Թեհրանի հայոց թեմի Թեմական խորհուրդը խոր վշտով սգում է երկարամեայ նւիրեալ ազգային-հասարակական գործիչ, ճարտարապետ եւ հայկական պատմական ժառանգութեան պահպանման ու վերականգնման նւիրեալ Վարուժան Առաքելեանի մահը՝ յարգանքի տուրք մատուցելով նրա ծառայութեանն ու արժանաւոր վաստակին։
Վարուժան Առաքելեանը տասնամեակներ շարունակ իր գործունէութեամբ ու նւիրումով ծառայեց ազգային եւ համայնքային կեանքին՝ իր կեանքի կարեւորագոյն տարիները կապելով մեր ժողովրդի եւ ազգային կառոյցների հետ։ Նրա գործունէութիւնն աչքի էր ընկնում պատասխանատւութեան բարձր զգացումով եւ համայնքի հանդէպ անկեղծ նւիրումով։
Որպէս ճարտարապետ՝ նա առանձնայատուկ ուշադրութիւն էր դարձնում հայկական պատմական եւ մշակութային ժառանգութեան պահպանմանն ու արժեւորմանը՝ իր մասնագիտական գիտելիքներն ու փորձառութիւնը ներդնելով պատմական յուշարձանների պահպանութեան եւ վերականգնման աշխատանքներում։ Նրա մասնագիտական գործունէութեան կարեւորագոյն ուղղութիւններից էր Ատրպատականի հայկական վանքերի եւ պատմական յուշարձանների պահպանութեանն ու վերականգնմանն ուղղւած շուրջ յիսունամեայ աշխատանքը։ Այդ գործունէութեան նշանակալի դրսեւորումներից էր Ծոր-Ծորի Սուրբ Աստւածածին եկեղեցու փրկութեան եւ նոր վայրում վերակառուցման ծրագիրը, որի իրականացման գործում նա ներդրեց իր մասնագիտական գիտելիքներն ու անձնական ջանքերը։ Այս աշխատանքներով նա իր արժանի ներդրումն ունեցաւ հայկական մշակութային ժառանգութեան պահպանման գործում։
Վարուժան Առաքելեանի ազգային ծառայութեան կարեւոր հանգրւաններից էր Թեհրանի հայոց թեմի Թեմական խորհրդի ատենապետի պաշտօնում նրա գործունէութիւնը։ 1996–1998 թւականներին ստանձնելով Թեմական խորհրդի ատենապետի պատասխանատու պաշտօնը՝ նա իր փորձառութեամբ, նւիրումով եւ պատասխանատու մօտեցմամբ իր ներդրումն ունեցաւ Թեմի համայնքային աշխատանքների կազմակերպման եւ զարգացման գործում։ Տարբեր տարիների ազգային կառոյցներում ստանձնած պատասխանատւութիւններով եւս նա իր մասնակցութիւնը բերեց համայնքային աշխատանքների շարունակականութեանը՝ կարեւորելով ազգային կառոյցների գործունէութիւնն ու համատեղ աշխատանքի նշանակութիւնը։
Հայկական պատմական ժառանգութեան պահպանման ուղղութեամբ նրա գործունէութեան կարեւոր հանգրւաններից էր նաեւ 1997 թւականին իրանահայ երեք թեմերի նախաձեռնութեամբ ստեղծւած հայկական յուշարձանների պահպանման յանձնախմբի աշխատանքը, որի ատենապետի պաշտօնը նա վարեց մինչեւ 2008 թւականը։ Իրանի մշակութային ժառանգութեան պահպանութեան պատասխանատու կառոյցների եւ միջազգային մասնագէտների հետ համագործակցութեամբ նա նպաստեց հայկական յուշարձանների պահպանութեան ու արժեւորման աշխատանքների առաջմղմանը։
Վարուժան Առաքելեանի ազգային եւ մասնագիտական վաստակին զուգահեռ յատկանշական էին նաեւ նրա մարդկային արժանիքները։ Համեստութիւնը, ազնւութիւնը, հոգատարութիւնը, համբերատարութիւնն ու պարտաճանաչութիւնը նրան դարձնում էին սիրելի եւ յարգւած անձնաւորութիւն։ Դժւարութիւնների առջեւ չընկրկելու կամքը, համագործակցելու կարողութիւնը եւ շրջապատի նկատմամբ յարգալից ու բարեացակամ վերաբերմունքը նրան դարձնում էին վստահելի գործընկեր եւ արժանահաւատ գործիչ՝ միաժամանակ պահպանելով մարդկային պարզութիւնն ու ներքին արժանապատւութիւնը։
Նրա անցած ճանապարհը վկայում է, որ ազգային ծառայութիւնը նրա համար երկարամեայ եւ գիտակից նւիրում էր։ Իր մասնագիտական գործունէութեամբ եւ ազգային կառոյցներում ունեցած ներդրումով նա արժանի տեղ գրաւեց Թեհրանահայ համայնքի կեանքում եւ հայկական պատմական ժառանգութեան պահպանման գործում։ Նրա վաստակն ու յիշատակը կը շարունակեն ապրել համայնքի պատմութեան մէջ։
Թեմական խորհուրդը խորապէս կիսում է Վարուժան Առաքելեանի ընտանիքի, հարազատների եւ բարեկամների վիշտը՝ իր յարգանքի տուրքը մատուցելով նրա պայծառ յիշատակին։
Յարգանք նրա անմոռաց յիշատակին եւ բեղուն վաստակին։
Թ.Հ.Թ. ԹԵՄԱԿԱՆ ԽՈՐՀՈՒՐԴ
12.10.2026
