Սպահանի Հայոց թեմի Թեմական խորհուրդը, իր ծանօթացման հանդիպումների շրջանակում, հանդիպումներ ունեցաւ Նոր Ջուղայի համայնքի միութիւնների՝ Նոր Ջուղայի Հայ Մարզամշակութային «Արարատ» միութեան, Նոր Ջուղայի Հայ Կանանց Գթութեան միութեան, Նոր Ջուղայի Հայուհեաց Բարեգործական ընկերութեան, Փերիոյ Կրթասիրաց միութեան եւ Հայ Ուսումնասիրաց Չհարմահալ միութեան վարչութիւնների հետ։
Հանդիպումների ընթացքում, փոխադարձ ծանօթացումից եւ սերտ յարաբերութիւնների շարունակման կարեւորութեան ընդգծումից բացի, միութիւնների ներկայացուցիչները ներկայացրին իրենց գործունէութիւնը, իրականացրած աշխատանքներն ու ծրագրերը, ինչպէս նաեւ անդրադարձան առկայ դժւարութիւններին եւ մտահոգութիւններին։ Թեմական խորհուրդն իր հերթին պատրաստակամութիւն յայտնեց՝ իր հնարաւորութիւնների սահմաններում աջակցելու միութիւններին եւ նպաստելու նրանց գործունէութեան աշխուժացմանն ու զարգացմանը։
Քննարկումների ընթացքում Թեմական խորհուրդը կարեւորեց միութիւնների՝ իրենց կանոնադրութիւնների եւ ստանձնած առաքելութեան համաձայն առաջնորդւելու անհրաժեշտութիւնը։ Միաժամանակ, շեշտեց միութիւնների միջեւ համագործակցութեան ընդլայնման, համատեղ ծրագրերի իրականացման եւ առկայ մարդկային ներուժի արդիւնաւէտ օգտագործման կարեւորութիւնը՝ հաշւի առնելով համայնքում առկայ մարդուժի սահմանափակ հնարաւորութիւնները։
Թեմական խորհուրդը, կարեւորելով համայնքի միութիւնների դերակատարութիւնը ազգային, կրթական, մշակութային, մարզական եւ բարեսիրական կեանքում, շեշտեց նրանց աշխուժացման եւ առաքելութեան վերարժեւորման անհրաժեշտութիւնը։ Այդ նպատակով, իւրաքանչիւր միութեան գործունէութեան առանձնայատկութիւններն ու առաքելութիւնը նկատի ունենալով, առաջարկւեցին համապատասխան աշխատանքային ուղղութիւններ եւ ծրագրային նախաձեռնութիւններ։
ՍՊԱՀԱՆԻ ՀԱՅՈՑ ԹԵՄԻ ԱԶԳԱՅԻՆ ԱՌԱՋՆՈՐԴԱՐԱՆԻ ՀԱՆՐԱՅԻՆ ԿԱՊ
