ԵՂԵԳԱՆ ՓՈՂ

(ԱՐՄԷՆ ՇԵԿՈՅԵԱՆԻ Բանաստեղծութիւնների ծաղկաքաղ)

 

ՇԱՐՈՒՆԱԿՒՈՂ ԽԱՂ

Կայծակի պէս ու արեգակի

մերթ ծագում է, մերթ չքւում անհետ:

Ես խաղ եմ խաղում մի երկակի

ուրիշներ ու ինքս ինձ հետ:

 

Առաւօտ կանուխ զարթնել եմ ու

չգիտեմ՝ Տէրն ինձ շնորհք կտա՞յ,

որ երեւակւեմ մարդոց դէմ ու

շողշողամ՝ զերդ մի փայլուն կտաւ:

 

ՍԷՐ ԵՒ ՅՈՅՍ

Ի՞նչ բառ գրեմ, որ յարատեւ

մնայ քիմքին ձեր բանիմաց.

լաւ բառ գրեմ, որովհետեւ

փող եմ առնում դրա դիմաց:

Սէր կգրեմ. սիրոյ գետերն

այժմ եւ միշտ թող վարարեն,

որ դուք չասէք՝ էդ տգէտը

ինչո՞ւ խօսեց մեր փոխարէն:

 

Ես յանուն ձեզ եւ յանուն ինձ

յոյս կըփըռեմ տողերիս տակ,

որ դուք չասէք՝ էդ խեղկատակն

ինչո՞ւ խօսեց մեր անունից:

 

ՊԱՐՏՈՒԹԻՒՆ

Դեռ շնչում ենք էս աշխարհում,

շնչում ենք ու ապաշխարում

եւ կեանքն արդէն չենք նշմարում

գողուբոզի էս աշխարհում:

 

Գողուբոզի էս աշխարհում

հարիֆներն են ապաշխարում,

այսինքն՝ մենք, այսինքն՝ ես…

Տանուլ տւի, Ամենատե՛ս:

 

ԼՈՂՈՐԴԸ

Լողում եմ. անվերջ ծով է արդէն

իմ ներքեւում ու իմ վերեւում:

Ձգւում է լողն իմ դէպի անդին,

ու ափերն արդէն չեն երեւում:

 

Ինձ զսպում եմ, որ չբղաւեմ՝

օգնէ՜ք, մթնո՜ւմ է, ո՜ւշ է արդէն…

Ես շիլաչեցի մի տղայ եմ,

ու տեսածներըս յուշ են արդէն:

 

ՑՐՏԻ ՄԷՋ

Ես փուչիկներ փչեցի,

բայց օդի մէջ պայթեցին:

Բախիս ձիուն հեծնեցի,

բայց կէսճամփին գայթեցինք:

 

Էս ցրտի մէջ, գիշերով

Էլ ոչինչ չեմ երազում:

Փաթաթւած գոլ յուշերով՝

ոչ մի տեղ չեմ վռազում:

Աղբիւրը՝ Granish.org