«ԱԼԻՔ» – Հինգշաբթի՝ նոյեմբերի 6-ին, Թեհրանի Սադաբադի պատկերասրահում իր աշխատանքն սկսեց Հերբերտ Քարիմ Մասիհիի լուսանկարների հերթական ցուցահանդէսը, նւիրւած Իրանի մշակութային ժառանգութեանը, պատմական ճարտարապետութեանը եւ համամարդկային արժէք ներկայացնող հնագոյն կոթողներին:
Նշենք, որ ընթացիկ տարւայ ընթացքում սա արդէն իրանահայ լուսանկարչի գործընկերների մօտ «բարի նախանձ» առաջացնող երրորդ անհատական ցուցահանադէսն է: Առաջինը տեղի է ունեցել Պերսպոլիսի պատմամշակութային արգելոց-թանգարանում, երկրորդը Իրանի ազգային թանգարանում (Պատմութեան թանգարան), եւ երրորդը՝ Սադաբադի պատկերասրահում:
Ցուցահանդէսում ներկայացւած են բացառիկ լուսանկարներ, որոնք պատկերում են երկրի հարուստ պատմութիւնը՝ Չուղազանբիլից մինչեւ Պեսպոլիս, Բամի ամրոցից մինչեւ Եազդի «բադգիրներ» եւ վաղ հեթանոսական ժամանակաշրջանի տաճարներ:
Նշենք, որ ցուցահանդէսի առաջին օրւայ այցելուներից էր նաեւ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանը:
Ցուցահանդէսը բաց կը լինի ամէն օր մինչեւ աբանի 30-ը՝ ժամը 9:00–18:00-ը:
Հասցէ – Դարբանդի հրապարակ, Սադաբադի պատմամշակութային համալիր
