Թեհրանի «Արասբարան» մշակութային համալիրում «Հայկական երաժշտութեան երեկոյ»
«ԱԼԻՔ», Կ. Դ. – Երէկ՝ յունւարի 7-ի երեկոյեան, իւրայատուկ միջոցառում էր կազմակերպւել Թեհրանի «Արասբարան» մշակութային համալիրում: «Հայկական երաժշտութեան երեկոյ» խորագրով միջոցառումը նախաձեռնւել էր «Բա թառանէ» պարբերաթերթի ծրագրերի շարանում: Օրւայ հաղորդավար եւ «Բա թառանէ» պարբերաթերթի գլխաւոր խմբագիր Համիդ Նասեհին շնորհաւորելով Ամանորը անդրադարձաւ նման միջոցառումների կարեւորութեանը:
Երեկոյի ընթացքում մեծարւեցին Իրանի երաժշտական կեանքում, ի մասնաւորի իրանական էստրադային երաժշտական ոլորտում իրենց անմնացորդ դերը իրականացրած հայ երաժիշտներ ու երաժշտական տեխնիկաների ներմուծողներ: Հանգուցեալ Անդրէ Արզումանեանի, Վարուժան Հախբանդեանի եւ Վիգէն Դաւուդիի մեծարման ընդմիջով, օրւայ բանախօսների միջոցով մեծարւեցին բոլոր այն հայ արւեստագէտ երաժիշտները, որոնց անունները բազմիցս հնչեց երեկոյի ընթացքում:
Լեփ լեցուն դահլիճում, որտեղ ներկայ էին «ԱԼԻՔ» հաստատութիւնից, ազգային մարմիններից ու միութիւններից ներկայացուցիչներ, իրանահայ անւանի երաժշտական վերլուծաբաններ, երաժշտագէտներ ու դիրիժորներ եւ Իրանի երաժշտական երկնակամարի ականաւոր դէմքեր, հրաւիրւեցին իրենց խօսքերը փոխանցելու: Արտայայտւեցին Թեհրանի Հայ Դատի յանձնախմբի նախագահ Իսակ Իւնանէսեանը, համալսարանի դասախօս, երաժշտագէտ դոկտ. Վարդան Սահակեանը, երաժիշտներ՝ Ֆերէյդուն Խոշնուդը, Միլադ Քիանին, Միրալի Նաղին եւ անուններ որոնցից իւրաքանչիւրը անդրադարձաւ Իրանի երաժշտական ոլորտում իրանահայութեան ներմուծումների մասին եւ պարբերաթերթի արտօնատէր Ազադէ Ռաբանին: Ապա երաժիշտ-դաշնակահար Արմէն Ասատրեանի ղեկավարած երաժշտական խմբի կատարումներով երգւեցին նշւած երաժիշտներից կտորներ: Ցուցադրւեց տեսաֆիլմ, որի ընթացքում անւանի երգիչ Արտուշը անդրադարձաւ օրւայ թեմային: Գնահատագրեր յանձնւեցին հանգուցեալ Անդրէ Արզումանեանի ընտանիքին, եւ «Փափ» ստուդիայի հիմնադիր տնօրէն եւ կոմպոզիտոր Վարուժան Հախբանդեանի ընկեր Վիգէն Դաւուդիին: Ընթացքում շնորհանդէսը կատարւեց «Բա Թարանէ» երաժշտական հանդէսի վերջին համարի, որը պարփակում էր հարցազրոյց անւանի երաժիշտ-երգիչ Արտաշէս Աւետեան՝ Արտուշի հետ: Վերջում նւագախումբը՝ երգիչ Ռոմիկ Ազիզեանի կատարմամբ հնչեցրեց Իսակ Իւնանէսեանի գրչին պատկանող եւ Արմէն Ասատրեանի երաժշտութեամբ՝ «Իմ Թեհրան» երգը:
