Ամանորի հաւաք Թաւրիզի հայոց դպրոցում
Ատրպատական, ազգային առաջնորդարան, Թաւրիզ – Շաբաթ, 27 դեկտեմբերի 2025-ի առաւօտեան ժամը 11:00-ին, Թաւրիզի հայոց ազգային «Հայկազեան-Թամարեան-Սահակեան» դպրոցում, նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի եւ հովանաւորութեամբ Թեմական խորհրդի, տեղի ունեցաւ 2026 Նոր տարւայ դիմաւորութեան յատուկ հանդիսութիւնը:
Ամանորի սոյն ծրագրին ներկայ էին Ատրպատականի արեւելեան նահանգի Գ մասի Կրթադաստիարակչութեան տնօրէն՝ Հոսէյնին, գլխաւոր օգնական՝ Սաթարին, գլխաւոր պատասխանատու Շոարը, աւագ դպրոցի պատասխանատու Շիրալին, Փոքրամասնութեան գրասենեակի պատասխանատու Մուսաւին, եւ հայոց դպրոցի նախկին ուսուցիչ՝ Մոհամմադին, պետական հիւրեր եւ Թեմական խորհրդի ներկայացուցիչ անդամներ Վարդան Կարապետեանը եւ Քաթրին Դիլանեանը, ծնողներ եւ ազգային հիւրեր:
Ամանորի սոյն հանդիսութիւնը կազմակերպւել էր դպրոցի տեսչութեան, հոգաբարձութեան, ուսուցչական կազմի եւ ծնողական խորհրդի կողմից, գլխաւորութեամբ տեսչուհի Սիլւա Աշղեանի:
Բացման խօսքով, տեսչուհի Սիլւա Աշղեանը ողջունեց բոլորի ներկայութիւնը եւ Նոր տարւան ջերմագոյն բարի մաղթանքով, սրահում ներկայ բոլոր անձերին բարի գալուստ մաղթեց: Նրա փափագն էր, որ 2026 տարին բարեյաջող լինի, միշտ պետական կրթական կառոյցների բարձր հովանաւորութեամբ, որի համար շնորհակալութիւն յայտնեց տեսչուհին: Ապա, նա հրաւիրեց Կրթադաստիարակչութեան տնօրէն Հոսէյնիին, իր ամանորի խօսքը փոխանցելու:
Մուսուլման կրօնաւորի ջերմ եւ աղօթաբոյր խօսքով, Հոսէյնին շնորհաւորեց համայնքի եւ դպրոցի ամանորը, ողջունեց Սրբազան Հօրը եւ շնորհակալութիւն յայտնեց դպրոցում նրա յաճախակի ներկայութեան եւ Աստծու օրհնութիւնը երեխաներին փոխանցելու համար: Նա իրենց աշխատանքը համեստօրէն ներկայացնելով, մէջբերում կատարեց Ղուրանից, ասելով որ պէտք է սովորել եւ նւիրւել աշխատանքի, ծառայելու համար ժողովրդին:
Առաջնորդ Սրբազանը Ամանորի իր պատգամը յղեց ներկաներին, բանալի բառ յայտարարելով «Յոյս»-ը: Նա շեշտեց, որ անցեալում, նոյն առիթով իր օգտագործած «խաղաղութիւն» բառը, ներկայ աշխարհի պատերազմական սպառնալիքների ժամանակահատւածում օգտագործելը, շատ աղաչական է թւում: Ուստի, բացատրելով յոյսի խորիմաստ զօրութիւնը եւ ապագայատեսիլ հայեացքը, նա յոյս յայտնեց, որ դրա ուժեղ ներկայութեամբ խաղաղելու է աշխարհը եւ դադարելու են պատերազմական ցանկութիւնները: Սրբազանը յատկապէս իր շնորհակալական խօսքը ուղղեց երկրի կրթական կառոյցներին, որոնք հակառակ մեր դպրոցի աշակերտութեան սահմանափակ թւին, ամէն միջոց ի գործ են դնում պահպանելու դրա ուսուցչական կազմը եւ հասնում են դրա կարիքներին:
Աշակերտուհի Մարիամ Վարդանեանը հայերէն եւ պարսկերէն լեզուներով ողջունեց հիւրերին, դպրոցի աշակերտութեան անունից երախտիքի խօսք արտասանելով ե՛ւ Սրբազան Հօրը, ե՛ւ պետական ներկայացուցիչներին, ե՛ւ տեսչութեան ու ուսուցչական կազմին:
Ծրագրի երկրորդ ու վերջին բաժնում,
Ամանորի երաժշտութեամբ համեմւած մթնոլորտում սրահ մուտք գործեց Ձմեռ պապին, որի տարազում ծպտւել էր դպրոցի աշակերտներից Վարդան Գասպարեանը: Նա զւարճացրեց բոլորին, եւ ապա «Տարւայ հիւր»-ից սպասւող բարի պատգամը փոխանցեց բոլոր ներկաներին:
Դպրոցի ծնողական խորհուրդը հիւրասիրութեամբ պատւեց ներկաներին, մինչ ձմեռ պապին ուրախացնում էր բոլորին, կաղանդչէքեր բաժանելով ներկաներին:
