Ալամութը՝ ԻՒՆԵՍԿՕ-ի համաշխարհային ժառանգութեան նոր գրանցւած յուշարձան

ԻՒՆԵՍԿՕ-ի Համաշխարհային ժառանգութեան կոմիտէի 48-րդ նստաշրջանում, որը տեղի է ունեցել Հարաւային Կորէայի Բուսան քաղաքում, համաշխարհային ժառանգութեան ցանկում է գրանցւել Իրանի Ալամութ բերդն ու նրան առնչւող պաշտպանական ամրութիւնների համալիրը՝ դառնալով Իրանի 30-րդ գրանցւած յուշարձանը։

Ալամութի համալիրի համաշխարհային գրանցումը եզրափակել է աւելի քան երկու տասնամեակի գիտական ուսումնասիրութիւնների, հնագիտական պեղումների, վերականգնման, փաստաթղթաւորման եւ մասնագիտական աշխատանքների ընթացքը։

Ներկայացւած գործը վերաբերում է ոչ միայն մէկ պատմական յուշարձանի, այլեւ «մշակութային-պաշտպանական համայնապատկերի», որը ձեւաւորւել է Արեւմտեան Ալբորզի դժւարամատչելի լեռնային շրջանում եւ դարեր շարունակ ծառայել է որպէս ռազմական, վարչական ու մտաւոր կեանքի կարեւոր կենտրոն։

ԻՒՆԵՍԿՕ-ին ներկայացւած փաստաթղթում ընդգրկւած են եօթ հիմնական եւ օժանդակ բերդեր՝ Ալամութ, Լամբասար, Ղոսթին Լար, Շամս Քալայէ, Շիրքուհ, Էյլան եւ Նովէյզար Շահ ամրոցները, որոնք միասին կազմել են փոխկապակցւած պաշտպանական ու քաղաքակրթական համակարգ։