Սերոբ Սահակեան. «ՀՀ իշխանութիւնները չեն արձագանգել Երուսաղէմի հայկական եկեղեցու ահազանգին»

«ԱԼԻՔ» – Հայ Դատի Երուսաղէմի կազմակերպութեան անդամ Սերոբ Սահակեանը Alpha News-ի հետ զրոյցում անդրադարձել է Երուսաղէմում գտնւող հայկական կալւածքների հարցին։

Յիշեցնենք, որ օրերս Երուսաղէմի հայկական եկեղեցին ահազանգել է՝ Իսրայէլը ձգտում է խլել իր ունեցւածքը։ Երուսաղէմի քաղաքապետարանը ձգտում է բռնագրաւել դարեր շարունակ Երուսաղէմի հայոց պատրիարքարանին պատկանող գոյքը եւ այն աճուրդի հանել՝ 1994 թւականից ի վեր իբր գոյացած համայնքային պարտքերը հաւաքելու համար:

Պատրիարքարանը վարչական հայց է ներկայացրել՝ փորձելով դադարեցնել վտարման գործընթացն այն գոյքերի նկատմամբ, որոնք Պատրիարքարանը դարեր շարունակ տնօրինել է։

«Իսրայէլն այն պետութիւնն է, որի ընդհանուր բնակչութեան 20 տոկոսը կրօնաւոր է ու մօտաւորապէս մէկ միլիոն մարդ գումար է ստանում՝ որպէս կրօնաւոր խաւ։ Հետեւաբար, մենք այս համոզմունքով վստահ էինք, որ կրօնական խաւին այլ վերաբերմունք պիտի լինէր»,- ասել է մեր զրուցակիցը։

Նա նաեւ ցաւով է նշել, որ ՀՀ իշխանութիւնները չեն արձագանգել կատարւող դէպքերին։

«Պիտի ստեղծենք միջազգային ճնշում, միջազգային արտաքին ճակատ, որ կարողանանք Իսրայէլի վրայ որոշ չափով ճնշում գործադրել ու այդ հարցը բեկանել։

Իսկ Հայաստանի իշխանութիւնները մինչեւ այսօր ոչ մի պաշտօնական բողոք չեն արտայայտել»,- ընդգծել է Սերոբ Սահակեանը։

Յիշեցնենք, որ, ըստ պատրիարքարանի տարածած յայտարարութեան, հայկական եկեղեցու դէմ ուղղւած այդ վարքագիծը կարող է վտանգել Հայոց պատրիարքարանի երկարամեայ առաքելութիւնը Սուրբ Երկրում, որն ակտիւ է 7-րդ դարից։ Աւելին, դա կարող է սպառնալ հայ համայնքի շարունակական ներկայութեանը Սուրբ Երկրում, որը սկիզբ է առնում 4-րդ դարից։ Պատրիարքարանը կոչ է արել Իսրայէլի վարչապետ Բենիամին Նեթանիահուին, ներքին գործերի նախարար Մոշէ Արբելին եւ կառավարական կոմիտէի ղեկավար Ցաչի Հանեգբիին վճռականօրէն միջամտել եւ անյապաղ սառեցնել Երուսաղէմի Հայոց պատրիարքարանի դէմ քաղաքապետարանի բոլոր գործողութիւնները։