Ատրպատականի հայոց թեմի առաջնորդը բանախօսեց Ուրմիայում, Գազայի ռմբակոծման առաջին տարելիցի առթիւ

Ատրպատական, ազգային առաջնորդարան, Թաւրիզ – Կիրակի՝ հոկտեմբերի 20-ին, երեկոյեան ժամը 5:00-ին, Ուրմիայի ասորական համայնքի «Մարիամ» սրահում տեղի ունեցաւ յիշատակի յա­տուկ ձեռնարկ, մէկ տարի առաջ Գազա­յում սկսւած ցեղաս­պանական ջարդի եւ քրիստոնէական եկեղեցու ռմբահարման ա­ռիթով:

Սոյն ձեռնարկին մասնակցելու եւ դասախօսելու համար յատկապէս հրա­ւիր­ւել էր Ատրպատականի հայոց թեմի առաջ­նորդ՝ Տ. Գրիգոր արք. Չիֆթճեանը: Ծրագրին մասնակցեց նաեւ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը եւ ա­սո­րական համայնքի պատգամաւոր՝ Շառլի Էնւիէ Թեքիէն: Նրանք եւս յատկապէս ընդգծեցին Միջին Արեւելեան դժբախտութիւնը, որը սկսել է արդէն տարածւել միջավայրում եւ առաւել անբնական կացութիւն ստեղծել տարածաշրջանում: Իւրաքանչիւր խօսք վերցնող պաշտօնապէս դատապարտեց այն, ինչ որ Սիոնիստական ռեժիմը իրագոր­ծում է Պաղեստինի տարածքում:

Սրբազան Հայրը բեմ հրաւիրւելով ընդգծեց. «Միջին Արեւելքում իրականացւող կործանարար պատերազմը ե՛ւ Պաղեստինի Գազա քաղաքում, ե՛ւ Լիբանանի սահ­մաններից ներս, 21-րդ դարի անյարիր կա­ցութիւններ են, որոնք զէնքի ուժի եւ իրաւազրկւած ազգերի անհաւասար կեան­քի պայմանների արդիւնք են»:

Վերջապէս, Սրբազան Հայրը երկու մտածում­ներ ընդգծեց, որոնք իրաւազրկւած ազգերի համար սիոնիստական ռեժիմի կողմից դարձել են անտե­սանելի կէտեր, եւ որոնք ընդհանրապէս բացակայում են այսօր աշխարհի երեսից. Արդարութիւն եւ խաղաղութիւն. «Եթէ ար­դարութիւն չկայ աշխարհում, ուրեմն բա­ցակայելու է խաղաղութիւնը: Իսկ եթէ խա­ղաղութիւն չկայ աշխարհում, ուրեմն դրա պատճառով է, որ բացակայում է ար­դարութիւնը…»,- ասաց Սրբազան Հայրը:

«Եկեղեցիները, մզկիթները եւ բոլոր աղօթավայրերը, քարեղէն կառոյցները չեն միայն: Դրանք ոչ միայն ռմբակոծումների այլեւ երկրաշարժերի զոհ կարող են դառնալ: Իսկական եկեղեցիները, մզկիթները, աղօթարանները, հաւատացեալների սըր­տերն են, որտեղից խօսում ենք Աստծու հետ…»,- ասաց Սրբազան Հայրը, մաղթելով, որ աշխարհում կը դադարեն կործանարար արարքները եւ հաշտութիւն կը գոյանայ մարդկանց միջեւ:

Յայտնենք, որ ծրագրի ընթացքին տեղացի փոքր երեխաներից բաղկացած մի երգչախումբ յաջողապէս կատարեց ազատագրական երգեր, ներշնչելով բոլոր ներկաներին: Նշենք նաեւ, որ ծրագրի վերջնական բաժինը յատկացւել էր պատերազմից փրկւած եւ վերապրած անձերին: