Ատրպատականի հայոց թեմի թանգարանի դասաւորման աշխատանքներ
Ատրպատական, ազգային առաջնորդարան, Թաւրիզ – Երեքշաբթի, սեպտեմբերի 23-ին, կէսօրւան ժամը 12:00-ին, Ատրպատականի հայոց թեմի առաջնորդ՝ Տ. Գրիգոր արք. Չիֆթճեանը, Թեմական խորհրդի ատենապետ Գագիկ Ջորջեանը եւ անդամներ Ալէն Սայեադեանը եւ Վարդան Կարապետեանը, «Մելիք Թանգեան» թանգարանում ընդունեցին պետական թանգարանի ընդհ. պատասխանատու դոկտ. Եազդանին եւ նոյն կառոյցի հնութեանց պահպանման պատասխանատու դոկտ. Հադադին, որոնք յատուկ առաքելութեամբ էին ժամանել:
Սրբազան Հայրը ողջունելով պետական հիւրերին, գոհունակութիւն յայտնեց, որ բոլոր արձանագրութիւնները իրենց աւարտին են հասել, Ազգային առաջնորդարանին վերադարձնելու համար Թանգարանի գոյքերի պատասխանատւութիւնը:
Դոկտ. Եազդանին մասնագիտական բացատրութիւններ հաղորդեց ներկաներին, յատկապէս թւագրւած մեծածաւալ իրերի վերանորոգութեան եւ վերադասաւորման ընթացքի մասին: Թեմական խորհրդի կողքին ներկայ էին Թանգարանի ընդհ. տնօրէնուհի Սիլւա Աշըղեանը, որը պետական արտօնագրով հետեւելու է վերադասաւորման աշխատանքին, օգնական ունենալով Վահիկ Բարոյեանին, որպէս պատասխանատու աշխատանքների: Դոկտ. Եազդանին վերաշինութեան կարօտ գործերի մասին ուղղութիւններ տւեց, որոնց հետեւեցին Ազգային իշխանութեան եւ տնօրէնուհի Սիլւա Աշըղեանի կողմից պաշտօնակոչւած անձերը: Նրանց շարքին էր նաեւ տեսախցիկներ տեղադրող պատասխանատու Եաշարը, որ շրջափակից սկսեալ, մինչեւ թանգարանի բոլոր բաժինները ցուցադրող համակարգչային սարք էր տեղադրել:
Հանդիպումը առիթ հանդիսացաւ մօտկից հետեւելու բացատրութիւններին, եւ բոլոր ներկաների կողմից յոյս յայտնւեց, որ մինչեւ յառաջիկայ տարեսկիզբ, աշխատանքների առաջին փուլը աւարտւած լինի, գէթ թանգարանի շէնքի առաջին յարկի կահաւորմամբ, ու դասաւորումով:
