ԵԽ-ում Գասպար Կարապետեանը բացատրել է՝ Ղարաբաղեան շարժումը որեւէ վարչապետ չի կարող դադարեցնել
Բելգիայի Ներկայացուցիչների պալատի Արտաքին յարաբերութիւնների յանձնաժողովն ապրիլի 2-ին լսումներ է անցկացրել եւ քննարկել Լեռնային Ղարաբաղի վերաբերեալ բանաձեւի նախագիծ: Լսումներին մասնակցել է նաեւ ՀՅԴ Հայ Դատի Եւրոպայի գրասենեակի նախագահ Գասպար Կարապետեանը:
Alpha News-ը թեմայի վերաբերեալ զրուցել է ՀՅԴ Հայ Դատի Եւրոպայի գրասենեակի լրատւական կապերի պատասխանատու Արամ Գէորգեանի հետ:
«Բանաձեւը, որը ներկայացրել են պատգամաւորներ Էլս Վան Հուֆը եւ Միշէլ դէ Մաեգդը, նոր չէ, այլ նախկին բանաձեւերն են, որոնցում որոշ կէտեր են աւելացրել։ Պարոն Կարապետեանը առաջարկել է փոփոխութիւններ մտցնել այդ բանաձեւի տեքստում, ինչպէս նաեւ աւելացնել կէտեր Հայաստանի եւ Ադրբեջանի միջեւ ակնկալւող «Խաղաղութեան պայմանագրի» եւ արցախահայութեան մասին:
Բանաձեւի սկզբում ներկայացւում է Արցախի անկախութեան պատմութիւնը եւ խօսւում Ալմա-Աթայի հռչակագրի մասին: Այս հատւածի համար Գասպար Կարապետեանը նշել է, որ յստակ պէտք է գրւի՝ Լեռնային Ղարաբաղի անկախութեան հիմքը ԽՍՀՄ օրէնքի հիման վրայ է դրւած: Երկրորդ կէտը, որ պէտք է նշւի բանաձեւում, այն է, որ 1990 թ.-ի սկզբներին Հայաստանի խորհրդարանը Ալմա-Աթայի հռչակագրում յստակ նշել է՝ Արցախը Ադրբեջանի մաս չպիտի կազմի: Կարապետեանը մանրամասն ներկայացրել է, որ Ադրբեջանի յայտարարութիւնները, թէ Ղարաբաղը միշտ եղել է Ադրբեջանի կազմում, եւ հայերն իրենց 30 տարի է՝ հանել են այնտեղից, սուտ է եւ պատմական հիմք չունի»,- նշել է Գէորգեանը:
Խօսելով օրերս Նիկոլ Փաշինեանի յայտարարութեան մասին, թէ պէտք է մոռանալ Արցախեան շարժման մասին՝ Գէորգեանն ընդգծել է.
«Գասպար Կարապետեանը լսումների ընթացքում նշել է, որ ժողովրդավար, իրաւունքի եւ անկախութեան շարժումը որեւէ վարչապետ ինչ-որ քաղաքական պատճառներով չի կարող դադարեցնել: Նա նաեւ ասել է, որ Արցախի Ազգային ժողովը շարունակում է աշխատել եւ լաւ կը լինէր, որ Եւրոպական միութիւնը կամ դրա կառոյցները հետեւէին այդ մարմնի գործունէութեանը»:
