«Հայ Կին» միութեան կից «Անի» միութեան վարչութեան նախաձեռնութեամբ՝ մայիսի 27-ին Սարդարապատ թաղամասում գտնւող միութեան կենտրոնատեղին հանդիսաւոր արարողութեամբ, անւանակոչւեց հանգուցել տկն. Նազիկ Մանասեանի անւամբ։
Տկն. Նարզիկը ճանաչւած էր համայնքում՝ իր ազգասիրութեամբ, գաղափարով եւ յամառութեամբ։ Նա չէր խնայում իր ջանքը, իր նպատակները իրականացնելու համար, այդ հիման վրայ ճանաչւած ու սիրւած անձնաւորութիւն էր համայնքում, յատկապէս Հեշմաթիէ՝ Սարդարապատ թաղամասում։
Նրա շնորհիւ հիմնադրւեց «Անի» միութիւնը եւ Սրբոց Վարդանանց եկեղեցին։ Տարիներ շարունակ եղել է «Սահակեան» բազմաաշակերտ դպրոցի ծնողական խորհուրդի անդամ, օժանդակել է թաղի նիւթապէս անբավարար ընտանիքներին, անդամակցել ու համագործակցել է Հ. Մ. «Սարդարապատ» միութեան հետ, իր խելամտութեամբ եւ ազգասիրութեամբ պահել, պահպանել եւ զարգացրել է իր սիրած ու ապրած թաղամասը։
Նրա բազմամեայ վաստակը եւ նւիրւածութիւնը նկատի առնելով «Անի» միութեան վարչութիւնը որոշել էր իր սրահը անւանակոչել ազգային-հասարակական գործիչ հանգուցեալ Նազիկ Մանասեանի անունով:
Ծրագրին հրաւիրւած էին Սրբոց Վարդանանց եկեղեցու հոգեւոր հայր արժանապատիւ Տ. Մաշտոց քահանայ Խաչատրեանը, տկն. Նազիկի ընտանեկան պարագաները, Սրբոց Վարդանանց եկեղեցւոյ, Հ. Մ. «Սարդարապատ» միութեան, Կարիքաւորներին Օժանդակող Մարմին՝ ԿՕՄ-ի, «Հայ Կին» միութեան կից միութիւնների ներկայացուցիչները ու Մայր միութեան երկու կապերը, հաշւեքննիչ մարմնի եւ «Անի» միութեան անդամուհիները։ Տ. Մաշտոց քահանայ Խաչատրեանի օրհնաքի ու ներկաների միասնական աղօթքով ու ձեռամբ բացումը կատարւեց սրահի եւ ներկաները մուտք գործեցին սրահ։
Ծրագրի բացումը կատարեց «Անի» միութեան նախագահուհի՝ Ժանետ Բալասանեանը: Նա շնորհակալութիւն յայտնելով ներկաներին մասնակցութեան համար, պատմեց միութիւնում սիրելի Նազիկ Մանասեանի կատարած աշխատանքների մասին, շեշտելով՝ որ, անւանակոչելով կենտրոնատեղին նրա անունով եւ մեր սէրն ու յարգանքը ցուցաբերելով, պէտք է այնպէս գործենք, որ նրա հիմնադրած միութիւնը առաւել ամուր հիմքերի վրայ կանգնեցնենք, ինչպէս անցեալ 46 տարիներին շարունակել է իր ծառայութիւնը իր վեհ նպատակին, իր գիտակից ու ազգասէր նախագահներով ու միութենականներով:
Ծրագրի ընթացքում միութեան անդամուհի Անուշա Աւանէսեանը գրական խմբից ներկայացրեց իրանահայ բանաստեղծ Մարտիրոս Օհանջանեանի գրչին պատկանող Ձօն՝ նւիրւած սիրելի Նազիկին եւ ընթերցեց հանգուցեալի կենսագրական տւեալները ու կատարած աշխատանքները: Արտայայտւեցին՝ «Հայ կին» միութեան կից «Անահիտ» ու «Արմենուհի» միութիւնների նախագահուհիները, Հ. Մ. «Սարդարապատ» միութեան ներկայացուցիչը, հանգուցեալ տիկ. Նազիկի քոյրերը, որը նաեւ իրենց օժանդակութիւնն են ցուցաբերել միութեանը։
Վերջում Տէր Մաշտոց քհնյ. Խաչատրեանը փոխանցեց Թ. Հ. Թ. առաջնորդ Տ. Սեպուհ արք. Սարգսեանի խօսքը, եւ դրւատանքով արտայայտւեց հանգուցեալի կատարած ազգանէւր աշխատանքների մասին, եւ ծրագիրը աւարտւեց հանգուցեալի հոգու խաղաղութեան համար աղօթքով:
Նիւթը տրամադրւել է «Անի» միութեան կողմից
