Չորեքշաբթի, փետրւարի 4-ի երեկոյեան, Սպահանի հայոց թեմի առաջնորդական տեղապահ Տ. Արտաւազդ վրդ. Շարոյեանը ճանաչողական այցելութեամբ մեկնեց Շահինշահր եւ հանդիպումներ ունեցաւ համայնքային տարբեր կառոյցների ներկայացուցիչների հետ։ Հայր Սուրբին ընկերակցում էին Կրօնական խորհրդի ատենապետ Զաւէն Սիմոնեանը, Թեմական խորհրդի անդամ եւ Շահինշահրի Հայ համայնքի վարչութեան հետ կապ Տարօն Տէր-Մարտիրոսեանը, ինչպէս նաեւ համայնքի հոգեւոր հովիւ Տէր Սահակ քհնյ. Մինասեանը:
Առաջին հանդիպումը կայացաւ Շահինշահրի Հայ համայնքի վարչութեան հետ։ Հանդիպման մեկնարկին վարչութեան ատենապետ Ջանիկ Թահմազեանը ողջունելով հիւրերին եւ բարի գալուստ մաղթելով Հայր Սուրբին, ընդհանուր գծերով ներկայացրեց Շահինշահրի հայ համայնքի պատմութիւնը, վարչութեան գործունէութիւնը, իրականացւած աշխատանքներն ու առաջիկայ ծրագրերը։ Նա անդրադարձաւ նաեւ համայնքի առջեւ ծառացած դժւարութիւններին: Պրն. Թահմազեանն իր յատուկ շնորհակալութիւնը յայտնեց Ազգային մարմիններին՝ ի մասնաւորի Թեմական խորհրդին, շարունակական համագործակցութեան եւ աջակցութեան համար:
Արտայայտւեցին նաեւ Թեմական եւ Կրօնական խորհրդների ներկայացուցիչները՝ բարձր գնահատելով վարչութեան իրականացրած աշխատանքները:
Այնուհետեւ հանդիպում տեղի ունեցաւ Շահինշահրի Հայ կանանց եկեղեցասիրաց միութեան անդամուհիների հետ։ Միութեան նախագահ Անահիտ Մկրտչեանը ներկայացրեց յիսնամեայ կառոյցի գործունէութիւնը, այդ թւում՝ եկեղեցական ծիսակատարութիւններին նրանց աշխոյժ մասնակցութիւնը եւ իրագործւող բարեգործական ծրագրերը։ Նա վերջում յատուկ շնորհակալութիւն յայտնեց Կրօնական խորհրդին, համայնքի քահանային եւ բոլոր աջակիցներին՝ միութեան կողքին լինելու համար։
Յաջորդիւ հանդիպում կայացաւ Փերիոյ Կրթասիրաց միութեան Շահինշահրի մասնաճիւղի վարչութեան անդամների հետ, որին մասնակցում էին նաեւ միութեան մի շարք անդամներ։ Վարչութեան նախագահ Ջանիկ Թահմազեանը եւ անդամ Մարիթա Քեշիշեանը ներկայացրին մասնաճիւղի հիմնադրման նպատակներն ու անցած ուղին՝ նշելով, որ թէեւ պայմանների բերումով միութեան աշխատանքի բնոյթը որոշ չափով փոխւել է, սակայն նրանք շարունակում են իրենց մասնակցութիւնը համայնքային կեանքում։
Վերջում պատւիրակութեան անդամներն այցելեցին Նոր Ջուղայի Հայ Մ. Մ. «Արարատ» միութեան Շահինշահրի մասնաճիւղի կենտրոնատեղի, որտեղ նրանց դիմաւորեցին մասնաճիւղի վարչութեան անձնակազմը՝ նախագահութեամբ Գեւիկ Խաչատրեանի:
Խումբը նախ շրջայց կատարեց միութեան տարբեր բաժիններ՝ ծանօթանալով գրասենեակների եւ սրահների գործունէութեան հետ, այնուհետեւ այցելեց նոյն շէնքում գտնւող Հայ Դատի գրասենեակ, որտեղ Շահինշահրի Հայ Դատի յանձնախմբի ներկայացուցիչ Էմմա Օրդուբէգեանը ներկայացրեց կառոյցի գործունէութիւնն ու ընթացիկ ծրագրերը։
Ապա տեղի ունեցաւ միասնական հանդիպում «Արարատ» միութեան Շահինշահրի մասնաճիւղի վարչութեան անդամների եւ Հայ Դատի յանձնախմբի ներկայացուցիչների մասնակցութեամբ, որտեղ խորհրդակցութիւն ծաւալւեց առկայ դժւարութիւնների յաղթահարման եւ ապագայ ծրագրերի շուրջ։ Երկու կառոյցների ներկայացուցիչները յոյս յայտնեցին, որ աւելի յաճախակի են դառնալու Հայր Սուրբի եւ ազգային մարմինների հետ հանդիպումները։
Տ. Արտաւազդ վրդ. Շարոյեանը վերոնշեալ բոլոր հանդիպումների աւարտին, նախ իր ուրախութիւնը յայտնեց Սպահանի հայոց թեմ ժամանելու առիթով, ապա բարձր գնահատեց նշեալ կառոյցների միջոցով ծաւալւող աշխատանքները՝ ընդգծելով, որ համայնքի աշխուժութիւնը մեծապէս պայմանաւորւած է նրանց գործունէութեան ու նւիրումի հետ։ Հայր Սուրբը նշելով, թէ անկախ համայնքի թւաքանակից, իրականացւում է որակեալ աշխատանք, կոչ արեց բոլորին նոյն ոգով եւ հաստատակամութեամբ շարունակել իրենց ծառայութիւնը ժողովրդին։
Հանդիպումները անցան ջերմ եւ կառուցողական մթնոլորտում՝ միտւած համայնքային կեանքի ամրապնդմանը, համագործակցութեան խորացմանը եւ ազգային-եկեղեցական կեանքին ծառայելու շարունակականութեանը։
Թղթակից (Նոր Ջուղա)
