Իրանի Իսլամական յեղափոխութեան 46-ամեակը տօնւեց Ուրմիայի հայոց սրահում
Ատրպատական, ազգային առաջնորդարան, Թաւրիզ – Շաբաթ, փետրւարի 8-ին, ուրմիահայութիւնը նշեց Իրանի Իսլամական յեղափոխութեան 46-րդ տարին, Ուրմիայի Ս. Ստեփանոս ծխական եկեղեցու «Արամ Մանուկեան» հանդիսասրահում, կազմակերպութեամբ Ուրմիայի Գործակալական խորհրդի, գլխաւորութեամբ ատենապետ Վանիկ Յակոբեանսի:
Հանդիսութեան նախագահեց Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, ներկայութեամբ պետական բարձրաստիճան պատասխանատուների, Ուրմիայի կուսակալի, ազզային բարերար Էդիկ Մեջլումեանի, Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի, ասորական համայնքի պատգամաւորի, Փոքրամասնութիւնների պատասխանատու Ֆրութէնի, ասորի քահանաների եւ համայնքապետի, ինչպէս նաեւ այլ հրաւիրեալների:
Սոյն ծրագրի օրւայ առաւօտ, առաջնորդ Սրբազանի նախագահութեամբ հոգեհանգստեան արարողութիւն տեղի ունեցաւ հայ նահատակների շիրիմների վրայ, Ռահւայի հայոց ազգային գերեզմանատանը, ներկայութեամբ պետական բարձրաստիճան պատասխանատուների, ինչպէս նաեւ նահատակների ընտանեկան պարագաների:
Նոյն երեկոյ, ժամը 4:30-ին բացումը կատարւեց ԻԻ Յեղափոխութեան յայտագրին: Բացման եւ բարի գալստեան խօսքը ուղղեց Սեւանա Սարգսեանը: Նա 46-րդ ամեակի շարունակականութիւնը նոր սերունդների անդուլ ճիգերով ապահովելու խոր իմաստը ներկայացրեց սրահը լցրած բազմութեան, որոնք ապագային նայելու են վառ աչքերով:
Պաշտօնական խօսքերի առաջին հրաւէրը ստանալով, Ատրպատականի հայոց թեմի առաջնորդ Սրբազանը պատգամեց հպարտալի առիթի մասին, որ նոր էջ է բացել Իրանի համար: Վերջապէս նա խօսեց նահատակների մասին, յիշեցնելով նրանց կատարած մեծ զոհողութեան մասին, որ իրենց կեանքը նւիրաբերել էին երկրի անկախութեանը եւ բարգաւաճմանը:
Պատգամաւոր Արա Շահվերդեանը իր խօսքում անդրադարձաւ Յեղափոխութեան մեծ խորհրդին եւ անժամանցելի արժէքին, Կրօնապետին եւ բոլոր օգնականներին բարեմաղթանք յղելով: Նա նշեց, որ Իսլամական Յեղափոխութեան յարգանքն ու տւած կարեւորութիւնը բոլոր փոքրամասնութիւններին եւ կրօններին, նրանց փոխադարձ յարգանքին ու կապւածութեանը պատճառ է:
Օրւայ գլխաւոր բանախօսն էր Կուսակալ Ռասուլ Մուքաբելի: Անցեալն ու ներկան առնչելով, Կուսակալը մեծ յարգանքով յիշատակեց հայ նահատակներին, որոնք երկրի մնայուն ժառանգորդներն են համարւում: Նա յատկապէս շեշտեց, որ Իրանի բոլոր ազզութիւնները, ցեղերը եւ կրօնները մասնակից դարձան Յեղափոխութեան կերտած յաղթանակին:
Գեղարւեստական ծրագրով բեմ բարձրացան «Նայիրի» մանկապարտէզ-նախակրթարանի երեխաները, պարսկերէն լեզւով երգելով յեղափոխութիւնը պանծացնող երգեր: Ապա, «Մասիհա» ազգային դպրոցի սաները ելոյթ ունեցան, յեղափոխական եւ երկրի բարգաւաճման նւիրւած մի շարք երգերով, մեծ գնահատանքի արժանանալով ներկաների ծափողջոյնների: Գեղարւեստական ծրագրի ընթացքին ասմունքով հանդէս եկաւ աշակերտուհի Մարիբէլ Ասլանեանը:
Ծրագրի աւարտին բեմ հրաւիրւեցին առաջնորդ Սրբազանը, կուսակալը, ազգային բարերար Էդիկ Մեջլումեանը, խորհրդարանի հայ եւ ասորի պատգամաւորները եւ հոգեւորականներ: Այս առիթ բոլորը հերթաբար նւէրներ յանձնեցին բեմի վրայ ելոյթ ունեցած աշակերտութեան, որոնք նւիրաբերւել էին բարերար տէր եւ տիկին Էդիկ եւ Սանդրա Մեջլումեանների կողմից:
Յեղափոխութեան 46-րդ տարեդարձին նւիրւած սոյն ժողովրդական ձեռնարկը աւարտեցին երգերի կատարմամբ, որը ներկայացրեց ուրմիահայ երգիչ Սեւան Ղազարեանը:
