Իրանի Իսլ. յեղափոխութեան 46-ամեակը նշւեց Ատրպատականի հայոց թեմի կազմակերպութեամբ ազգային առաջնորդարանի «Համազասպ Ոսկանեան» սրահում
Ատրպատական, ազգային առաջնորդարան, Թաւրիզ – Կիրակի, փետրւարի 9-ի երեկոյեան ժամը 6:30-ին, Ատրպատականի հայոց թեմի Ազգային առաջնորդարանի «Համազասպ Ոսկանեան» սրահում տեղի ունեցաւ Իրանի Իսլամական յեղափոխութեան 46-ամեակին նւիրւած, թեմի գլխաւոր գեղարւեստական ծրագիրը, մասնակցութեամբ թաւրիզահայ կեանքում գործող բոլոր միութիւնների եւ կազմակերպութիւնների եւ կրթական հաստատութիւնների։
Հովանաւորութեամբ եւ նախագահութեամբ Ատրպատականի հայոց թեմի առաջնորդ Տ. Գրիգոր արք. Չիֆթճեանի եւ Թեմական խորհրդի, սոյն ծրագրին յատկապէս ներկայ գտնւեցին պետական բարձրաստիճան հիւրեր՝ նահանգապետի ներկայացուցիչը, կուսակալը, քաղաքապետը, փոքրամասնութեան պատասխանատուն, Թեհրանից ժամանած Իրանի Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը, ինչպէս նաեւ հայ նահատակների ընտանեկան պարագաները եւ ազատորդիները:
Հանդիսավար Կարօ Ջորջեանը կատարեց բացման խօսքը: Թեմական խորհրդի խօսքը ներկայացրեց ատենապետ Գագիկ Ջորջեանը, շնորհակալութիւն յայտնելով Ատրպատականի բոլոր պետական կառոյցներին, որոնք միշտ զօրավիգ են կանգնում ազգային առաջնորդարանի գործունէութեանը: Նա կարեւորութեամբ նշեց թեմի առաջնորդ Սրբազան Հօրը նորագոյն դասախօսութիւնը Թեհրանում, բազմահազար տեղացի ունկնդիրների ներկայութեամբ, կրօնական եւ քաղաքական նիւթերի քննարկումներով: Վերջապէս նա Թեմական խորհրդի անունից երախտագիտութիւն յայտնեց փոքրամասնութիւնների գրասենեակի պատասխանատուներին, որոնք միշտ օժանդակում են ազգային առաջնորդարանի աշխատանքներին:
Բեմ հրաւիրւեց առաջնորդ Սրբազան Հայրը, որը թուրքերէն լեզւով ողջունելով բոլոր հիւրերին, վեր հանեց օրւայ հաւաքին կարեւոր նշանակութիւնը: Նա շեշտեց նահատակների յաւերժական ոգին վառ պահելու եւ նրանց զոհաբերութեան պատգամի՝ հայրենիքի նկատմամբ միասնական ուժ ցուցաբերելու անհրաժեշտութիւնը, յատկապէս ներկայ դժւարին ժամանակներին: Սրբազան հօր պատգամը պարսկերէնով ընթերցեց Ալէն Սայեադեանը:
Օրւայ գլխաւոր պատգամաբերն էր նահանգապետի քաղաքական եւ անվտանգութեան տեղակալ դոկտ. Մոհամմեդզադէ: Նա առաջին հերթին շնորհակալութիւն յայտնեց առաջնորդ Սրբազան Հօրը, որ ե՛ւ երկրում ե՛ւ արտասահմանում միշտ զօրավիգ է արդարութեան: Երկրի բոլոր քաղաքացիների միջեւ հաւասարութեան շուրջ դրական արտայայտւելով, բանախօսը շեշտեց փոքրամասնութիւնների քաղաքացիական լիիրաւ տեղը, օրինական հասարակաց իրաւունքներով եւ յարգւած օրէնքներով:
Պատգամաւոր Արա Շահվերդեանը ողջունեց ներկաներին եւ շնորհաւորելով բոլորի Յեղափոխութեան տօնը, անդրադարձաւ Իսլամական խորհրդարանի ու կանոնագրութեան, բացատրելով որ Յեղափոխութիւնը ժողովրդավար կարգերի եւ արդարութեան օրէնքները ընծայեց հասարակութեան:
Ծրագրի ընթացքում ելոյթ ունեցաւ «Կոմիտաս» երգչախումբը, ղեկավարութեամբ երաժիշտ Վարդան Վահրամեանի, ուղերձներ կարդացին Մոնթէ Դիլանեանը եւ Արաքս Առաքելեանը: Նահատակ ընտանիքի նոր սերնդի զաւակ՝ փոքրիկ Նարէ Բուդաղեանը խօսք ընթերցեց, իսկ գեղարւեստական բաժնում, երգի մատուցմամբ բացառիկ ելոյթով հանդէս եկաւ Դէյւիդ Գալստեանը, երգեհոնի ընկերակցութեամբ Կարէն Սարգսեանի, ի յիշատակ իր նոր հանգուցեալ հօր՝ դոկտ. Յովիկ Գալստեանի, որը միշտ պանծացնում էր հայոց բեմերը նման հանդիսաւոր առիթներով: Այս առիթով, Դէյւիդին յանձնւեցին իր հօր մեծադիր լուսանկարները, անցեալ տարւայ ելոյթից:
Աւարտին պետական հիւրերի գլխաւորները բեմ հրաւիրւեցին եւ առաջնորդ Սրբազան Հօր հետ միասին մեծարեցին հանգուցեալ դոկտ. Յովիկի անմեռ յիշատակը եւ յուշանւէրով պատւեցին Փոքրամասնութեան գրասենեակի պատասխանատու՝ Մուսաւիին:
Յաջորդ առաւօտ, Թաւրիզում եւ Ուրմիայում, Ատրպատականի հայոց թեմի զաւակները իրենց մասնակցութիւնը բերեցին 22 Բահմանի Յաղթանակի քայլարշաւին առաւօտեան ժամը 11-ից սկսեալ: Ազգային առաջնորդարանից՝ Թաւրիզում, իսկ Ուրմիայում, Ս. Ստեփանոս ծխական եկեղեցու շրջափակից դուրս գալով, հայ համայնքի զաւակները միացան իրենց իրանցի իսլամ եղբայրներին ու քոյրերին, իրենց զօրակցութիւնը յայտնելու ԻԻՀ յեղափոխութեանը, որը իր 46-րդ տարին թեւակոխեց: Թաւրիզում կայացած քայլարշաւի աւարտին, ազգային առաջնորդարանի «Համազասպ Ոսկանեան» սրահի տնօրինութիւնը թէյասեղանով պատւեց հայ համայնքի այն զաւակներին, որոնք մասնակցել էին սոյն քայլարշաւին:
