Ատրպատականի առաջնորդարանի շրջափակի տօնածառի լուսաւորումը, եւ «Տաթեւ» պարախմբի Ամանորի երեկոն
Ատրպատական, ազգային առաջնորդարան, Թաւրիզ – Հինգշաբթի 18 դեկտեմբերի 2025-ի երեկոյեան ժամը 8:30-ին, հովանաւորութեամբ եւ ձեռամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի, Ազգային առաջնորդարանի շրջափակի կենտրոնում գտնւող զարդարուն ու բնական տօնածառի ամանորի լոյսերը վառւեցին, մեծ խանդավառութիւն ստեղծելով թաւրիզահայերի մօտ, որոնք համախմբւել էին Կենտրոնականի այգին, «Համազասպ Ոսկանեան» սրահում մասնակից լինելու ՀՕՄ-ի «Տաթեւ» պարախմբի կազմակերպած ամանորի ելոյթին ու ճաշկերոյթին: Լոյսերի վառման առիթով տեղի ունեցաւ նաեւ հրավառութիւն, երբ գոյնզգոյն կրակավառ բոցերով լուսաւորւեցաւ Առաջնորդարանի շրջափակը:
Թեմական եւ Պատգամաւորական ժողովների անդամները, Տ. Մարտիրոս քհնյ. Ղուկասեանը, միութիւնների եւ կազմակերպութիւնների անդամներ ներկայ էին, ինչպէս նաեւ ՀՕՄ-ի վարչութեան անդամները, որոնց կազմակերպութեամբ իրականացւեց օրւայ տօնական ծրագիրը: Ներկայ էին «Տաթեւ» պարախմբի անդամ-անդամուհիները իրենց ծնողներով ու հարազատներով, եւ ելոյթ ունեցան մի քանի ազգային-գաւառական պարերով, որոնք մեծ ուրախութեամբ մատուցեցին թաւրիզահայ մշակութասէր հասարակութեանը:
«Ոսկանեան» սրահի բեմից բարի գալստեան խօսքով բոլոր ներկաներին ջերմօրէն ողջունեց նախ ձմեռ պապին (Առլէն Բադալեան) եւ ձիւնեմարդը (Շարա Բաղդասարեան), որոնք իրենց բարեմաղթանքները ներկայացրին նոր՝ 2026 տարւայ առիթով: «Տաթեւ» պարախմբի վարչական պատասխանատու Նայիրի Դիլանեանը խօսք առնելով, նախ իր երախտագիտութիւնը յայտնեց առաջնորդ Սրբազան Հօր եւ Թեմական խորհրդին, բարերարներին եւ համայնքի բոլոր զաւակներին, որոնք միշտ իրենք քաջալերանքն են արտայայտում պարախմբի ձեռնարկներին: Նա յատկապէս պարախմբի գեղարւեստական ղեկավար Կարինէ Մանուչերեանի մեծ ներդրումը «Տաթեւ» պարախմբի կազմաւորմանն ու զարգացմանը, ինչպէս նաեւ այն երկու պարուսոյցներին՝ Մարիա Գասպարեանին եւ Սեպուհ Անտոնեանին, որոնք խմբի փորձերին իրենց նւիրեալ ծառայութեամբ, խումբը պահպանում են իր բարձրութեան վրայ: Այս առիթով, պարախմբի վարչութիւնը յատուկ նւէրներով իր գնահատանքը յայտնեց բոլոր անդամ-անդամուհիներին, յոյս յայտնելով, որ իրենց ամբողջական մասնակցութեամբ նոր ելոյթներ են ունենալու յառաջիկայ տարւայ ընթացում:
Սրբազան Հայրը իր քաջալերական խօսքը ուղղեց պարախմբի բոլոր պատասխանատուներին եւ պարողներին, որոնք իրենց առօրեայից յատուկ ժամ են տրամադրում, ծաղկուն պահելու համար Թաւրիզը, պարային համոյթներով, եւ հայկական մշակոյթով: Տարւայ ուրախալի ամսւայ ընթացքում, հայրենիքի սահմաններից ներս տեղի ունեցող տխուր իրողութիւններին ակնարկելով, Սրբազանը յոյս յայտնեց, որ Աստծու Որդին այն մուրճով որ հիմնադրեց Սուրբ Էջմիածինը, նոյն մուրճի հարւածը հասցնի, այն խորտակել ուզող չարամիտների գլխին: Տօնական օրերին, Սրբազան հայրը մեր ժողովրդի զաւակներին հրաւիրեց անհատական աղօթքի, որպէսզի Աստծու զօրութեամբ, մեր հայրենիքն ու համայն ժողովուրդը փրկւի չարանենգ ղեկավարութիւնից, եւ ազատ, անկախ, ու իրօք խաղաղ պայմաններում ապրեն մեր հայրենակիցները, իբրեւ դարաւոր արմատներ ունեցող ազգ:
Հանդիսութեան երկրորդ բաժինը յատկացւել էր ընթիքի, որի ընթացքում համայնքային կեանքի մտերմիկ մթնոլորտում զրուցեցին ներկաները, 2026 տարւայ նոր յոյսերով ու ապագայի հայեացքով:
