Հայոց Ցեղասպանութեան 110-ամեակի Ատրպատականի հայոց թեմի յանձնախմբի ժողովը Թաւրիզում
Ատրպատական, ազգային առաջնորդարան, Թաւրիզ – Չորեքշաբթի, ապրիլ 9-ի երեկոյեան ժամը 19:00-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանի եւ Թեմական խորհրդի հրաւէրով, ազգայի առաջնորդարանի «Էմիլ Յակոբեան» դահլիճում գումարւեց, Ապրիլ 24-ի առաջիկայ ծրագրերի կազմակերպման յատուկ ժողովը:
Սոյն ժողովին իրենց մասնակցութիւնը բերեցին թեմում գործող բոլոր միութիւնների եւ կազմակերպութիւններից ներկայացուցիչներ, ինչպէս նաեւ Պատգամաւորական ժողովի դիւանի ատենապետուհի Արմինէ Վահրամեանն ու ատենադպրուհի Անի Յակոբեանը: ժողովն հրաւիրւել էր, կազմակերպելու համար Ապրիլ 24-ի առիթով տեղի ունենալիք ձեռնարկների ծրագիրը:
Առաջնորդ Սրբազան Հօր աղօթքից եւ օրհնութեան խօսքից յետոյ, Թեմական խորհրդի փոխատենապետ Ալէն Սայեադեանը ողջունեց բոլորի ներկայութիւնը եւ շնորհակալութիւն յայտնեց այն աշխատանքների համար, որոնք իւրաքանչիւրը կատարում է իր Միութեան ոլորտում: Նա շեշտեց Ապրիլեան սուրբ Նահատակների նւիրւած ձեռնարկների բացառիկ առիթը, որը իւրաքանչիւր տարի առաւել եւս զօրացնում է մեր ազգային պատկանելիութեան նկարագիրը: Ալէն Սայեադեանը նաեւ շեշտեց, որ Թեմում գործող բոլոր Միութիւնների եւ ազգային կառոյցների համագործակցութիւնը կարեւոր դերակատարութիւն ունի, իսկ տեղական ուժերով աշխատանքների գործադրումը, նոյնքան էական է, թեմի հզօրութեան արտացոլացման համար:
Բոլոր Միութիւնների ներկայացուցիչները կարեւորեցին Հայոց Ցեղասպանութեան 110-ամեակի առիթով ազգային-եկեղեցական ծրագրերի իւրայատուկ շուքով կազմակերպման նշանակութիւնը, լայն հորիզոնի վրայ քննարկելով ներկայ եւ առաջիկայ ժամանակներին նորանոր ծրագրերով, սոյն առիթը արժեւորելու կարեւորութիւնը:
