Իսլամական քարոզչութիւնների կազմակերպութեան պետական կառոյցի ներկայացուցիչները Ատրպատականի հայոց թեմի առաջնորդարանում
Ատրպատական, ազգային առաջնորդարան, Թաւրիզ – Երեքշաբթի՝ հոկտեմբերի 22-ի առաւօտեան ժամը 11:00-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը ազգային առաջնորդարանի «Էմիլ Յակոբեան» դահլիճում ընդունեց այցելութիւնը, Թեհրանից ժամանած պետական մի խմբի, որի նպատակն է Իսլամական քարոզչութեան կազմակերպութեան բարեյաջող գործընթացը վարել:
Սոյն խմբին մաս էին կազմում Թաւրիզի համալսարանների իսլամական գիտութիւնների բաժնի պատասխանատու հոջ. Մոհամմադռեզա Նաղիեանը, հոջ. Նաղաւին, Թահերին, Ջաւադին, եւ կազմակերպութեան առաքելութեան մաս կազմող մի խումբ պատասխանատուներ: Հանդիպմանը ներկայ գտնւեց նաեւ Ատրպատականի հայոց թեմի Թեմական խորհրդի ատենապետ՝ Գագիկ Ջորջեանը:
Առաջնորդ Սրբազան Հայրը ողջունելով ներկաներին, անդրադարձ կատարեց Միջին Արեւելքում տեղի ունեցող անհաւասար եւ անարդար մարտի վերաբերեալ, որի զոհ են դառնում անմեղ երեխաներ, կանայք եւ տարեցներ. «Շատերը կորցրել են ոչ միայն իրենց տները, այլեւ հարազատ զաւակներին, ծնողներին եւ հարազատներին: Աշխարհը լուռ է մնում Սիոնիստական կառավարութեան կազմակերպած անխնայ սպանդին, որը Գազայից սկսելով, այժմ հասել է Լիբանան»,- ասաց Սրբազան Հայրը, խնդրելով որ բոլորը իրենց աղօթքներում յիշեն նահատակներին եւ վիրաւորներին, ինչպէս նաեւ խնդրեն Աստծուց, դադարեցնել անխնայ կոտորածը:
Պետական ներկայացուցիչները հերթաբար խօսք առնելով, իրենց զօրակցութիւնը յայտնեցին Սրբազան Հօր բոլոր արտայայտութիւններին, յատկապէս վերյիշելով Լիբանանում սկսւած վայրագ արարքները, ղեկավար տարրերի սպանութեանը եւ ժողովրդի բնակարանների դէմ գործւած աղէտներն ու անմեղ ժողովրդի կոտորածը:
