60-ամեակը բոլորեց ազգային վեհ գաղափարախօսութեամբ տոգորւած Հ. Մ. «Սիփան» միութիւնը

«ԱԼԻՔ», Կ. Դ. – Թեհրանի հայահոծ Սասուն քաղաքամասը սրանից 60 տարիներ առաջ, մի խումբ ազգայինների եւ ազգային մարմինների անվերապահ ջանքերով օժտւեց Հ. Մ. «Սիփան» միութիւնով: Միութիւն, որն իր աւելի քան կէսդարեայ ազգային գաղափարախօսութեամբ իր յարկի տակ սնել ու դաստիարակել է սերունդներ, ովքեր չեն խնայել իրենց կարելին Հայ Դատի, հայ ժողովրդի նպատակների իրականացման, եւ Թեհրանի հայկական համայնքի վերելքի համար:

Այդ վեհ գաղափարախօսութեան արգասիքը նշմարւեց նաեւ միութեան 60-ամեակի յոբելենական հանդիսութեան ընթացքում, քանի որ միութեան վարչութիւնը որոշել էր ներքին մասշտաբով նշել Հ. Մ. «Սիփան» միութեան 60-ամեակը, քանզի գումարի հսկայ մասը նւիրաբերւել է Արցախից բռնի տեղահանւած հայրենակիցների համար կենսական գոյքերի ապահովման ի խնդիր:

60-ամեայ յոբելեանը մեկնարկեց Հ. Մ. «Սիփան» միութեան «Նայիրի» սրահում, միութեան հիմնով, եւ ներկայութեամբ Իսլամական խորհրդարանում Թեհրանի եւ հիւսիսային իրանահայութեան պատգամաւոր Արա Շահվերդեանի, «Ալիք» օրաթերթի գլխաւոր խմբագիր Արամ Շահնազարեանի, ում վերապահւած էր օրւայ խօսքը, «Ալիք» հաստատութեան, Թ.Հ.Թ. Պատգամաւորական ժողովի քաղաքամասի պատգամաւորների, Թ.Հ.Թ. Թեմական խորհրդի ներկայացուցչի, Տ. Սարգիս քհնյ. Խոսրովեանի, ով ընթերցեց Թեհրանի հայոց թեմի առաջնորդ Տ. Սեպուհ արք. Սարգսեանի ուղերձը, վաստակաւոր միութենականների եւ հիւրերի:

Միջոցառումը զուգորդւած էր արտայայտութիւններով, ուղերձների ընթերցմամբ, գեղարւեստական կատարումներով եւ 60-ամեայ անցած ուղին պատկերող տեսաֆիլմի ցուցադրութեամբ:

Մանրամասնութիւնները առաջիկայ համարներից մէկում: