դրւագը ներկայացրեց, Դիոկղետ­իանոս կայսեր օրով պատահած, եւ Սուրբի քաջ նահատակութեան օրինակը ամէն ժամանակի համար օրինակելի համարեց:  Սրբազան Հայրը յորդորեց ներկայ հաւատացեալներին, կեանքի բոլոր մա­կարդակներում, սեփական կարողութիւնների եւ հնարաւորութիւնների մէջ չկոր­ցնել հեզութիւնը, խոնարհութիւնը, համես­տու­թիւնը:

Նոյն առիթով տեղի ունեցաւ Հայաստանի վերանկախացման տարեդարձը, եւ օրհնւեց հայոց եռագոյն դրօշը: Իր պատգամում, Սրբազան Հայրը յորդորեց բո­լորին, միշտ զօրավիգ կանգնել մեր հայրենիքի պաշտպանութեանն ու բարգաւաճ­մանը:

Պատարագից անմիջապէս յետոյ, եկեղեցական թափօրը ուղղւեց դէպի եկե­ղեցու շրջափակ, որտեղ յարդարւած յատուկ սեղանի վրայ բերւեց մատաղը՝ օրհ­նութեան համար: Յատուկ աղօթքներով եւ «Ամէն ալելուիա»-ի երգեցողութեամբ կատարւեց մատաղօրհնէքը, ի յիշատակ բոլոր ննջեցեալների: Ապա, բոլոր ժողո­վրդի մաս­նակցութեամբ երգւեց «Կիլիկիա»-ն եւ սկսւեց հալիմի բաժանումը եւ ազգային տօնախմբութեան ծրագիրը:

Բացման խօսքը կատարեց Սիլւա Բաբայեանը, անդրադառնալով դարաւոր գիւղի պատմութեանը եւ 24 տարիներ առաջ Ս. Գէորգի տօնի օրւայ նշումը ուխտագնացութեամբ կատարելու որոշմանը: Նա Գեարդաբադ գիւղի Հոգաբարձու­թ­եան եւ խնամակա­լութեան անունից շնորհակալութիւն յայտնեց առաջնորդ Սրբա­զան Հօրը, որ իր մա­տուցած պատարագով ու կազմակերպական ամբողջ աշխա­տանքին շնորհած հովանաւո­րութեամբ ամէն տարի քաջալեր է հանդիսանում եկե­ղեցական սոյն մեծ տօնախմբութեանը:

Առաջնորդ Սրբազանը ներկայ բազմութեան իր պատգամը յղե­լով, բարձր գնահատանք յայտնեց գիւղի Հոգաբարձութեանը եւ Խնամակալ մարմ­նին, կազմակերպական բոլոր աշխատանքների համար: Նա յատկապէս իր գնա­հատանքը յայտնեց Ազգային բարերար տէր եւ տիկին Էդիկ եւ Սանդրա Մեջլում­եա­նին, որոնք մնայուն կերպով զօրավիգ են կանգնում տարեկան սոյն ուխտի օրւայ ծրագրին: Գնահատական իր խօսքի ընթացքում առաջնորդ Սրբազան Հայրը յիշեց նաեւ տէր եւ տիկին Մարտիկ եւ Լալա Ֆարհադեանին, տիկին Նոր­վարդ Անտոնեանին, տէր եւ տիկին Արբակ եւ Ժաքլին Արշակեա­նին եւ մատաղը պատրաստող կամաւոր բոլոր անձերին, որոնք կարելի են դարձ­նում այդքան մեծաթիւ բազմութիւն հիւրընկա­լելու աշխատանքը: Այս առիթով, նա իր հրատարակած Ատրպատականի եռա­հատոր գրքի նոր հրատարակւած Գ հատորից նւիրեց իր գնահատած անձանց, հայրական սէրը փոխանցելով նրանց:

Գեղարւեստական ծրագրի ընթացքում ներկայ ուխտաւոր բազմութիւնը եր­գեց ու պարեց մինչեւ գիշերւայ ժամը 12-ը, եւ ապա վերադարձաւ իր տունը: