Երկուշաբթի, 29 դեկտեմբերի 2025 թւականին, Ամանորի եւ Ս. Ծննդեան տօների առիթով Թեհրանի Կրթադաստիարակչութեան նախարարութեան 6-րդ շրջանի միջն. օղակի Ուսումնական հարցերով տեղակալ՝ պրն. Էյնին եւ տարր. օղակի Ուսումնական հարցերով տեղակալ՝ պրն. Եադէգարին շնորհաւորական այցելութեամբ, հանդիպում ունեցան ազգային առաջնորդարանում, որտեղ հիւրերին դիմաւորեցին Թեմակալ Առաջնորդի օգնական Հոգշ. Տ. Առաքել աբեղայ Գատեհճեանը, տօնական օրերի առիթով քաղաքս հիւրաբար գտնւող՝ Հոգշ. Տ. Աբրահամ աբեղայ Ճուլֆայեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը եւ նոյն խորհրդի անդամ՝ Հայկ Տէր Մկրտչեանը, Կրթական խորհրդի ատենապետուհի Կարինէ Բալըքճեանը, ազգային առաջնորդարանի դիւանապետ Զօրիկ Կարապետեանը եւ «Արաքս» դպրոցի տեսչուհի Անի Մանուկեանը:
Հոգշ. Տ. Առաքել աբեղայ Գատէհճեանը, Թեմակալ Առաջնորդի ողջոյնները եւ օրհնութիւնը փոխանցելով, շնորհակալութիւն յայտնեց հիւրերին՝ ներկայութեան եւ շնորհաւորանքների համար: Հայր Սուրբը յայտնեց, որ տօնական օրերին պետական այրերի այցելութիւններն ապացուցում են Իրանի ղեկավարութեան կողմից իրանահայ համայնքի նկատմամբ ունեցած սէրն ու յարգանքը եւ դա հետեւանքն է այն փաստի, որ իրանահայ համայնքը միշտ հաւատարիմ է եղել Իրանին եւ աշխատել է բարգաւաճել ու զարգացնել այս երկիրը եւ այնքան է սիրել այս հողը, որ նոյնիսկ իր զաւակներին է նւիրել այս օրհնեալ հողի համար: Նա յաւելեց. «Նոր սերունդի դաստիարակութիւնը մեզանից իւրաքանչիւրի համար նւիրական եւ սուրբ պարտականութիւն է, հետեւաբար Ձեր եւ մեր գործը համատեղ կերպով այս նւիրական աշխատանքն է եւ վստահ ենք, որ համագործակցաբար պիտի կարողանանք մեր դպրոցների մի շարք կարիքները եւ պէտքերը գոյացնել»:
Վարուժ Յովհաննիսեանը Թեմական խորհրդի անունից ողջունելով հիւրերին շնորհակալութիւն յայտնեց այցելութեան համար: Նա իր արտայայտութիւններում գոհունակութեամբ անդրադարձաւ Կրթադաստիարակչութեան նախարարութեան կողմից հայկական դպրոցների նկատմամբ ցուցաբերւած ուշադրութեան եւ ունեցած դրական մօտեցման համար: Կրթական խորհրդի ատենապետուհի Կարինէ Բալըքճեանը նաեւ իր հերթին ողջունելով, մատնանշում ունեցաւ մակապարտէզ-նախակրթարանների եւ դպրոցների համատեղման եւ վերադասաւորման ուղղութեամբ իրականացւող ուսումնասիրութիւններին եւ նշեց, որ նմանօրինակ ծրագրերի գործադրման ընթացքը նոյնպէս կը պահանջի սերտ համագործակցութիւն եւ համատեղ աշխատանք:
Թեհրանի Կրթադաստիարակչութեան 6-րդ շրջանի ներկայացուցիչներն առանձին ելոյթներով բարեմաղթանքներ յայտնեցին Ամանորեայ եւ Ս. Ծննդեան տօնական օրերի առիթով եւ փոխանցեցին Կրթադաստիարակչութեան 6-րդ շրջանի տնօրէն՝ պրն. Մանուչեհր Փարնոյի շնորհաւորանքները` տօնական օրերի առթիւ եւ շուտափոյթ ապաքինում մաղթեցին Թեմակալ Առաջնորդին: Ընթացքում Իրանում կրօնական եւ էթնիկ փոքրամասնութիւնների հազարամեայ խաղաղ գոյակցութիւնն ու ազգային միասնականութիւնը համարւեց Իրանի ազգային ինքնութեան իւրայատկութիւնը եւ նշւեց, որ բոլորիս առաքելութիւնն է կողք կողքի աշխատել եւ նպաստել երկրի առաջընթացին ու զարգացմանը, որի արդիւնաւորման ամենակարեւոր գործօնն է Կրթադաստիարակչական համակարգն ու դպրոցները: Արտայայտութիւններում նաեւ նշեց, որ հայկական դպրոցները միշտ համարւել են գերազանցիկ դպրոցների շարքում, որոնք դերակատար են եղել կրթութեանն առնչւող տարբեր աշխատանքներում, ուստի որեւէ ջանք չի խնայւելու հայկական դպրոցների բարգաւաճման ուղղութեամբ:
Հանդիպման աւարտին, հիւրերին նւիրւեցին «Իրանի հայկական եկեղեցիներ» խորագրով՝ պարսկերէն լեզւով հրատարակւած գիրքը եւ «ارمنیان ایران و نام آوران ارمنی» եւ «کلیسای ارمنی» խորագրով գրքերը:
Նշելի է, որ սոյն հանդիպումից առաջ հիւրերը հանդիպում էին ունեցել նաեւ Իրանի Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի հետ:
Ազգային առաջնորդարանի Հանրային կապ
