Հայրապետական մաղթանք Ատրպատականի հայոց թեմում Ն.Ս.Օ.Տ.Տ. Արամ Ա. Կաթողիկոսի օծման 31-ամեակի առթիւ

Ատրպատական, ազգային առաջնորդարան, Թաւրիզ – Կիրակի, յունիսի 28-ին, Ատրպատականի հայոց թեմի եկեղեցիներում մատուցւած Սուրբ եւ Անմահ Պատարագի ընթացքում հանդիսաւորապէս նշւեց, Մեծի Տանն Կիլիկիոյ Կաթողիկոս Նորին Սուրբ օծութիւն Տ. Տ. Արամ Ա. Վեհափառ Հայրապետի կաթողիկոսական ընտրութեան եւ օծման 31-րդ տարեդարձը, «Հայրապետական մաղթանք»-ով։

Թաւրիզում, Լիլաւա հայաշատ թաղամասի Ս. Սարգիս եկեղեցում այս առիթով հանդիսաւոր Սուրբ Պատարագ մատոյց եւ իր պատգամը յղեց Տ. Գրիգոր արք. Չիֆթճեան, առաջնորդ Ատրպատականի հայոց թեմի։

Տէրունական աղօթքից առաջ, պատարագիչ առաջնորդ Սրբազան հայրը նախագահեց խորանի բեմում, «Մաղթանք Հայրապետական»-ի արարողութեանը: «Ուրախ լեր» շարականի երգեցողութեան պահին, բարեշնորհ Սեւան սրկ. Ենովքեանի միջոցով Սուրբ խորանին խնկարկութիւն կատարւեց:

Առաջնորդ Սրբազան հայրը աղօթքների եւ աւետարանական հատւածի ընթերցումը կատարեց եւ ապա տւեց իր պատգամը: Օրւայ աւետարանական հատւածը մեկնաբանելուց յետոյ, նա վեր հանեց Մեծի Տանն Կիլիկիոյ Կաթողիկոսական Ս. Աթոռի կարեւոր դերակատարութիւնը, յատկապէս սփիւռքահայութեան մեր կեանքում, հայապահպանութեան դժւարին պայմաններում:

Վերլուծական անդրադարձ կատարելով մեր ազգի եւ հայրենիքի կեանքի ճգնաժամին, նա շեշտեց, որ եկեղեցին իր կարեւոր խօսքը եւ դերակատարութիւնն ունի. «Ներկայ դրութիւնը մեր ազգային-հայրենական կեանքում, ինչպիսի բարեզարդման ու զարգացման վիճակում էլ լինի, տխուր մի երես ունի, որը մեր, շուրջ երկու հազարամեայ եկեղեցուն հասցըւած անբացատրելի հալածանքին է վերաբերւում: Եկեղեցին Աստծու տունը լինելուց բացի, մեր հաւատքի տունն է, բոլոր հայերիս ծննդավայրը: Դրան վնասելը, դրա հոգեւորական դասի դէմ առնւած քայլերը, ամենափոքր սպասաւորից մինչեւ ամենաբարձր դիրքում գտնւողը, հայ ազգի մէջքին տրւած հարւած է, որի մասնագիտութիւնը, ցարդ միայն մեր թշնամիներն են ունեցել: Պատմութեան էջերում յիշատակւող դառն օրերին, երբ կորցրել ենք մեր թագաւորութիւններից այս կամ այն, երբ քաղաքական ղեկավարութիւն չենք ունեցել, մեր ազգին ու հայրենիքին տիրութիւն անողն է եղել մեր եկեղեցին: Յարգանքն ու երախտագիտութիւնը այս հոգեւոր կառոյցի նկատմամբ, անդրանցնում է որեւէ քաղաքական յաղթանակը, որը ընդհանրապէս ժամանակաւոր է եղել, դրան իրականացրած ղեկավարների անկումով, կամ արձանագրած յետագայ ձախորդութիւններով»: Ապա Սրբազանը լայնօրէն խօսեց Արամ Ա. Վեհափառ Հայրապետի աւելի քան երեսնամեայ ծառայութեամբ ցարդ իրականացւած մեծ յաջողութիւններին, ազգային եւ միջազգային մակարդակների վրայ. «Պատմութիւնից առաջ մենք ենք վկայելու մեր տեսածի եւ զգացածի մասին, ինչը իրականացրել է Արամ Վեհափառը վերջին երեսուն եւ մէկ տարիներին: Ազգային, միջազգային, եկեղեցական, մշակութային, միութենական, քաղաքական եւ այլ բնագաւառներում Արամ Ա. Վեհափառի ներդրումը անուրանալի է պատմութեան ակնոցով դիտւած: Սերունդներ ո°չ միայն յիշելու են, այլեւ վայելելու այն բարիքները, որոնք Վեհափառ Հայրապետը իրագործեց իր Կաթողիկոսական օծումից մինչեւ այս օրը: Թող Աստծու երկնային շնորհքով ընդերկար գահակալի մեր Հայոց Հայրապետը եւ շարունակի օրհնել մեր ազգին, Աստծու բարիքները առատացնելով բոլորիս վրայ»,- եզրակացրեց Սրբազանը:

Արարողութեան աւարտին երգւեց «Կիլիկիա»-ն, որին միացաւ նաեւ ներկայ ժողովուրդը:

Ուրմիայի Ս. Ստեփանոս եկեղեցում եւս, Սուրբ Պատարագի ընթացքին տեղի ունեցաւ նոյն «Հայրապետական մաղթանք»-ը: Օրւայ պատարագիչ՝ Հոգեւոր հովիւ Տ. Մարտիրոս քհնյ. Ղուկասեանը կատարեց այն, նոյն առիթով խօսելով յաւուր պատշաճի քարոզ:

Ատրպատականի Թաւրիզ եւ Ուրմիա զոյգ քաղաքների եկեղեցիներում տեղի ունեցած արարողութիւնների ընթացքում հաւատացեալներ աղօթեցին Նորին Սրբութեան կենաց առողջութեան եւ բազմաբեղուն գահակալութեան համար: