Նոր Ջուղայի Հայ Մ. Մ. «Արարատ» միութեան Սկաուտական միաւորի Գերագոյն մարմնի նախաձեռնութեամբ եւ նոյն միաւորի Կազմակերպիչ յանձնախմբի կազմակերպութեամբ տեղի ունեցաւ ամենամեայ կարգով իրականացւող ֆուտբոլի մրցաշարը, որի բացումը կատարւեց ուրբաթ՝ օգոստոսի 8-ին, «Արարատ» միութեան մարզասրահում: Բացման երեկոյին ներկայ էին՝ թեմի ազգային մարմինների, շրջանի Հայ Դատի յանձնախմբի եւ «Արարատ» միութեան Կենտրոնական վարչութեան ներկայացուցիչներն ու ժողովուրդ:
Երեկոն, որը հանդիսավարում էր Վանէ Յովսէփեանը, սկիզբ առաւ Հայաստանի Հանրապետութեան եռագոյն դրօշի եւ անձնազոհ հինգ մարտիկների նկարների սրահ մուտք գործելով, ապա ներկաների մէկ րոպէ յոտնկայս լռութեամբ յարգւեց այդ հերոսների անմոռաց յիշատակը:
Շարունակութեան մէջ Սկաուտական միաւորի Գերագոյն մարմնի անունից ելոյթով հանդէս եկաւ Վանիա Պետրոսեանը:
Յատկանշելի է, որ այս մրցաշարին իրենց մասնակցութիւնն էին բերել վեց խմբեր հետեւեալ անուններով՝ «Արարատ», «Տաթեւ», «Շուշի», «Նժդեհ», «Արծիւ» եւ «Մասիս», որոնցից «Արարատ»-ն ու «Տաթեւ»-ը թեւակոխեցին եզարափակիչ փուլ, ինչի արդիւնքում 2-10 հաշւով յաղթող ճանաչւեց «Տաթեւ»-ը:
Մրցաշարի իրաւարարական աշխատանքը կատարեցին՝ Արին Խաչիկեանը, Քարլօ Խաչիկեանը, Ռուբիկ Պարսամեանն ու Արթին Մելիքեանը:
Թղթակից (Նոր Ջուղա)
