«Հայաստանի ազգային անվտանգութեան միակ սպառնալիքը Փաշինեանի կառավարութիւնն է». Գեղամ Մանուկեան

Արցախի Հանրապետութեան նախագահ Սամւէլ Շահրամանեանն օրերս հարցազրոյց է տւել ֆրանսիական Le Figaro-ին։ Պատասխանելով հարցին, թէ՝ «Արցախն այլեւս տարածք չունի, բայց ձեւականօրէն դեռ կա՞յ վտարանդի պետութիւն եւ կառավարութիւն», Արցախի Հանրապետութեան նախագահը պատասխանել է. «Այո՛, Երեւանում, այն շէնքում, որտեղ ես ընդունում եմ Ձեզ, Արցախի նախագահական, դատական եւ օրէնսդիր մարմինների գրասենեակներն են։ Խորհրդարանականները քւէարկութիւնների համար կարող են հաւաքւել այստեղ: Ես հոկտեմբերին հրամանագիր եմ ստորագրել, որի համաձայն՝ կառավարութեան բոլոր նախարարները կամաւոր հիմունքներով մնում են իրենց պաշտօններում»։

Ի պատասխան Շահրամանեանի այս հարցազրոյցին եւ արտայայտած մտքին՝ Արցախի Հանրապետութիւնն Ադրբեջանի նախագահին յանձնած Նիկոլ Փաշինեանը Կառավարութեան նիստի ուղիղ եթերում յայտարարել է.

«Եթէ որեւէ մէկը Հայաստանում իրեն նոյնականացնում է՝ որպէս կառավարութիւն, դա Հայաստանի ազգային անվտանգութեան խնդիր է։ Եւ յոյս ունեմ, որ այդ խնդրի գոյութիւնը չի նշանակի, որ մեր մարմիններն իրենց աշխատանքներում թերացել են։ Ես ուզում եմ, որ էս ուղերձը յստակ լինի բոլորի համար։ Եւ սա ուղղակի յայտարարութիւն չէ, որը պարզապէս հնչում է։ Սա յստակ արձանագրում է, եւ այդ արձանագրումը պէտք է արտայայտւի իրական կեանքում։ Ուզում եմ սա բոլորիս համար հասկանալի լինի։ Ասենք՝ ամէն մէկը գնայ, մի բնակարան վարձի, ու ցուցանակը կպցնեն, ասեն՝ մենք էսինչի կառավարութիւնն ենք»։

168 TV-ի «Ռեւիւ» հաղորդաշարի եթերում ԱԺ «Հայաստան» խմբակցութեան պատգամաւոր Գեղամ Մանուկեանը Փաշինեանի այս արձագանքին այսպէս է հակադարձել՝ Հայաստանի համար ազգային անվտանգութեան սպառնալիք է ոչ թէ՝ Արցախի վտարանդի Կառավարութիւնը, այլ՝ Փաշինեանի ղեկավարածը։

«Հայաստանի ազգային անվտանգութեան միակ սպառնալիքը Փաշինեանի կառավարութիւնն է։ Փաշինեանը կարծում է, որ ցանկացած ազգային կառոյցի քաղաքացու՝ իր զիջումներից դուրս գործող ցանկացածին, կարող է բանտարկել, ինչպէս արել է Արմէն Աշոտեանին եւ միւսներին, բայց միեւնոյն է, դա չի կարող կասեցնել հայրենիք ծախելու իր վարած քաղաքականութեան դէմ պայքարը»,- ասել է Մանուկեանը։

Ընդդիմադիր պատգամաւորի համոզմամբ՝ նոյնիսկ Հայաստանի տարածքում Արցախի մասին խօսելը վախ է ներշնչում Փաշինեանին. այն Փաշինեանին, որը կատարում է Ալիեւի պահանջները։

«Շատ վտանգաւոր յայտարարութիւն է արել՝ ներազգային պառակտիչ բնոյթ ունեցող։ Այս յայտարարութիւնը վկայում է՝ Փաշինեանը շարունակում է կեանքի կոչել Ալիեւի պահանջները»,- ասել է Մանուկեանը։