Գրական հանդիպում՝ Էլբէկ Խեչումեանի յիշատակին

Նոյեմբերի 17-ին, Իրանահայ Գրողների միութեան Գրական միաւորի հերթական հանդիպումը նւիրւել էր միութեան վաղեմի անդամ, սոյն թւականի սեպտեմբերի 18-ին կեանքից հեռացած, գրող Էլբէկ Խեչումեանին:

Սկզբում ներկաները մէկ րոպէ լռութեամբ, յոտնկայս յարգեցին հանգուցեալի յիշատակը, ապա ընթերցւեց «Ալիք»-ում լոյս տեսած Յովիկ Մինասեանի գրութիւը` նւիրւած հանգուցեալ գրչեղբօր յիշատակին, որին յաջորդեց ներկաների վերյիշումի դրւատալի արտայայտութիւնները։

Էլբէկ Խեչումեանի գրչին պատկանող «Մեր փլւած տան համար» (2007 թ.) ու «Յոյսի եւ ողբերգութեան կամուրջը» (2014 թ.) վիպակների բովանդակութիւնը համառօտ ներկայացրեց Իրինա Մանսուրեանը՝ գովասանքով նշելով գրողի լեզւական ու արտայայտչական արւեստի մասին, որին երկրորդեցին նաեւ ներկայ ընկերները։

Հանդիպմանը ներկայ էին լուսահոգի Էլբէկ Խեչումեանի ընտանիքից այրին, որդին ու թոռնիկը, որոնց անունից շնորհակալական խօսք յայտնեց իրենց ընկերակցող Հարմիկ Զովէլեանը։

Է.Յ.