Թաւրիզը հրաժեշտ տւեց գիտառի վարպետ Վարդան Սարգսեանին

«ԱԼԻՔ» – Այսօր՝ հոկտեմբերի 20-ին, Թաւրիզի երաժշտական ընտանիքը եւ մշակութային գործիչները հրաժեշտ տւեցին վարպետ Վարդան Սարգսեանին՝ մարդուն, ով իր ողջ կեանքը նւիրեց երաժշտութեանը, սերունդների կրթութեանը եւ մարդկային ազնւութեանը։

Տասնամեակներ շարունակ նրա գիտառի մեղեդիները հնչել են Թաւրիզի խորշերում՝ դառնալով քաղաքի մշակութային դիմագծի անբաժան մասը։

Նա Թաւրիզի արւեստագէտների շրջանակում յայտնի էր որպէս անհատ, ում ներկայութիւնը լուռ, բայց մնայուն հետք թողեց քաղաքի վրայ: Թաւրիզի արւեստի սիրահարները դեռ երկար են յիշելու նրա համերգները, որտեղ լռութիւնը դառնում էր նոյնքան խօսուն, որքան երաժշտութիւնը։ Այսօր, երբ վարպետը առյաւէտ հեռացել է, թւում է՝ նրա գիտառի լարերն էլ լռել են նոյն կերպ։

Թող Վարդան Սարգսեանի հոգին խաղաղ լինի, անունը՝ անմահ Թաւրիզի եւ հայկական երաժշտութեան պատմութեան մէջ։