Ուրմիայի հայոց «Մասիհա» ազգային դպրոցի 2025-2026 տարեշրջանի բացում
Ատրպատական, ազգային առաջնորդարան, Թաւրիզ – Շաբաթ, սեպտեմբերի 27-ի առաւօտեան ժամը 11:00-ին, առաջնորդ Սրբազանը մուտք գործեց Ուրմիայի հայոց «Մասիհա» ազգային դպրոցը, պաշտօնական բացումը կատարելու համար 2025-2026 ուսումնական տարւոյ:
Դարպասի մուտքին Սրբազանը դիմաւորւեց երեխաների ծաղկեփնչով եւ օրհնեց մատուցւած աւանդական աղուհացը: Սրբազան հօրը ընկերակցում էին Պատգամաւորական ժողովի դիւանի անդամ Սարինէ Մեջլումեանը եւ Գործակալական խորհրդի ատենապետ Վանիկ Յակոբեանսը:
Տեսչուհի Ադրինէ Մեջլումեանի ընկերակցութեամբ Սրբազանը առաջնորդւեց շրջափակ, որտեղ ամբողջ աշակերտութիւնը ծափողջոյններով ողջունեց առաջնորդ Սրբազան հօրը: Տեսչուհի բարի գալստեան խօսքից յետոյ, Սրբազան հայրը աշակերտութեան հետ միասին կատարեց Տէրունական աղօթքը, եւ «Զգործս ձեռաց մերոց» մաղթանքը, եւ ապա նրանց ուղղեց իր պատգամը:
Հայոց լեզւի եւ կրօնի յատուկ դասերի մեծ առաւելութիւնը համատեղելով բոլոր միւս նիւթերի հետ, հայոց ազգայնականութեան ու մեր ժողովրդի դարաւոր գոյատեւման մասին խօսեց Սրբազանը, իւրաքանչիւր աշակերտի փայլուն ապագան գուշակելով, ի պատիւ մեր ազգի. «Միայն Աստւած է իմանում, որ ձեր միջից ինչքա՜ն իմաստուն անձեր են ի յայտ գալու ապագային, որ մեր ազգին պատիւ են բերելու: Մենք մեծ յոյսեր ունենք ձեր վրայ, որ ձեր ամբողջական ոյժերով հետեւէք ուսումնական կեանքին, եւ փայլուն ապագայով աւարտէք այս դպրոցը»,- ասաց Սրբազանը: Նա իր գնահատանքը յայտնեց նաեւ ուսուցչական կազմին եւ յատկապէս տեսչութեան, որ բծախնդիր մօտեցում ունի դպրոցի ուսումնական մակարդակի բարձր պահպանմանը:
Աշակերտութեան հետ մտերմիկ զրոյցից եւ նկարահանման յիշատակելի պահից յետոյ ուսուցիչները բոլորին առաջնորդեցին դասարանները, եւ սկսեցին իրենց դասաւանդութիւններին: Առաջնորդ Սրբազանը տեսչարանին մէջ հանդիպում ունեցաւ տնօրէնութեան կազմին եւ գլխաւոր ուսուցիչների հետ: Տեսչուհին լայն բացատրութիւններ տւեց նոր տարեշրջանի ծրագրերի մասին, յատկապէս նոր ուսուցիչների նշանակման գործընթացը ներկայացնելով: Սրբազան հայրը կրթական կեանքի ուղղութիւնների մասին տեղեկացաւ, եւ իր տեսակէտները յայտնեց տեսչութեան: Այս առիթով Սրբազանը յատուկ նւէրներ յանձնեց տեսչուհուն եւ ուսուցչական կազմի անդամներին:
