«ԱԼԻՔ» – Հանդիսաւոր միջոցառման ընթացքում անդրադարձ կատարւեց կազմակերպութեան առջեւ ծառացած մարտահրաւէրներին, վերականգնման աշխատանքներին, գնահատւեցին նւիրեալներն ու բասկետբոլի խմբի մարզական յաջողութիւնները, իսկ երեկոն եզրափակւեց գեղարւեստական ծրագրով։
Հինգշաբթի, յուլիսի 16-ին, Հ.Մ.Ա.Կ.-ի «Արարատ» մարզաւանի Այգեստանում տեղի ունեցաւ Հ.Մ. «Արարատ»-ի հիմնադրման 82-ամեակին նւիրւած տօնական հանդիսութիւնը՝ ազգային, համայնքային եւ պետական շրջանակների ներկայացուցիչների մասնակցութեամբ։
Միջոցառմանը ներկայ էին Իրանի Իսլամական խորհրդարանում իրանահայութեան զոյգ պատգամաւորները, ՀՅԴ Բիւրոյի անդամը, Թեհրանի հայոց թեմի Պատգամաւորական ժողովի ատենապետը, Թեմական խորհրդի ներկայացուցիչը, «ԱԼԻՔ» հաստատութեան ներկայացուցիչը, Իրանում Հայաստանի Հանրապետութեան դեսպանութեան դեսպանատան մշակութային հարցերով պատասխանատուն, ինչպէս նաեւ ազգային մարմինների, միութիւնների եւ կազմակերպութիւնների ներկայացուցիչներ։
Հանդիսութիւնը բացւեց Հ.Մ.Ա.Կ.-ի Կենտրոնական վարչութեան նախագահ Հենրիկ Խալոյեանի ողջոյնի խօսքով։ Շնորհաւորելով կազմակերպութեան 82-ամեակը՝ նա «Արարատ»-ը բնորոշեց որպէս Սփիւռքում եզակի եւ իր տեսակով աննախադէպ կառոյց՝ ընդգծելով, որ այն տասնամեակներ շարունակ հանդիսացել է համայնքային կեանքի, ազգային ինքնութեան եւ սերունդների դաստիարակութեան առանցքային կենտրոն։
Խալոյեանն անդրադարձաւ նաեւ կազմակերպութեան առջեւ տարբեր ժամանակաշրջաններում ծառացած մարտահրաւէրներին՝ յատկապէս վերջին մէկ տարւայ ընթացքում Իրանում տեղի ունեցած 12-օրեայ եւ 40-օրեայ պատերազմների հետեւանքով «Արարատ» մարզաւանի կրած վնասներին։ Նրա խօսքով՝ կազմակերպութիւնը ստիպւած է եղել իր հիմնական միջոցներն ու կարողութիւնները կենտրոնացնել վնասւած ենթակառուցւածքների, մասնաւորապէս թենիսի բաժնի շէնքի վերակառուցման աշխատանքների վրայ։
Կենտրոնական վարչութեան նախագահը նաեւ տեղեկացրեց, որ Իրանի Իսլամական խորհրդարանի պատգամաւոր Արա Շահվերդեանի ջանքերով յաջողւել է էականօրէն նւազեցնել մարզաւանի կոյուղու համակարգի հետ կապւած շուրջ 30 միլիարդ թումանի վճարման պարտադիր ծանուցագրով նախատեսւած գումարը՝ այն հասցնելով 20 միլիարդի, ինչպէս նաեւ ապահովել դրա մի քանի տարւայ ապառիկ մարման հնարաւորութիւնը։ Խալոյեանը, գնահատելով պատգամաւորի ներդրումը, նրան յանձնեց Հ.Մ.Ա.Կ.-ի յատուկ շնորհակալագիր-գնահատագիրը։
Իր հերթին, Արա Շահվերդեանը շնորհաւորեց կազմակերպութեան 82-ամեակը՝ ընդգծելով «Արարատ»-ի բացառիկ դերը իրանահայ համայնքի համախմբման, ազգային արժէքների պահպանման եւ երիտասարդ սերնդի դաստիարակութեան գործում։
Միջոցառման ընթացքում, պատգամաւորի ներկայութեամբ, գնահատագրեր յանձնւեցին Հ.Մ.Ա.Կ.-ի տարբեր մասնաճիւղերի պատասխանատուներին, պատերազմի օրերին նւիրումով իրենց աշխատանքը շարունակած պաշտօնեաներին, ինչպէս նաեւ «Արարատ»-ի բասկետբոլի խմբին՝ վերջին շրջանի ձեռքբերումների եւ Թեհրանի լիգայում արձանագրած յաջող ելոյթների համար։
Պաշտօնական բաժնից յետոյ Կենտրոնական վարչութեան ներկայ եւ նախկին անդամների մասնակցութեամբ կտրւեց կազմակերպութեան 82-ամեակը խորհրդանշող յոբելենական տորթը։
Գեղարւեստական ծրագրի շրջանակում ելոյթ ունեցաւ «Արարատ» պարախումբը, որի շուրջպարին միացան նաեւ հանդիսութեան մասնակիցները։ Այնուհետեւ բեմ բարձրացաւ երիտասարդ երաժիշտներից կազմւած «Ռէակտոր» ռոք խումբը՝ ներկայացնելով հեղինակային ստեղծագործութիւններ։ Երեկոն եզրափակւեց «Արարատ» երգչախմբի անակնկալ ֆլեշմոբ-կատարումով, որն ստեղծեց տօնական եւ ջերմ մթնոլորտ։
Միջոցառման հաղորդավարն էր Մելան Սէյֆեանը։
Լուսանկարները՝ ՀԱՏԻՍԻ
