Գլիցերին պարունակող քաղցր ըմպելիքները մինչեւ 8 տարեկան երեխաների թունաւորում են առաջացնում
Մանկաբոյժները զգուշացնում են, որ մինչեւ ութ տարեկան երեխաները չպէտք է խմեն գլիցերին պարունակող քաղցր ըմպելիքներ։ Բժիշկները եզրակացրել են, որ դրանց անվտանգութեան վերաբերեալ հանրային առողջութեան առաջարկները վերանայման կարիք ունեն 21 երեխաների բժշկական գրառումները վերանայելուց յետոյ, որոնք հիւանդացել են սառոյցով ըմպելիքներից մէկը խմելուց անմիջապէս յետոյ: Այս արդիւնքները հրապարակւել են Archives of Disease in Childhood ամսագրում։
Նրանք ցոյց են տւել, որ իւրաքանչիւր դէպքում երեխայի առողջութիւնը վատացել է, առաջացել են մի շարք ախտանիշներ քաղցր ըմպելիքը խմելուց անմիջապէս յետոյ:
Երեխաները հիւանդացել են այն բանի հետեւանքով, ինչ ուսումնասիրութիւնն անւանել է «գլիցերինով թունաւորման համախտանիշ», որն առաջացրել է այնպիսի ախտանիշներ, ինչպիսին են գիտակցութեան մթագնումը եւ արեան մէջ շաքարի ցածր մակարդակը:
Գլիցերինը ալկոհոլի եւ շաքարի բնական փոխարինող է, որն օգնում է քաղցր ըմպելիքներին պահպանել իրենց կառուցւածքը՝ կանխելով հեղուկի պնդացումը: Մեծ Բրիտանիայում չորս տարեկանից փոքր երեխաներին խորհուրդ չի տրւում խմել գլիցերին պարունակող քաղցր ըմպելիքներ:
Դուբլինի համալսարանական կոլէջի փորձագէտների խումբը՝ մանկաբոյժ, պրոֆեսոր Էլէն Քրաշելի գլխաւորութեամբ, կոչ է արել վերանայել առողջապահական ուղեցոյցները:
Բոլոր դէպքերը, բացառութեամբ մէկի, տեղի են ունեցել 2018-2024 թթ., եւ երեխաների տարիքը տատանւել է 2-7 տարեկանի սահմաններում: Շտապ օգնութեան բաժնում բոլորի մօտ ախտորոշւել է հիպոգլիկեմիա կամ արեան մէջ շաքարի ցածր մակարդակ: Փորձագէտների խումբը ենթադրել է, որ գլիցերին պարունակող քաղցր ըմպելիքների օգտագործումը կարող է փոքր երեխաների մօտ առաջացնել գլիցերինով թունաւորման համախտանիշ:
Ախտանիշները ներառել են գիտակցութեան մթագնում, հիպոգլիկեմիա, լակտոացիդոզ, որն առաջանում է, երբ օրգանիզմը չափազանց շատ կաթնաթթու է արտադրում, եւ հիպոկալեմիա կամ կալիումի ցածր մակարդակ:
«Բժիշկները եւ ծնողները պէտք է զգօն լինեն այս երեւոյթի նկատմամբ, եւ հանրային առողջապահութեան մարմինները պէտք է յստակ հրահանգներ տան, որ փոքր երեխաները, յատկապէս մինչեւ ութ տարեկանները, պէտք է խուսափեն գլիցերին պարունակող սառը ըմպելիքներից»:
News.am
