ՀՀ ԱԳՆ-ն ամբողջութեամբ ջնջել է պաշտօնական կայքի՝ «ԼՂ հիմնախնդիր» բաժնի բովանդակութիւնը
ՀՀ ԱԳՆ-ն ջնջել է պաշտօնական կայքի՝ «Լեռնային Ղարաբաղի հիմնախնդիր» բաժնի բովանդակութիւնը բոլոր 4 լեզուներով՝ ռուսերէն, անգլերէն, ֆրանսերէն եւ հայերէն։
ՀՀ ԱԳՆ-ի պաշտօնական էջից հեռացւել է նաեւ Արցախի Հանրապետութեան մարդու իրաւունքների պաշտպանի զեկոյցներ բաժինը։
Յիշեցնենք, որ օրեր առաջ Ադրբեջանի նախագահի յատուկ յանձնարարութիւնների գծով ներկայացուցիչ Էլչին Ամիրբեկովը «Ազատութեանն» ասել էր, որ աւելի քան 30 տարի առաջ ընդունւած այս փաստաթղթից բացի Բաքւի համար վիճայարոյց է նաեւ Հայաստանի Արտգործնախարարութեան պաշտօնական կայքը, որտեղ Ղարաբաղեան խնդրին նւիրւած հատւածում ասւում է, թէ Արցախը պատմական Հայաստանի անբաժանելի մասն է։ Ամիրբեկովը որպէս խնդրայարոյց օրինակ նշել է նաեւ Հայաստանի կողմից Մարդու իրաւունքների եւրոպական դատարան ներկայացւած վերջին հայցերը, պնդելով, թէ դրանցում էլ են եղել տարածքային նկրտումներ։
Այս մասին տելեգրամեան իր էջում անդրադարձել է նաեւ քաղաքագէտ Սերգէյ Մելքոնեանը․
«Եթէ սա տեխնիկական խնդիր չլինի, ապա Հայաստանն արդէն տեխնիկապէս եւ պաշտօնապէս համերաշխ է Ադրբեջանի հետ»,- գրել է քաղաքագէտը։
