Սպահանի հայոց թեմի 18-րդ նստաշրջանի Պատգամաւորական ժողովի 3-րդ հաշւետու նիստի բացումը տեղի ունեցաւ հինգշաբթի եւ ուրբաթ յուլիսի 23 եւ 24-ին, Նոր Ջուղայի Հայ Մ. Մ. «Արարատ» միութեան սրահում, մասնակցութեամբ՝ Սպահանի հայոց թեմի առաջնորդական տեղապահ Տ. Արտաւազդ վրդ. Շարոյեանի, Իրանի Իսլ. խորհրդարանում Սպահանի եւ հարաւային իրանահայութեան պատգամաւոր դոկտ. Գեղարդ Մանսուրեանի, Նոր Ջուղայի, Շահինշահրի, Շիրազի եւ Փերիոյ շրջանի պատգամաւորների, հոգեւոր դասի ներկայացուցիչների, ինչպէս նաեւ Հաշւեքննիչ մարմնի, Թեմական ու Կրօնական խորհուրդների, ենթամարմինների ներկայացուցիչների եւ ժողովի կողմից հրաւիրեալ ազգայինների։
Նիստը բացւած յայտարարւեց թեմի առաջնորդական տեղապահ Հայր Սուրբի աղօթքով եւ Պատգամաւորական ժողովի ատենապետ Նոէլ Մինասեանի խօսքով: Ատենապետն իր արտայայտութեան աւարտին ժողովին հրաւիրեց մէկ րոպէ յոտնկայս լռութեամբ յարգել անցնող մէկ տարւայ ընթացքում տեղի ունեցած պատերազմական գործողութիւնների պատճառով զոհւած բոլոր նահատակների, յատկապէս նորջուղայեցի հայ նահատակի յիշատակին։
Այնուհետեւ խորհրդարանի պատգամաւոր պրն. Մանսուրեանն իր խօսքն ուղղեց ժողովականներին, որտեղ անդրադառնալով երկրում տիրող պատերազմական վիճակին, ընդգծեց մի շարք կարեւոր խնդիրներ՝ ազգային մարմինների օրակարգում ներառւելու համար։
Յաջորդիւ օրակարգի համապատասխան գլուխների ներքոյ Պատգամաւորական ժողովի Դիւանի, Թեմական ու Կրօնական խորհուրդների եւ Հաշւեքննիչ մարմնի զեկոյցների շուրջ տեղի ունեցան հարց ու պատասխաններ եւ հնչեցին ըստ էութեան արտայայտութիւններ գործադիր մարմինների աշխատանքի վերաբերեալ, որոնց արդիւնքում բարձր գնահատւեց նշւած զոյգ մարմինների գործունէութիւնը՝ ի մասնաւորի Թեմական խորհրդի ծաւալուն աշխատանքները կալւածների գործառոյթների բարեկարգման ու փոփոխութեան, իսկ Կրօնական խորհրդի նախաձեռնածը հոգեւոր կեանքի սահուն ընթացքը պահպանելու ուղղութեամբ։ Ժողովականները նաեւ յայտնեցին իրենց տեսակէտներն ու առաջարկները ազգային մարմինների աշխատանքների վերելքի կապակցութեամբ. բոլոր առաջարկները առ ի ուսումնասիրութիւն փոխանցւելու են պատկան յանձնաժողովներին։
Այնուհետեւ տեղի ունեցան Թեմական եւ կրօնական խորհուրդների ընտրութիւնները, իսկ հրաւիրեալ ազգայինների ընտրութեան կէտի ներքոյ միաձայնութեամբ որոշւեց վերընտրել նախկին միամեայ շրջանի հրաւիրեալ անձանց՝ Արբի Բաբայեանին, Վրէժ Տէր-Մարտիրոսեանին, Սարօ Պօղոսեանին եւ դկտր. Սիլւա Յովսէփեանին։
Հաշւետու նիստն աւարտւեց ուրբաթ երեկոյեան՝ Տ. Արտաւազդ վրդ. Շարոյեանի արտայայտոթեամբ եւ աղօթքով։
Ստորեւ ներկայացնում ենք նորընտիր Թեմական եւ Կրօնական խորհուրդների անձնակազմերը։ Նշելի է, որ Թեմական խորհուրդը կիրակի՝ յուլիսի 26-ին, իսկ Կրօնական խորհուդը կիրակի` օգոստոսի 9-ի երեկոյեան Պատգամաւորական ժողովի Դիւանի հրաւէրով եւ ներկայութեամբ գումարեցին իրենց անդրանիկ նիստերը, ուր կատարեցին կազմերի պարտականութիւնների բաժանումը։
Թեմական խորհուրդ՝
Պրն. Աշոտ Դաւթեան՝ ատենապետ
Պրն. Տարօն Տէր-Մարտիրոսեան՝ փոխ-ատենապետ
Տկն. Քարոլին Դիլանչեան՝ Ա. ատենադպիր
Տկն. Սաթօ Աւետումեան՝ Բ. ատենադպիր
Պրն. Նապիկ Մելիքեան՝ գանձապահ
Պրն. Սերժիկ Պարսամեան՝ գոյքապահ
Պրն. Վրթանէս Մկրտչեան՝ վերահսկիչ հաշւապահ
Կրօնական խորհուրդ՝
Պրն. Վարուժ Մովսիսեան՝ ատենապետ
Արժ. Տ. Մեսրոպ աւ. քհնյ. Գալստանեան՝ փոխատենապետ
Տկն. Մարիետ Աբէլեան՝ ատենադպիր
Պրն. Գուրգէն Թահմազեան՝ գանձապահ եւ գոյքապահ
Արժ. Տ. Խաչատուր քհնյ. Զարգարեան՝ խորհրդատու
ՍՊԱՀԱՆԻ ՀԱՅՈՑ ԹԵՄԻ
ՊԱՏԳԱՄԱՒՈՐԱԿԱՆ ԺՈՂՈՎԻ ԴԻՒԱՆ
