Լոյս է տեսել ՀՅԴ պաշտօնաթերթ «Դրօշակ»-ի 2025 թ․ չորրորդ համարը
Լոյս է տեսել «Դրօշակ»-ի ապրիլեան համարը: Ինչպէս եւ ենթադրելի էր հայութեան համար առանձնայատուկ խորհուրդ ունեցող ամսին հրապարակւած «Դրօշակ»-ի համարը նւիրւած է ցեղասպանութեան՝ հայութեան մաքառումի ու պայքարի թեմաներին: Թուրքիայի նկատմամբ եւ Հայոց Ցեղասպանութեան հարցում Հայաստանի այսօրւայ իշխանութիւնների որդեգրած «նոր» քաղաքականութիւնը իր շեշտադրումներն է պարտադրել ազգային կարեւորագոյն այս հարցերում՝ ցաւօք, ներքին լսարան տեղափոխելով այն բանավէճը, որը տարիներ շարունակ տարւել է արտաքին ճակատում, թուրքական ժխտողականութեան դէմ: Տւեալ խնդիրներին է անդրադառնում «Դրօշակ»-ի այս համարն՝ իր Առաջնորդողով:
Պատմաբան Արմէն Կարապետեանը քննում է Հայոց Ցեղասպանութեան հարցը, որպէս պատմական եւ իրաւական առումով փաստարկւած եւ միջազգայնօրէն ընդունւած իրողութիւն: Միաժամանակ հեղինակը ներկայացնում է Արեւմուտքի անուղղակի մեղսակցութիւնն այս հարցում, ինչը բխում էր քաղաքական պահով թելադրւած վերջինիս երեսպաշտ գործունէութիւնից:
Պատմաբան Անի Մելքոնեանը անդրադառնում է միջազգայնօրէն ցեղասպանութեան յանցագործութեան իրաւական ճանաչմանը, այս հարցում միջազգային իրաւունքի մասնագէտ Լեմկինի գործադրած ջանքերին, որոնց հիմքում ընկած էր յատկապէս Հայոց Ցեղասպանութեան նախադէպը:
«Դրօշակ»-ի սոյն համարում տեղ է գտել նաեւ Հայկազուն Ալւրցեանի յօդւածաշարի եզրափակիչ մասը՝ նւիւած Ցեղասպանութեան շրջանում համշենահայութեան մղած հերոսական պայքարին: Սոյն յօդւածաշարում տեղ են գտել բազմաթիւ փաստեր, որոնք անցած դարասկզբի հայութեան հերոսամարտերի այս դրւագի լայն լուսաբանութեան հնարաւորութիւն են ստեղծում:
Պատմաբան եւ հրապարակախօս Դերենիկ Մելիքեանի յօդւածը պատմում է Պարսկաստանի տարածքում հայ եւ ասորի ժողովուրդների դէմ երիտթուրքերի իրականացրած ցեղասպանական սկզբնական գործողութիւնների մասին:
Արւեստաբան Մովսէս Ծիրանին հայոց գողգոթայի ողբերգական էջերին անդրադառնում է առաջին անգամ ընթերցողի ուշադրութեանը ներկայացնելով Արշիլ Գորկու քրոջ՝ Սեդայի հետ տարիներ առաջ իր արած հարցազրոյցը: Ինչպէս միշտ այս համարում եւս ներառւած են թեմային առնչւող հետաքրքրական մի շարք այլ յօդւածներ:
«Դրօշակ»-ի 2025 թ. չորրորդ համարը համացանցում կարող էք գտնել droshak.am հասցէի ներքոյ:
Ներբեռնել համարը «Դրօշակ» թիւ 4, 2025 թ.
