Պետական պաշտօնեանների պատւին կազմակերպւած ընթրիք-երեկոյ՝ խորհրդարանի պատգամաւոր՝ Արա Շահվերդեանի նախաձեռնութեամբ

«ԱԼԻՔ» – Երկուշաբթի՝ մարտի 10-ին, Իսլ. խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի նախաձեռնութեամբ  «Արարատ» մարզաւանի «Վաչիկ Ղարաբէգեան» միջոցառումների դահլիճում տեղի ունեցաւ պետական բարձրաստիճան այրերի ու պաշտօնեաների պատւին ընթրիք երեկոյ: 

Միջոցառմանը ներկայ էին նախագահ Փեզեշքիանի կառավարութիւնում գիտութեան նախարար դոկտ. Հոսէյն Սիմայի Սարաֆը, Իսլ. խորհրդարանի դիւանի երկու փոխատենապետերը, Սպորտի եւ երիտասարդութեան հարցերով նախարարի առաջին տեղակալը, Մշակոյթի եւ առաջնորդութեան նախարարութեան փոխնախարարը, Իսլ. խորհրդարանի մասնագիտական յանձնաժողովների նախագահները, խորհրդարանում Զրադաշտական համայնքի պատգամաւորը, Իրան-Հայաստան բարեկամութեան խմբի փոխնախագահ Գեղարդ Մանսուրեանը, Մշակոյթի նախարարութեան փոքրամասնութիւնների հարցերով գրասենեակի ներկայացուցիչները, ինչպէս նաեւ երկրի մի խումբ բարձրաստիճան պաշտօնեաներ, ովքեր սերտ կապի մէջ են խորհրդարանի հայ պատգամաւորների եւ հայկական համայնքի հետ:

Միջոցառման կազմակերպչի անունից  ողջոյնի խօսքով հանդէս եկաւ Արտոյտ Զոհրաբեանը, որին յաջորդեց օրւայ առիթով յղւած Սրբազան Հօր պատգամը, ինչն ընթերցւեց Տ. Առաքել աբղ. Գատեհճեանի միջոցով: Սրբազան Հայրն իր պատգամում անդրադարձել էր երկու քրիստոնեայ եւ իսլամ կրօնների պահքի շրջանի համընկնման փաստին, եւ շեշտել, որ կրօնը, որպէս  աստւածային կեանքի նշան՝ մարդու կեանքում, սիրոյ, խաղաղութեան, ներողամտութեան ուսմունք է եւ առաջնորդում է մարդուն դէպի սէր, եղբայրութիւն եւ համերաշխութիւն:

Սրբազան Հօր պատգամին յաջորդեց դոկտ. Արա Շահվերդեանի խօսքը, որով նա եւս անդրադառնալով երկու կրօնների պահքի շրջանների համընկնման փաստին շեշտեց ընդհանուր մարդկային արժէքների պահպանման կարեւորութիւնը:

Գիտութեան նախարար դոկտ. Սիմայի-Սառաֆը եւս ելոյթ ունենալով բարձր գնահատեց մարդկային արժէքների պահպանմանն ուղղւած իւրաքանչիւր աշխատանք, յատկապէս, եթէ այն արւում է դաւանաքնով միմեանցից տարբերւող շերտերի կողմից: 

Նախարարը յաւելեց. «Մենք բոլորս գիտենք, որ կրօնները, յատկապէս միաստւածական կրօնները, այդ թւում՝ քրիստոնէութիւնը եւ իսլամը, կրօնական համոզմունքներում շատ ընդհանրութիւններ ունեն, որոնք հիմք են հանդիսացել այս երկու կրօնների հետեւորդների միջեւ համագործակցութեան, համակեցութեան, սիրոյ եւ փոխադարձ յարգանքի համար»:

Միջոցառման ներկաների շարքերում էին նաեւ նախագահական հիմնարկի, Ներքին գործերի, Թ. Հ. Թ. Պատգամաւորական ժողովի եւ Թեմական խորհրդի, «Ալիք» հաստատութեան, ՀՈՒՍԿ հաստատութեան, քահանայեաց դասի եւ ազգային մարմինների ու միութիւնների ներկայացուցիչները, հայոց դպրոցների տնօրէնները, ոստիկանութեան, Թեհրանի քաղաքապետարանի, լրագրողներ եւ լրատւամիջոցների ներկայացուցիչներ։

Լուսանկարները՝ ՀԱՏԻՍԻ