Միութիւնների բարեզարդումը առաւել խանդավառութիւն է առաջացնում միութիւններ յաճախող մեր սիրելի թէ՛ միութենականների, եւ թէ՛ հայրենակիցների մօտ, որոնք հնարաւորութիւն են ունենում բարեկարգւած մթնոլորտում իրենց աշխատանքը շարունակել:
Նշեալ նորոգութիւնների ծիրում Հ. Մ. Մ. «Նայիրի» միութեան վարչութեան նախաձեռնութեամբ, մի քանի ամսեայ աշխատանքներից յետոյ, վերանորոգւեց միութեան «Սուքերեան» սրահի բեմը եւ բեմի տարածքը՝ օժտւելով արդիական յարմարութիւններով: Նոյեմբերի 8-ի եկեկոյեան, կազմակերպւել էր միութենական մասշտաբով գեղարւեստական ծրագիր, որի ընթացքում միութեան վարչութեան անդամների ձեռամբ բացումը կատարւեց կատարելապէս վերանորոգւած բեմի:
Սկաուտների ներկայութեամբբ միջոցառման սկզբում միութեան վարչութեան անդամները հատեցին նորակառոյց բեմի վարագոյրի վրայ տեղադրւած երիզը եւ ներկաների դիմաց բացւեց գեղեցիկ եւ արդիական սարքերով ու գունային նորանոր յարմարութիւններով օժտւած բեմը: Օրւայ բացման խօսքով հանդէս եկաւ Հիլդա Աղախանեանը: Իր խօսքի ընթացքում նա ընդգծեց. «Երկար տարիներ Զէյթուն քաղաքամասի բնակչութիւնը պահանջ էր զգում ունենալ հաւաքատեղի, միութիւն եւ եկեղեցի: 1979 թւականին Թեհրանի հայոց թեմի Ազգային իշխանութեան միջոցով տրամադրւած հողատարածքում կառուցւեց «Սուքերեան» սրահը եւ անւանակոչւեց բարերար Վահրամ Սուքերեանի անունով: Սրահի երկրորդ յարկը տրամադրւեց «Հայ կին» միութեան կից «Անահիտ» միութեանը, որը մինչ օրս օգտագործւում է իբրեւ պատկան միութեան կենտրոնատեղի:
Հ. Մ. Մ. «Նայիրի» միութիւնը չունենալով յարմար կենտրոնատեղի եւ դրսեւորելով ազգային-մշակութային եւ մարզական աշխուժ աշխատանքներ, 2000 թւականին փոխադրւեց «Սուքերեան» սրահ: Այնուհետեւ միութեան իրարայաջորդ վարչութիւնները հոգատար են եղել շէնքի պահպանման ուղղութեամբ եւ յաճախ վերանորոգման են ենթարկել: Վերանորոգել են սրահի պատերը, առաստաղը, յատակը, բեմը եւ յարակից յարմարութիւնները: Ուրախ ենք, որ այսօր նոյնպէս վերանորոգւել է բեմի յատակը, պատերը, վարագոյրները, աստիճանները, էլեկտրական հոսանքի դասաւորումները եւ բեմի ընդհանուր ձեւաւորումը: Յուսանք միութիւնը եւ միութենականները, ինչպէս նաեւ քաղաքամասին մեր հայրենակիցները եւ Թեհրանի հայկական համայնքը լաւագոյնս կը վայելի սրահի յարմարաւէտ պայմանները զանազան միջոցառումների համար»:
Հանդիսութիւնը շարունակւեց գեղարւեստական յայտագրով: Հայկական-ազգագրական պարերով ելոյթ ունեցան Հ. Մ. Մ. «Նայիրի» միութեան «Նայիրի» պարախումբը, գեղարւեստական ղեկավար Արտաւազդ Աւետիսեան, բեմադրիչ Մերի Աւետիսեան, գլխաւոր պարուսոյցներ՝ Թինա Անտոն եւ Սիւնէ Շահվալադեան, ասմունքով ելոյթ ունեցաւ Հերմինէ Օրուջեանը, իսկ երգերի կատարմամբ Էրիկա Դաւթեանը եւ Ժիլբերտ Կարապետեանը:
Օրւայ եզրափակիչ խօսքի համար ամբիոնի մօտ հրաւիրւեց միութեան վարչութեան նախագահ Սերոժ Օհանեանը: Իր ելոյթի ընթացքում նա համապարփակ գծերով անդրադարձաւ նորոգութիւններին եւ ընդգծեց. «Բեմի յատակը իջեցւել է եւ քանի որ բեմ բարձրանալու աստիճանները անյարմար էին աստիճանները կատարելապէս նորակառոյց են դարձել, բեմի յարակից պատերը 80 սանտիմետրով յետ է տարւել եւ մասամբ լայնացել է: Էլեկտրական ամբոջ սարքերը եւ լարերը իմի են բերւել, լոյսերի բաժինը կատարելապէս վերանորոգւել է, վարագոյրները հիմնովին փոխւել են եւ էլեկտրական սարքով են բացւում, բեմի յետեւի սենեակը, որտեղ զգեստաւորման համար էր կատարելապէս վերակառուցւել է հաւասարւելով բեմին, բեմի յատակը աւելի ամրակայելու նպատակով կրկին ցեմենտապատւել է եւ բեմին յատուկ ծածկով ծածկւել է: Այս բոլոր աշխատանքների իրականացումը տեւել է երկուսուկէս ամիս, եւ իհարկէ դեռ կան ինչ որ աշխատանքներ»:
Նա նշեց. «Վերակառուցման աշխատանքները վստահւել է ճրտ. Նարէ Բադալեանին, որը բծախնդրօրէն հետամուտ է եղել աշխատանքի իրականացմանը, ու թէեւ ամբողջ վարչական կազմը հետամուտ է եղել աշխատանքներին, սակայն հիմնականում երկու վարչականներ՝ Էդմոնդ Գիւլումեանը եւ Սեւակ Տ. Պետրոսեանը ելնելով իրենց մասնագիտութիւնից չեն խնայել իրենց կարելին»: Վերջում վարչութեան նախագահի ձեռամբ գնահատւեց ճրտ. Նարէ Բադալեանը: Վարչութեան նախագահը գնահատանքով անդրադարձաւ միութեան ձեռնարկ յանձնախմբին, օրւայ միջոցառումը նախաձեռնելու համար, եւ գեղարւեստական բաժինը իրականացնողներին: Վերջում կազմակերպւել էր ընդունելութիւն:
Թղթակցութիւնը՝ ԿԱՐԻՆԷ ԴԱՒԹԵԱՆԻ
