Մեծանուն բանաստեղծ Համօ Սահեանը եւ նրա առաջին կինը՝ բանաստեղծուհի Մարիա Յակոբեանը միասին ապրել են 34 տարի, ապա բաժանւել են: Բայց անգամ բաժանւելուց յետոյ նրանք իրար հետ «խօսել» են բանաստեղծութիւնների միջոցով:
Եւ ահա Մարիա Յակոբեանը գրել է.
Էլ չեմ անի, էլ չեմ անի,
քեզ ինձանից էլ չեմ վանի,
էլ չեմ գնայ, որ չգնաս,
չեմ հեռանայ, չհեռանաս,
կհաւատամ, որ հաւատաս:
Ինչին Համօ Սահեանը պատասխանել է.
Դու ուզեցիր, որ ես
քեզ տիրութիւն անեմ,
ու ես անտէր մնամ:
Ամէն, ամէն ինչ տամ,
տեղը ոչինչ չառնեմ,
ու քեզ ընկեր մնամ:
Դու իմ արեւն առար
եւ ուզեցիր, որ ես
շնորհակալ լինեմ,
ես անարեւ մնամ,
բայց քո բախտի համար
արեւագալ լինեմ:
Դու ուզեցիր, որ ես
քեզ թողնեմ ու գնամ,
բայց եւ քոնը լինեմ,
արցունքի մէջ մնամ
ու սգի մէջ մնամ,
եւ քո տօնը լինեմ:
Դու ուզեցիր, որ ես
փոխւեմ հազար անգամ,
բայց եւ հինը լինեմ:
Քեզ ուրիշին տւիր
եւ չուզեցիր անգամ,
որ ես իմը լինեմ:
Դու ուզեցիր, որ ինձ
քո մեղքերով չափեմ
ու մեղքի տակ մնամ,
քո մեղքերի վրայ
իմ աչքերը փակեմ
եւ անգիտակ մնամ:
Գուշակեցէք, խնդրեմ,
մարգարէներ, հիմա,
ես ձեր ճորտը լինեմ,
թէ մինչեւ ե՞րբ պիտի
ես իմ տան մէջ՝ միակ
աւելորդը լինեմ:
