«ԱԼԻՔ», Կ. Դ. – Իրանի Իսլամական յեղափոխութեան յաղթանակի 45-րդ տարեդարձի մեծարման ծրագրերի շարանում, հովանաւորութեամբ Թեհրանի հայոց թեմի առաջնորդ Տ. Սեպուհ արք. Սարգսեանի, նախաձեռնութեամբ՝ Թ. Հ. Թ. Թեմական խորհրդի եւ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի եւ համագործակցութեամբ «Ջելւէ» մշակութային կենտրոնի, երէկ՝ փետրւարի 12-ի երեկոյեան «Արարատ» մարզաւանի «Վաչիկ Ղարաբէգեան» սրահում կազմակերպւել էր իւրայատուկ միջոցառում, պետական բարձրաստիճան պաշտօնատարների ներկայութեամբ:
Տէրունական աղօթքով եւ Իրանի պետական հիմնով մեկնարկած ծրագրի հաղորդավար Արտոյտ Զոհրաբեանը ողջունելով հիւրերին եւ շնորհաւորելով Իսլամական յեղափոխութեան յաղթանակի 45-րդ տարեդարձը, հրաւիրեց Թ. Հ. Թ. Թեմական խորհրդի ատենապետ ճրտպ. Նորայր Արամեանին իր խօսքը փոխանցելու: Իր ելոյթի ընթացքում նա ընդգծեց, որ Իրանի գիտակից ժողովուրդը, լինեն նրանք՝ մուսուլման, քրիստոնեայ, զրադաշտ թէ՝ հրեայ, յեղափոխական եւ հայրենասիրական ոգով տոգորւած ասպարէզ իջան եւ միասնաբար հիմքը դրեցին մի իշխանութեան, որը իր ժողովրդավարական յատկութեամբ, նպատակ էր հետապնդում երկիրը առաջնորդել դէպի անկախութիւն, բարգաւաճում ու զարգացում: Նա նշեց, որ Իսլամական յեղափոխութեան արդիւնաւորմամբ, Իրանը եւ իրանցին հսկայ շրջադարձային փոփոխութիւններ իրականացրին: Նա կարեւորութեամբ անդրադարձաւ իրանահայութեան անմնացորդ դերակատարութեանը Իրանի պատմութեան ընթացքում, Իրանի Իսլամական յեղափոխութեան յաղթանակի, պարտադրեալ պատերազմի եւ երկրի շինարարական ու առաջընթացի հարցով:
Միջոցառմանը հրաւիրւեց իր խօսքը փոխանցելու Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը: Իր ելոյթի ընթացքում պատգամաւորը ողջունելով ներկաներին ընդգծեց, որ մեր յեղափոխութիւնը լոկ իշխանական համակարգում մի փոփոխութիւն չէր, այլ վկան էր մի ժողովրդի վճռակամութեան, ով հաստատակամ էր ազատագրւել բռնապետութիւնից եւ ցանկանում էր ինքը տնօրինել իր ճակատագիրը: Նա նշեց, որ այսօր երբ վայելում ենք այս ազգային շարժման բարիքները, անհրաժեշտ է յիշենք նրանց, ովքեր հերոսաբար պատերազմ մղեցին անկախութեան եւ ինքնիշխանութեան ճամբին, քանի որ նրանց անխախտ յանձնառութիւնը հիմքը դրեց այնպիսի նպատակների, որի շուրջ համախմբւել ենք բոլորս: Նա կարեւորութեամբ անդրադարձաւ Իրանի ժողովրդի միասնականութեանը, եւ ընդգծեց, որ Իրանի Իսլամական յեղափոխութիւնը վկան է այն ժողովրդի դիմակայութեան, որը համախմբւել է միասնական ու համատեղ արժէքների շուրջ: Իր ելոյթի այլ բաժնում պատգամաւորը նշեց, որ Իրանի յեղափոխութեան տարիներին, իրանահայութիւնը ոչ միայն ակտիւ մասնակցութիւն դրսեւորեց ազատութեան ու արդարութեան կանչը բարձրաձայնելու համար, այլեւ Սրբազան պաշտպանութեան տարիներին բոլոր իրանցիների հետ միասին, յանուն երկրի անկախութեան ու տարածքային ամբողջականութեան նւիրաբերեց հարիւրաւոր նահատակներ:
Միջոցառմանը հրաւիրւեց իր խօսքը փոխանցելու Թեհրանի նահանգապետ Ալիռեզա Ֆախարին: Իր ելոյթի ընթացքում նահանգապետը նշեց, որ թէեւ Իրանի թշնամիները Իսլամական յեղափոխութեան յաղթանակից յետոյ բազմաթիւ խոչընդոտներ ստեղծեցին Իրանի դիմաց, ինչպէս 8-ամեայ պարտադրեալ պատերազմի տարիները, սակայն այդ Սրբազան պաշտպանութիւնը էլ աւելի համախմբեց Իրանի ժողովրդին եւ բոլորը պայքարի ելան յանուն Իրանի եւ այսօր այս միասնականութեան շնորհիւ Իրանը աշխարհում կարեւոր դիրք է զբաղեցնում, եւ իր ուրոյն խօսքը ունի փոխանցելու, որը արդիւնքն է բոլորի, այդ թւում միաստւածեան կրօնների հետեւորդների համախմբման: Նա իր ելոյթի ընթացքում կարեւորեց առաջիկայ խորհրդարանական ընտրութիւններում Իրանի ժողովրդի միասնական եւ միահամուռ մասնակցութիւնը, թշնամիների դաւադրութիւնները չէզոքացնելու նպատակով:
Իր խօսքը փոխանցելու համար ամբիոնի մօտ հրաւիրւեց Իսլամական մշակոյթի եւ առաջնորդութեան նախարարի տեղակալ եւ խորհրդարանի ու նահանգների հարցերով օգնական Սէյէդ Մոհամմադ Հաշեմին: Իր ելոյթի ընթացքում նա ընդգծեց, որ Իրանի Իսլամական յեղափոխութիւնը արդիւնքն էր միաստւածեան կրօնների հետեւորդների եւ Իրանի համայն ժողովրդի միասնականութեան, որոնք ընթացան յանուն արդարութեան, անկախութեան եւ մարդկային արժէքների վեհութեան: Նա նշեց, որ Իսլամական յեղափոխութիւնը իր սկզբնական օրից մինչ այսօր միշտ պարծանքով է մօտեցել երկրում բոլոր իրանցիների միասնականութեան խնդրին եւ կարեւորութեամբ անդրադարձաւ իրանահայ համայնքի եւ կրօնական փոքրամասնութիւնների կարեւոր դերակատարութեանը երկրի բոլոր բնագաւառներում:
Օրւայ եզրափակիչ խօսքը վերապահւած էր Թեհրանի հայոց թեմի առաջնորդ Տ. Սեպուհ արք. Սարգսեանին: Միջոցառմանը թէեւ ներկայ էր Սրբազան Հայրը, սակայն իր խօսքը պարսկերէնով ընթերցեց Տ. Գրիգորիս քհնյ. Ներսիսեանը:
Հանդիսութեան գեղարւեստական բաժնում իրենց հայերէն եւ պարսկերէն յեղափոխական երգերը հնչեցրին՝ Հ. Մ. «Արարատ» կազմակերպութեան «Արարատ» եւ Հայ Համալսարանականների Ընդհանուր միութեան «Տաւիղ» համատեղ երգչախմբերի անդամները՝ դիրիժոր Արփի Սիմրոջեան (Նազարեան): Երգչախմբի կատարումները ներկաների բուռն գնահատանքին արժանացան: Ընթացքում ցուցադրւեց յեղափոխութեան յաղթանակի, պարտադրեալ պատերազմի տարիները եւ իրանահայ դէմքերը պատկերող տեսաֆիլմ:
Միջոցառմանը գնահատագրեր յանձնւեցին մասնակից պետական բարձրաստիճան հիւրերին:
Վերջում կազմակերպւել էր ընդունելութիւն:
