Լոս Անջելէսը Ապրիլի 24-ը ճանաչել է Հայոց Ցեղասպանութեան զոհերի յիշատակի օր
«ԱԼԻՔ» – Լոս Անջելէսի շրջանի վերահսկիչ խորհուրդը հաւանութիւն է տւել Ապրիլի 24-ը շրջանում Հայոց Ցեղասպանութեան յիշատակի օր ճանաչելու առաջարկին: Այս մասին ըստ՝ Yereva.today-ի՝ յայտնում է PasadenaNow-ը։
Դիտորդներ Քեթրին Բարգերի եւ Հիլդա Սոլիսի ներկայացրած միջնորդութիւնը թուրքական կառավարութեանը դատապարտում է Հայոց Ցեղասպանութիւնը ժխտելու համար՝ չնայած պատմական ապացոյցներին:
Միջնորդագրում նշւում է նաեւ վերջին տարիներին էթնիկ զտումների ենթադրեալ փորձերը։ 2020 թւականին Ադրբեջանը ռազմական յարձակում սկսեց Արցախի վրայ, որին յաջորդեց Լաչինի միջանցքի 10-ամսեայ շրջափակումը։ 2023 թւականին աւելի քան 100 հազար հայեր բռնի տեղահանւել են իրենց պապենական հողերից։
«Խորհուրդը Դաշնային կառավարութեանը բազմիցս կոչ է արել պատժամիջոցներ սահմանել Ադրբեջանի նկատմամբ մարդու իրաւունքների շարունակական խախտումների համար եւ պահանջել անյապաղ ազատ արձակել Ադրբեջանի կառավարութեան կողմից պահւող հայ պատանդներին»,- ասւած է որոշման մէջ։
2021 թւականի ապրիլի 24-ին նախագահ Ջօ Բայդէնը պաշտօնապէս ճանաչեց Հայոց Ցեղասպանութիւնը։ «Դա պատմական յաղթանակ էր հայկական սփիւռքի համար, որը ձեռք է բերւել տասնամեակների անողոք քարոզչութեան միջոցով»,- ասւած է բանաձեւում։
«Սակայն միայն ճանաչումը բաւարար չէ։ Մենք պէտք է զգօն մնանք հայ ժողովրդին ուղղւած շարունակական սպառնալիքների հանդէպ եւ վերահաստատենք մեր յանձնառութիւնը՝ կանխելու ցեղասպանութիւնը, պաշտպանելու մարդու իրաւունքները եւ երաշխաւորելու, որ պատմութիւնը երբեք չի վերաշարադրւի կամ ջնջւի»։
Խորհուրդը միաժամանակ յանձնարարել է խթանել միջոցառումներն ու ուսումնական նիւթերը՝ Հայոց Ցեղասպանութեան մասին իրազեկւածութեան բարձրացման համար։
