Հայաստանը եւ արցախեան մշակութային ժառանգութիւնը կը ներկայացւեն Վիեննայի միջազգային փառատօնում
«Արցախեան մշակոյթի պահպանման կենտրոն» հասարակական կազմակերպութիւնը ստացել է պաշտօնական հրաւէր՝ մասնակցելու Աւստրիայի մայրաքաղաք Վիեննայում 2026 թւականի նոյեմբերի 27–30-ը կայանալիք XVI International Christmas Choir Festival «Vienna Christmas Voices» միջազգային փառատօնին, որն անցկացւում է WOFA (World Festival Association)-ի եւ Վիեննայի տեղական ինքնակառավարման մարմինների համագործակցութեամբ։
Փառատօնին Հայաստանը եւ արցախեան մշակութային ժառանգութիւնը կը ներկայացնեն «Արցախեան մշակոյթի պահպանման կենտրոն» ՀԿ կազմում գործող «Արցախի ազգային նւագարանների պետական նւագախումբը» եւ «Մենք ենք մեր սարերը» երգի-պարի պետական համոյթը։
Համոյթները միջազգային հանդիսատեսին կը ներկայացնեն հայկական երաժշտութիւնն ու պարարւեստը՝ որպէս կենդանի մշակութային ժառանգութիւն, որը կրում է մեր ժողովրդի պատմական յիշողութիւնը, ինքնութիւնն ու ստեղծագործ ոգին՝ ընդգծելով մշակութային ժառանգութեան պահպանման ու սերունդներին փոխանցման կարեւորութիւնը։
Մասնակցութիւնը կարեւոր քայլ է կազմակերպութեան մշակութային դիւանագիտութեան եւ միջազգային համագործակցութեան զարգացման գործում՝ նպատակ ունենալով միջազգային հանրութեանը ներկայացնել հայկական մշակոյթն ու արցախեան մշակութային ժառանգութիւնը։
«Արցախեան մշակոյթի պահպանման կենտրոն» ՀԿ-ն վերջին տարիներին հետեւողականօրէն զարգացնում է իր միջազգային մշակութային գործունէութիւնը։ Այդ գործունէութեան ճանապարհին կարեւոր փուլերից էր մասնակցութիւնը Իտալիայում անցկացւած միջազգային ֆոլկլորային փառատօնին, որը կազմակերպւել էր CIOFF (International Council of Organizations of Folklore Festivals and Folk Arts) միջազգային ցանցի շրջանակում՝ ԻՒՆԵՍԿՕ-ի գործընկերութեամբ։ Այս մասին տեղեկացնում է 168-ը:
CIOFF-ը ժողովրդական արւեստի եւ ոչ նիւթական մշակութային ժառանգութեան պահպանման ոլորտում գործող հեղինակաւոր միջազգային ցանց է, որը նպաստում է մշակութային ժառանգութեան պահպանմանը եւ ժողովուրդների միջեւ մշակութային երկխօսութեան զարգացմանը։
«Արցախեան մշակոյթի պահպանման կենտրոն» ՀԿ-ն շարունակում է իր գործունէութիւնը՝ պահպանելու, հանրահռչակելու եւ միջազգային մշակութային հարթակներում ներկայացնելու հայկական եւ արցախեան մշակութային ժառանգութիւնը՝ խթանելով մշակութային երկխօսութիւնն ու միջազգային համագործակցութիւնը։
Կենտրոնը իրականացնում է ծրագրեր՝ ուղղւած արցախեան ոչ նիւթական մշակութային ժառանգութեան պահպանմանը, հանրահռչակմանը, միջազգային ներկայացմանը եւ մշակութային համագործակցութեան զարգացմանը։
