ՀՅԴ Բիւրոյի յայտարարութիւնը

Արցախի Հանրապետութեան անկախութեան օրւայ նախօրէին կարեւոր է համահայկական միասնականութեամբ փաստել, որ տէր ենք Ազատ, Անկախ Արցախ ունենալու, Արցախն, ի վերջոյ, Մայր Հայաստանին միացած տեսնելու մեր նւիրական երազանքին։

Արցախում այսօր որոշւում է հայութեան արժանապատւութեան ու հայկական պետականութեան լինելիութեան հարցը։ Արցախեան շարժումով սկսւած մեր նորօրեայ պատմութեան ամենաճակատագրական հանգրւանում ենք, մարտահրաւէրները շատ են, լուծումները ոչ դիւրին։ Առաւել քան երբեւէ մեր ուժերը լարելու, մեր ջանքերը մէկտեղելու եւ բազմապատկելու, մեր պայքարը նորոգելու հարց ունենք։

Հայաստան-Արցախ-Սփիւռք եռամիասնութեան վերականգնմամբ Արցախին ներքին եւ արտաքին ճակատներում աջակցելը այսօր առաջնահերթ անհրաժեշտութիւն է։ Սովի, շրջափակման, զրկանքների, ցեղասպանւելու վտանգի պայմաններում առաջնագծում կանգնած արցախցին պէտք է զգայ, որ թիկունքն ամուր է, պէտք է վստահ լինի, որ պայքարում մենակ չէ։

Մեր թշնամիներին, մեր դաշնակիցներին յստակ ուղերձ պէտք է յղել, որ հայ ժողովուրդը համաձայն չէ Հայաստանը զիջումների եւ ոչնչացման տանելու, Արցախն Ադրբեջանին յանձնելու օրւայ իշխանութեան քաղաքականութեանը։

Սեպտեմբերի 2-ին աշխարհի բոլոր կողմերում, անկախ գաղափարական ու կուսակցական հայեացքներից, հայութիւնը պէտք է ոտքի կանգնի յանուն Արցախի ու յանուն արցախցիների։ Այս պայքարը համազգային է եւ մենք բոլորս անելիք ունենք։

Մենք բոլորս արցախցի ենք, առանց Արցախի չկայ՛ Հայաստան։

ՀՅԴ ԲԻՒՐՕ
01 Սեպտեմբերի, 2023 թ.