ՀՕՄ-ի Ուրմիայի վարչութիւնը շնորհաւորեց Ուսուցչաց տօնը

Ատրպատական, ազգային առաջնորդարան, Թաւրիզ – Հայ Օգնութեան միութեան Ուր­միայի մասնաճիւղի վարչութիւնը տարեկան իր սովորութեամբ, մայիսի 3-ին, ուղղւեց Ուրմիայի ազգային «Մասիհա» դպրոցը, շնորհաւորելու համար այնտեղ ծառա­յող ուսուցիչներին, Ուսուցչաց տօնի առիթով: Վարչութեան ընկերակցում էին Ուրմիայի Գործակալական խորհրդի ատենապետ Վանիկ Յակոբեանսը, ինչպէս նաեւ Պատգամաւորական ժողովի Բ ատենադպրուհի Սարինէ Մեջլումեանը:

Պատւարժան հիւրերը դիմաւորւեցին տեսչուհի Ադրինէ Մեջլումեանի եւ ուսուց­չական կազմի կողմից, եւ սիրալիր հանդիպում ունեցան տեսչարանում: ՀՕՄ-ի ա­տենապետուհի Լալա Ֆարհադեանը յատուկ խօսքով Միութեան շնորհաւորանքը փո­խանցեց տեսչութեան եւ ուսուցչակազմին, նրանց անձնդիր ծառայութիւնը գովաբանելով: Այս առիթով, ատենապետուհին տեսչուհուն յանձնեց, նրան անւան սկզբնատառով կերտւած գեղեցիկ յուշանւէր, որը Թեհրանում էր պատրաստւել, յատկապէս այս հանդիպման համար:

Դպրոցի տեսչուհին շնորհակալական խօսքով հանդէս եկաւ, նշելով, որ ՀՕՄ-ը Ուրմիա քաղաքում այն բացառիկ կառոյցներից մէկն է, յատկապէս տօնական օրերի յիշատակութիւնները շեշտող եւ ի նկատի առնող: Նա անդրադարձաւ դպրոցի կրթական կեանքի յառաջադիմութեանը, ուսուցիչների նւիրեալ աշխատանքին, եւ աշակերտութեան տիպար կեանքին: Այս առիթով, տեսչուհին յատուկ ծաղիկներով շնորհակալութիւն յայտնեց հիւրերին, ազգային կեանքում յաջողութիւն մաղթելով բո­լոր աշխատանքներին: Նոյն առիթով, դպրոցը նիւթական նւէրով պատւեց ՀՕՄ-ին, որը այնքան ուշադիր է Ուրմիա քաղաքում բոլոր ազգային ու մարդասիրական գոր­ծերին:

Սոյն հանդիպումից անմիջապէս յետոյ, ՀՕՄ-ի վարչութիւնը իր ընկերակիցնե­րով այցելեց նաեւ «Նայիրի» կրթարանը, որտեղ մանկապարտէզի եւ նախակրթարա­նի աշակերտները սովորում են, եւ ազգային դաստիարակութիւն ընդունում նւիրեալ ուսուցիչների ուսուցումներով: 

Հիւրերին ընդունեց Կրթարանի տնօրէնուհի՝ Ռոնիկ Մեջլումեանը, որը շնորհակալական եւ երախտագիտական խօսքով հանդէս եկաւ, գնահատելով ազգային կեան­քում այնքան նւիրեալ ծառայութիւն ունեցող անձանց ներկայութիւնը: Սոյն հանդիպումը առիթ հանդիսացաւ անդրադառնալու Կրթարանի ուսումնական եւ ընկերական կեանքին, մանուկների կրթութեան եւ միաժամանակ ծնողների մանկավարժա­կան հետաքրքրութիւնների զարգացմանը նւիրւած աշխատանքներին: Ուսուցչուհիները եւս բացատրութիւններ տւեցին առօրեայ աշխատանքներից, երեխաների կրօ­նական, հոգեւոր եւ ազգային դաստիարակութեան կապւած ծրագրերը ներկայացնելով:

ՀՕՄ-ի վարչութեան ատենապետուհի Լալա Ֆարհադեանը եւ Պատգամաւո­րական ժողովի Բ ատենադպրուհի Սարինէ Մեջլումեանը պաշտօնական խօսքերով իրենց գնահատանքը յայտնեցին Կրթարանում ծառայողներին, հայկական կեանքի ծաղկմանը իրենց բե­րած նպաստի համար: Ուրմիայի հայ համայնքի բարեզարդման եւ բարեծաղկմանը նպաստող կրթական կառոյցներում գործող նւիրեալ անձնաւորութիւնների կատարած հսկայական աշխատանքին համար մատուցւած սոյն յարգանքը, նա համարեց նւազագոյնը, եւ շեշտեց, որ նրանք միշտ ազգի բոլոր զաւակների գնա­հատանքին արժանի են:

Այս առիթով, ՀՕՄ-ի վարչութիւնն ու Ազգային իշխանութիւնը ծաղիկներով ի­րենց շնորհակալութիւնը յայտնեցին, Կրթարանում բոլոր ծառայողներին: