Չինաստանում առաջին անգամ անցկացւել է մարդանման ռոբոտների մենամարտի մրցաշար

Չինաստանի Հանչժոու քաղաքում անցկացւել է մարդանման ռոբոտների բռնցքամարտի աշխարհի առաջին մրցաշարը՝ Unitree Fist King: Awakening, որը կազմակերպել էր Unitree Robotics-ը։ Միջոցառմանը ներկայացւել են մուայ թայ ոճով մենամարտեր մարդանման ռոբոտների միջեւ՝ ցուցադրելով ռոբոտաշինութեան ոլորտում առաջընթացը:

Մինչ ռինգ մտնելը Unitree-ի ինժեներները, ինչպէս գրում է Habr-ը, կատարել են մեքենաների մանրակրկիտ պատրաստում՝ կենտրոնանալով դրանց հաւասարակշռութիւնը եւ կայունութիւնը պահպանելու ունակութեան վրայ։ Իւրաքանչիւր ​​ռոբոտ յագեցած էր LiDAR սենսորներով եւ խորութեան չափման տեսախցիկներով, ինչը նրանց թոյլ էր տալիս կատարել հարւածների բարդ համակցութիւններ:

Մասնակիցները հեռակառավարւում էին ինժեներների չորս թիմերի կողմից: Նրանք օգտագործել են խաղային վահանակներ եւ ձայնային հրամաններ՝ ապահովելով իրական ժամանակի կառավարում:

Մրցոյթի կանոնների համաձայն՝ գրանցւում է  պարտութիւն, եթէ ռոբոտն ընկնելուց յետոյ ութ վայրկեանում չի կարողանում ոտքի կանգնել։ Անկման պատճառը կարող է լինել կամ հաւասարակշռութեան կորուստը կամ հակառակորդի հարւածը:

Unitree Fist King: Awakening միջոցառման հիմնական նպատակն էր ցուցադրել ընկերութեան տեխնոլոգիական հնարաւորութիւնները եւ փորձարկել ինժեներական լուծումները դինամիկ միջավայրում: Ընկերութիւնն արդէն յայտարարել է 2025 թւականի դեկտեմբերին ռոբոտների երկրորդ մարտն անցկացնելու պլանների մասին՝ խոստանալով հաշւի առնել առաջին մրցաշարի դասերը եւ յաջորդ մրցումները դարձնել աւելի դիտարժան ու դինամիկ։

tert.am