Կանաչ թէյով վարսակի թխւածքաբլիթը բջիջները պաշտպանում է վնասումից

Կանաչ թէյով տնական վարսակի թխւածքաբլիթը ոչ միայն համեղ միջանկեալ կերակուր է, այլեւ շատ օգտակար։ Վարսակի թխւածքաբլիթին կանաչ թէյ աւելացնելը զգալիօրէն բարձրացնում է դրա հակաօքսիդանտային յատկութիւնները՝ առանց համը վնասելու։

Ճապոնիայի Ռիւկիւ համալսարանի փորձագէտների մասնակցութեամբ նոր հետազօտութիւնը վերլուծել է կանաչ թեյով վարսակի թխւածքաբլիթի ֆունկցիոնալ եւ զգայական յատկութիւնները՝ սովորական թխւածքաբլիթի համեմատ։ Արդիւնքները հրապարակւել են Progress in Nutrition ամսագրում։

Հետազօտողները վերլուծել են հինգ տարբեր տեսակի թխւածքաբլիթ, այդ թւում՝ 6 տոկոս կանաչ թէյ պարունակող վարսակի թխւածքաբլիթ, ցորենի թխւածքաբլիթ եւ սովորական վարսակի թխւածքաբլիթ։ Թխւածքաբլիթի հակաօքսիդանտային ակտիւութիւնը ստուգւել է DPPH անալիզի միջոցով․ սա մեթոդ է, որը չափում է նիւթերի՝ ազատ ռադիկալները չեզոքացնելու ունակութիւնը։

Թիմը նաեւ օգտագործել է բարձր ճշգրտութեան վերլուծական մեթոդ (LC-MS)՝ կատեխինի եւ EGCG-ի մակարդակները որոշելու համար։ Բացի այդ, խոլեստերինի մակարդակի վրայ դրական ազդեցութիւն ունեցող լուծւող մանրաթել՝ β-գլիւկանի պարունակութիւնը, որոշւել է էքստրակցիայի եւ բնութագրման միջոցով։

Բացի քիմիական վերլուծութիւնից, անցկացւել է նաեւ զգայական գնահատում․ 25 մասնակից 4-բալանոց սանդղակով գնահատել է թխւածքաբլիթի համը, կառուցւածքը եւ ընդհանուր տպաւորութիւնը։

Արդիւնքները ցոյց են տալիս, որ վեց տոկոս կանաչ թէյ պարունակող թխւածքաբլիթն ունեցել է կատեխինի եւ EGCG-ի զգալիօրէն աւելի բարձր մակարդակներ, քան միւս նմուշները։ Այս տարբերակում զգալիօրէն բարձրացւած է եղել նաեւ հակաօքսիդանտային ակտիւութիւնը։

Հետազօտողները բացատրում են, որ վեց տոկոս կանաչ թէյ պարունակող թխւածքաբլիթն ընդհանուր առմամբ ցոյց է տւել ամենաբարձր արժէքները բոլոր փորձարկւած պարամետրերով։

Կանաչ թէյով հարստացւած տարբերակը նաեւ լաւագոյն արդիւնքներն է ցոյց տսել զգայական գնահատման ժամանակ։ Ըստ թիմի, մասնակիցները համը, կառուցւածքը եւ ընդհանուր տպաւորութիւնը հատկապէս հաճելի են համարել։

Ինչպէս ցոյց է տրւել, մանրաթելերով հարուստ վարսակի եւ հակաօքսիդանտներով հարուստ կանաչ թէյի համադրութիւնը կապւած է առողջութեան համար տարբեր օգուտների հետ։ Կանաչ թէյով վարսակի թխւածքաբլիթի օգտագործումը կարող է կարեւոր դեր խաղալ ազատ ռադիկալների կողմից առաջացած բջիջների վնասումից պաշտպանւելու գործում։

news.am