Կալիֆորնիայի նահանգապետը կոչ է արել ամերիկացիներին «արթնանալ» Կոնգրեսի ընտրութիւններից առաջ
«ԱԼԻՔ» – Կալիֆորնիայի նահանգապետ Գեւին Նիւսոմը կտրուկ կոչով դիմել է ամերիկացիներին՝ «Արթնացէ՛ք», մինչ միլիոնաւոր մարդիկ պատրաստւում են երեքշաբթի օրը մի քանի նահանգներում գնալ ընտրատեղամասեր, հաղորդում է News.am-ը:
NBC News-ին տւած հարցազրոյցում Նիւսոմը, կարծես, վստահ էր իր դեմոկրատական կուսակցութեան՝ Վիրջինիայի եւ Նիւ Ջերսիի նման վայրերում ընտրութիւններում յաղթելու ունակութեան վրայ՝ մասամբ նախագահ Դոնալդ Թրամփի վարչակազմի՝ ԱՄՆ քաղաքներում «հարւածային ջոկատներ» մտցնելու սպառնալիքների պատճառով։
«Գրողը տանի, ի՞նչ պէտք է ասենք մարդկանց, որպէսզի նրանք բազմոցից վեր կենան, ասենք. «Դէ սպասէք, միգուցէ ես հաւանեցի նրա պարծենկոտութիւնը, միգուցէ ես չէի սիրում նախորդ տղային, բայց ես դրա տակ չեմ ստորագրել»»,- ասել է Կալիֆորնիայի նահանգապետը։
Նախագահ Դոնալդ Թրամփի՝ յանցաւորութեան եւ անօրինական ներգաղթի դէմ պայքարելու փորձերը շարունակւում են դեմոկրատների վերահսկողութեան տակ գտնւող քաղաքներում եւ նահանգներում, ներառեալ Կալիֆորնիան։
Ազգային գւարդիայի հազարաւոր զինծառայողներ են ուղարկւել քաղաքներ՝ ներգաղթի ծառայութեան աշխատակիցներին օգնելու ձերբակալելու եւ անհատներին կալանաւորելու գործում։ Նիւսոմը, որն աւելի վաղ յայտարարել էր, որ դիտարկում է իր թեկնածութիւնը 2028 թւականին Սպիտակ տուն առաջադրելու հնարաւորութիւնը, Թրամփին մեղադրել է բոլոր այն ինստիտուտների վրայ յարձակւելու մէջ, որոնք կանգնած են նրա ճանապարհին։
Կալիֆորնիայի նահանգապետն այս ամիս միացել է Օրեգոն նահանգի ղեկավարների կողմից ներկայացւած սպասւող հայցին, որում նրանք ԱՄՆ շրջանային դատաւորին խնդրել էին արգելափակել նախագահի ջանքերը՝ Կալիֆորնիական զօրքերը Պորտլենդում տեղակայելու համար։ Կալիֆորնիայի գլխաւոր դատախազն արդէն զգուշացրել է, որ դատի կը տայ Թրամփի վարչակազմին, եթէ նախագահը կատարի իր սպառնալիքները եւ Ազգային գւարդիան ուղարկի Սան Ֆրանցիսկօ։
Բայց Նիւսոմը կիրակի օրն ասել է, որ չի վստահում Թրամփի Արդարադատութեան նախարարութեանը՝ այս գործերը քննելու հարցում։
«Դուք կատակո՞ւմ էք»,- ասել է Նիւսոմը, երբ հաղորդավարուհին հարցրել է, թէ արդեօք նա հաւատում է Արդարադատութեան նախարարութեանը։ «Ես հաւատում եմ ստորին ատեանի դատարաններին եւ յուսով եմ, որ դեռ մնացել է իշխանութեան մէկ հաւասարազօր ճիւղ, եւ դա դատական համակարգն է»։
