Հ. Մ. «Արարատ» կազմակերպութիւնը իր գործունէութեան ու հիմնադրման 80-ամեակի առիթով կազմակերպած միջոցառումները շարունակելով եւ գեղեցիկ մտայղացմամբ իրանահայ համայնքում ստեղծեց միասնական միջոցառման ոգին, որը ի յայտ եկաւ «Պարի փառատօն»-ի շրջագծում:
Թէեւ մարզական ասպարէզում «Արարատ» մարզաւանի «Սասունցի Դաւիթ» սրահը, երկար տարիներ հիւրընկալել է իրանահայ մարզական խմբերին Համահայկական խաղերի շրջագծում, սակայն առաջին անգամը լինելով համաիրանական մասշտաբի պարի փառատօն էր կազմակերպւել մասնակցութեամբ Թեհրանի, Սպահանի եւ Ատրպատականի հայկական համայնքների պարախմբերի: Հ.Մ.Ա.Կ.-ի Արւեստից միութեան «Արարատ» պարի խմբի մտայղացմամբ պարի փառատօնը իրականացաւ հոկտեմբերի 11-ին երեկոյեան: Փառատօն, որի ընթացքում իրանահայ պատանի-պարմանուհիները եւ երիտասարդ-երիտասարդուհիները հանդիսատեսին ներկայացրին հայկական եւ ինչու չէ միջազգային պարերի շարան:
Հանդիսութեան մեկնարկին, կազմակերպիչ յանձնախմբի անունից ողջոյնի խօսք փոխանցեց Մելինէ Փիազաքը եւ հակիրճ տողերով անդրադառնալով Հ.Մ.Ա.Կ.-ի հիմնադրմանը եւ անցած 80-ամեայ ուղուն նշեց, որ բոլոր վերիվայրումներով հանդերձ Հ.Մ.Ա.Կ.-ը, ինչպէս բոլոր քոյր միութիւնները մնում է հայ արւեստի ու մշակոյթի առաջամարտիկը, սերունդների դաստիարակման գործում: Նա, իր ելոյթի ընթացքում ներկայացրեց փառատօնին մասնակից բոլոր խմբերին, գեղարւեստական ղեկավարներին, պարուսոյցներին ու փորձավարներին գնահատելով նրանց անվերապահ համագործակցութիւնը: Խօսքի մէջ նշւած էր. «Տարիների ընթացքում մենք ունեցել ենք բազմաթիւ մարտահրաւէրներ եւ իհարկէ յաջողութիւններ, փաստը դաստիարակւած մեր սերունդների փաղանգն է աշխարհով մէկ եւ ահա փաստը այս 50-ամեայ շքեղ մարզահամալիրը, որը ողջ հայկական սփիւռքում բացառիկ է եւ հանդիսանում է մեր համայնքի բաբախուն սիրտը: Իսկ 80- ամեայ գործով համոզւած ենք, որ այս օրերին անհրաժեշտ է առանձնայատուկ ուշադրութիւն դարձնել մեր երիտասարդ սերնդին, որոնք իրենց ջանասիրութեամբ շարունակում են նախնիների գործը՝ ծառայելով մեր ազգաին ժառանգութեանը վառ պահելով հայ մշակոյթի ճառագայթող ջահը»:
Պարի փառատօնին իրենց մասնակցութիւնն էին բերել հետեւեալ խմբերը՝
Հ. Մ. «Արարատ» կազմակերպութեան «Արարատ» պարախումբը, աւագ ուսուցիչ՝ Լինէթ Սարգսեան, պարուսոյց՝ Ալմարա Շահմիրեան, փորձավարներ՝ Նարէ Մնացականեան եւ Նարէ Տէր-Մկրտչեան, Հ. Մ. Մ. «Նայիրի» միութեան՝ «Նայիրի» պարախումբը, գեղարւեստական ղեկավար՝ Արտաւազդ Աւետիսեան, գլխաւոր պարուսոյց՝ Մերի Աւետիսեան, պարուսոյցներ՝ Թինա Անտոն եւ Սիւնէ Շահվալադեան, Հ. Մ. «Սիփան» միութեան՝ «Սիփան» պարախումբ, գեղարւեստական ղեկավար եւ բեմադրիչ՝ Կարինէ Մանուչերեան, փորձավարներ՝ Փրենի Խաչատրեան, Էրինէ Աւասափեան, Էլին Միրխանի եւ Արփա Խուդաբախշեան, Հ. Մ. Մ. «Րաֆֆի» համալիրի՝ «Գարուն» պարախումբ, գեղարւեստական ղեկավար՝ Կարինէ Պետրոսեան, փորձավար՝ Լիոնա Շահնազարեան, «Ակունք» պարային հմաոյթ՝ գեղարւեստական ղեկավար եւ բեմադրիչ՝ Կարինէ Մանուչերեան, «Կակաչ» պարախումբ՝ գեղարւեստական ղեկավար՝ Արուս Սարգսեան, պարուսոյց եւ փորձավար՝ Արմինէ Աւագեան, փորձավար Արեգ Աւագեան: Նոր Ջուղայի Հ. Մ. Մ. «Արարատ» միութեան «Կռունկ» պարախումբ, պարուսոյց՝ Քատրին Թորոսեան, ՀՕՄ-ի Թաւրիզի մասնաճիւղի «Տաթեւ» պարային համոյթ, գեղարւեստական ղեկավար՝ Կարինէ Մանուչերեան, փորձավարներ՝ Մարիա Նեժադ-Շայանփուր եւ Սեպուհ Անտոնեան:
Երկու ժամեայ տեւողութեամբ փառատօնի աւարտին, բեմ հրաւիրւեցին խմբերի գեղարւեստական ղեկավարները պարուսոյցներն ու փորձավարները, որոնք գնահատւեցին Իրանի Իսլամական խորհրդարանում Թեհրանի եւ հիւսիսային իրանահայութեան եւ Սպահանի ու հարաւային իրանահայութեան պատգամաւորներ՝ Արա Շահվերդեանի, Գեղարդ Մանսուրեանի, Հ.Մ.Ա.Կ.-ի Կենտրոնական վարչութեան նախագահ Սոֆի Ջաղարբէգեանի եւ Հ.Մ.Ա.Կ.-ի 80-ամեակը նշող յանձնախմբի նախագահ Համլետ Խալոյեանի ձեռամբ: Միջոցառմանը ներկայ էին «Ալիք» հաստատութեան եւ Թեհրանի, Սպահանի եւ Ատրպատականի հայոց թեմերի ազգային իշխանութեան, կառոյցների, մարմինների ու միութիւնների ներկայացուցիչներ, արւեստագէտներ եւ մեծ թւով հանդիսատես:
Աւարտին իր խօսքը փոխանցեց պատգամաւոր Արա Շահվերդեանը: Իր ելոյթի ընթացքում նա գնահատելով կազմակերպւած միջոցառումը նախ մշակոյթի շաբաթւայ առիթով իր շնորհաւորանքը փոխանցեց մշակոյթի բոլոր անխոնջ գործիչներին, ապա ողջունեց Հ.Մ.Ա.Կ.-ի հիմնադրման 80-ամեակը: Նա ընդգծեց, որ այս փառատօնը, որին մասնակցել են Թեհրանից բացի նաեւ Ատրպատականի եւ Սպահանի հայոց թեմերից, ապացուցում է իրանահայ համայնքի միասնականութիւնը եւ համագործակցութիւնը: Նա իր գնահատանքը յայտնեց իրանահայ երիտասարդներին, որոնց յաջողութիւնը մշակութային, մարզական ու գիտական ասպարէզներում համարեց պանծալի երեւոյթ:
Թղթակցութիւնը՝ ԿԱՐԻՆԷ ԴԱՒԹԵԱՆԻ
Լուսանկարները՝ ՀԱՏԻՍԻ
