ԱՄՆ-ն սկսել է Չինաստանի եւ ՌԴ տիեզերական ծրագրերի մասին հետախուզական տւեալներ փոխանակել Five Eyes դաշինքի հետ
«ԱԼԻՔ» – ԱՄՆ-ն սկսել է Չինաստանի եւ Ռուսաստանի տիեզերական գործողութիւնների վերաբերեալ գաղտնի հետախուզական տւեալներ փոխանակել Մեծ Բրիտանիայի եւ Five Eyes հետախուզական դաշինքի միւս երկրների հետ: Հաղորդում է անգլիական The Times-ը։
ԱՄՆ տիեզերական ուժերի «Տիեզերական Դելտա 9» ստորաբաժանումը պատասխանատու է ուղեծրային գործողութիւնների հետախուզման համար։ Նախկինում դրա տւեալները հասանելի էին միայն ԱՄՆ անձնակազմին։ Սակայն վերջին շաբաթներին ՆԱՏՕ-ի դաշնակիցների ռազմաօդային հրամանատարութեան փոխհրամանատար Ջոնի Սթրինգերը տեղեկացւել է ԱՄՆ հետախուզական ծրագրի մասին։
Սթրինգերին ցուցադրւել են ԱՄՆ ռազմական հետախուզութեան տակտիկական գործողութիւնները, այդ թւում՝ թէ ինչպէս է ԱՄՆ-ն օգտագործում տեսախցիկը՝ ռուսական եւ չինական արբանեակների պատկերները աւելի մեծ չափերով տեսնելու համար։ Տեսախցիկը լուսանկարներ է անում եւ գնահատում, թէ արդեօք արբանեակը իրականացնում է այնպիսի գործունէութիւն, որը պէտք է մտահոգութիւն առաջացնի Միացեալ Նահանգներում։ Այսպէս, Վաշինգտոնը մտահոգութիւններ ունի, որ որոշ արբանեակներ ունեն կրկնակի նպատակ եւ օգտագործւում են զինւորականների կողմից՝ առեւտրային արբանեակների քողի տակ։
Ընդհանուր առմամբ, ԱՄՆ-ն մտավախութիւն ունի, որ Պեկինը եւ Մոսկւան արագ զարգացնում են նոր տիեզերական հնարաւորութիւններ, իսկ Չինաստանը մեծ ներդրումներ է կատարում հետախուզական տւեալների հաւաքագրման մէջ։ Եթէ ԱՄՆ-ն պատերազմի գնայ Չինաստանի հետ, Պեկինը կարող է օգտագործել իր տիեզերական հնարաւորութիւնները՝ ամերիկեան զօրքերի տեղաշարժին հետեւելու համար։
Վերջին շաբաթներին որոշում է կայացւել աւելի սերտ համագործակցել Մեծ Բրիտանիայի եւ Five Eyes ծրագրի միւս գործընկերների հետ, որոնք կունենան ԱՄՆ հետախուզութեան ամենաբարձր մակարդակի տւեալներին հասանելիութիւն, ասել է «Տիեզերական Դելտա 9»-ի հրամանատար, գնդապետ Ռեմսի Հորնը։ Դաշնակիցների հետ կապերը ամրապնդւեցին այն յոյսով, որ դրանք կօգնեն յաղթահարել սպառնալիքներն ու խոցելիութիւնները։ Space Delta 9-ի խօսնակը քայլը որակեց «նշանակալից»։
