Հայաստանեան իրադարձութիւնների մասին ընդհանրապէս եւ համաժողովրդական ՍՐԲԱԶԱՆ ՊԱՅՔԱՐ-ի վերաբերեալ մասնաւորապէս, ամենօրեայ, ամենժամեայ եւ մինչեւիսկ րոպէների կտրւածքով ընթացող երեւոյթներն ու դէպքերը շարունակում են հայաշխարհի ուշադրութեան կիզակէտում լինել։
Փորձենք դրանց ուշագրաւներից քանիսը, որպէս փաստացի ապացոյցներ, ներկայացնել մեր յարգելի ընթերցողներին…
1. Ի տես ՇԱՐԺՄԱՆ շուրջ մէկամսեայ տեւողութեան, իշխանախումբը իր խորը շփոթմունքի ու յատկապէս իշխանութիւնը կորցնելու սարսափի զգացումները փորձում է փարատել կրկնւող սուտ քարոզչութեամբ, ամենուր տարածելով թէ՝ ՇԱՐԺՈՒՄԸ մարելու միտում ունի…
2. Սուտ լրատւութեանն ու քարոզչութեանը զուգահեռ, իշխանախումբը չյայտարարած, բայց փաստացի զինւորական արտակարգ դրութեամբ՝ բազմահազարանոց ոստիկանների փողոցներ իջեցնելու հետ միաժամանակ, սեւ ու կարմիր բերետաւորներ կոչւող խուլիգանների միջոցով փորձում է վախի մթնոլորտ ստեղծել ժողովրդական շարքերում։
3. Յատկապէս կարմիր ու սեւ ուժայինների բիրտ ու անհամաչափ պահւածքի նկատմամբ ըստ ամենայնի դատապարտելի դիրք են որդեգրել անկախ ատեաններ ձեւացող դատախազական եւ ՄԻՊ (Մարդկային իրաւանց պաշտպան) գերատեսչութիւնները… եւ իշխանահաճոյ շրջանակներն ու պնակալէզները։
4. Ի տես այդ ամէնի, պապանձւած են ՀՀ-ում՝ ԱՄՆ-ի, Անգլիայի, Եւրոմիութեան «ժողովրդավա՜ր» դեսպանատները, որոնք, սակայն, անամօթաբար իրենց գոհունակութիւնն ու կողմնակցութիւնն են յայտնում հայ-ադրբեջանական «հաշտութեանը» յանգեցնող սահմանազատման ու սահմանագծման գործընթացներին…։
5. Հաւաքական արեւմուտքի նման կեցւածքն, ինչ խօսք, բխում է սեփական եւ ոչ թէ հայկական շահերից։ Իսկ դա ենթադրում է՝ առհասարակ Հարաւային Կովկասից ռուսական գործօնի իսպառ բացառումն ու դա ՆԱՏՕ-ական Թուրքիայով փոխարինումը։ Թէ դրանից ինչե՞ր են բխելու յատկապէս Հայաստանի ու հայութեան հետագայ շահերի ու անվտանգային հեռանկարի համատեքստում, թող կռահի յարգելի ընթերցողը։
6. Ահա, թէ ինչու են ամենօրեայ կարգով արձագանգում Թուրքիան ու Ադրբեջանը՝ հայաստանեան իրադարձութիւնների մասին, նոյնիսկ նախագահների մակարդակով։ Նրանք բացէ ի բաց խօսում են «հայկական ռեւանշիզմի» վերստին գլուխ բարձրացնելու վտանգից եւ դրա դէմն առնելու՝ նիկոլական իշխանութեան պարտաւորութիւնների մասին։ Եւ չեն էլ թաքցնում, որ այդ իշխանութեան պաշտպանման ու պահպանման համար, պատրաստակամ են նոյնիսկ ուժային լծակներ ու միաւորներ օգտագործել ընդդէմ ռեւանշիստների…։
7. Ահաւասիկ, ըստ ամենայնի պարզորոշ փաստ է, որ ծանրագոյն պարտաւորութիւն ու պատասխանատւութիւն է ստանձնել Տաւուշեան պոռթկումով սկիզբ առած ու Սրբազան պայքարով ընթացող համաժողովրդական Շարժումը։
Դժւարագոյն Շարժում, որն խոչընդոտելու-կասեցնելու են ելած վերոնշեալ արտաքին ու ներքին բոլոր կարգի դաւադիր, թէ՛ հակառակորդ-թշնամիները։
8. Նաեւ պարզորոշ է ու յստակ, որ մեր համազգային նշանակութեան արժէքների, այսինքն՝ հայրենի երկրի, հայոց պետականութեան ու բովանդակ հայութեան դէմ նման կարգի վիթխարի խոչընդոտների դիմագրաւման ու յաղթահարման ուղին անխուսափելիօրէն լինելու է տատասկոտ, անհարթ եւ ժամանակատար։
Իսկ օրինաչափօրէն համաժողովրդական պայքարի յաղթանակի գրաւականներն են՝
ա- Հաւաքական ուժի եւ Միասնական շարքերի պահպանում-ընդլայնումը,
բ- Հաւաքական համբերատարութեան ու պայքարի յարատեւութեան գիտակցումը,
գ- Հայրենի, ինչպէսեւ՝ արտերկիր-Սփիւռքի հնարաւոր բոլոր ռեսուրսների նպատակային օգտագործումը՝ քաղաքական, քարոզչական, տեղեկատւական եւ այլ հարթակներում նպաստաւոր արդիւնքներ գրանցելու համար։
9. Նաեւ պէտք է փաստել ու արձանագրել, որ ոչ թէ հայրենի ժողովրդի ՍՐԲԱԶԱՆ ՊԱՅՔԱՐԸ, այլեւ հայրենադաւ ու հայանուն իշխանախմբի՝ մեր տառապեալ ժողովրդին պատերազմով վախեցնելու եւ սուտ խաղաղութեան խոստումներով մոլորեցնելու հնարքներն են սպառւել ու ընդմիշտ մարել…։
10. Եւ վերջապէս՝ տայ Աստւած, որ նոյն ՍՐԲԱԶԱՆ ՊԱՅՔԱՐԸ տրամաբանօրէն թեւակոխելով յաղթական աւարտի հանգրւան, երաշխաւորւելու է ողջ հայութեան համազգային իրական, ամբողջական եւ նորագոյն վերածնունդը՝ ոտնահարւած իրաւունքներն վերանւաճելու յուսատու հեռանկարով…։
Դ. Մ.
Պատմական գիտութիւնների թեկնածու
