Էհսան Մովահեդեանը TV5-ին տւած հարցազրոյցում. «Խաղաղութիւնը հնարաւոր չէ առանց ուժի»

«ԱԼԻՔ» – Իրանը յիշեցնում է Հայաստանին, որ առանց ուժի հնարաւոր չէ խաղաղութեան հասնել: «Եթէ ​​Հայաստանը չընդլայնի իր ռազմական համագործակցութիւնը Իրանի հետ, ապա արեւմտեան սպառազինութիւնն ու խոստումները չեն կարող կանխել Հայաստանի դէմ Բաքւի հնարաւոր ռազմական գործողութիւնները»,- Հայաստանի TV5 հեռուստաալիքին տւած հարցազրոյցում ընդգծել է դոկտ. Էհսան Մովահեդեանը:

Կովկասի հարցերով փորձագէտն անդրադաձել է նաեւ վերջերս Հայաստանի պաշտպանութեան նախարարի Թեհրան կատարած այցին, այն համարելով նոր սկիզբ Իրանի եւ Հայաստանի յարաբերութիւններում, եւ յոյս է յայտնել, որ այս այցը կը նպաստի տարածաշրջանում տեւական կայունութիւն հաստատելուն ուղղւած աշխատանքներին։ «Յոյս կայ, որ Հայաստանի կառավարութիւնն աւելի ամուր է սեղմելու բարեկամութեան համար մեկնած Իրանի ձեռքը»,- նշել է նա:

Հարցազրոյցի մէկ այլ բաժնում «Ալամէ Թաբաթաբայի» համալսարանի միջազգային յարաբերութիւնների ամբիոնի դասախօսը նշելով, որ Հայաստանի իշխանութիւնները հասկացել են, որ առանց ուժի, ինչպէս նաեւ ընկերների օգնութեան հնարաւոր չէ հասնել խաղաղութեան, յաւելել է. «Յուսով եմ, որ ձեր կառավարութիւնը փոխել է իր քաղաքականութիւնը Բաքւի նկատմամբ եւ հասկացել է, որ պէտք է վերանայումներ կատարելով (դիւանագիտական առումով) Իրանի հետ խորացնի ռազմական եւ անվտանգային ասպարէզներում համագործակցութիւնը, որը Հայաստանին սահմանակից միակ եղբայրական մօտեցումներով երկիրն է»։

Մովահեդեանի խօսքով՝ Բաքւի կոշտ հռետորաբանութիւնն ու անվստահելի լինելը եւս պատճառներից է, որը ստիպել է Հայաստանին վերանայել իր քաղաքականութիւնը Բաքւի եւ Իրանի նկատմամբ։

Միեւնոյն ժամանակ, նա տրամաբանօրէն անընդունելի է համարում այն պնդումները, որ Բաքւի նկրտումները կանխելու միջոցը՝ արեւմտեան զինատեսակներով Հայաստանի յագեցումն է: «Որքան էլ Հայաստանը յագեցած լինի արեւմտեան զինատեսակներով, քանի Իրանի հետ իր անվտանգային ու ռազմական համագործակցութիւնները չեն ամրացւել ինչպէս հարկն է, այդ զէնքերը չեն կարողանայ կասեցնել Հայաստանի դէմ Բաքւի հնարաւոր ագրեսիան, քանի որ այլ երկրներ, ինչպիսիք են Հնդկաստանը կամ Արեւմուտքը, Երեւանի տրամադրւելիք օգնութիւնները կարող են Հայաստան ուղարկել Իրանի միջոցով»,- յաւելել է նա։

TV5-ի խօսքով՝ պարզ չէ, թէ Պապիկեանը հայ-ադրբեջանական խաղաղութեան գործընթացի մասին ինչ է պատմել իրանցի իր գործընկերոջը: Առհասարակ քիչ բան է պատմում հայկական կողմը հանդիպումների բովանդակութեան մասին: «Արեւմտեան ուժերի ներկայութիւնն Իրանի գլխավերեւում անթոյլատրելի է: Ըստ իրանցի փորձագէտի՝ հիմնականում սա է եղել Իրանի մեսիջը Պապիկեանին»,- ասւած է TV5-ի տեսանիւթում:

Նոյն կապակցութեամբ Էհսան Մովահեդեանը հարցազրոյց է տւել նաեւ թուրքալեզու «Սահար-ազարի» հեռուստաալիքին:

Փորձագէտը հիմնաւորելով այն միտքը, որ Բաքւին այսօրւայ Հայաստանի հետ խաղաղութիւնն աւելի քիչ բան կը տայ, քան իրավիճակը սրելը, նշել է, որ Իլհամ Ալիեւի հետեւած քաղաքականութիւնը «նոր տարածքներ՝ խաղաղութեան դիմաց» բանաձեւն է, որը իւրացրել է իր սիոնիստ տէրերից:

Մովահեդեանն իր այս հարցազրոյցի մասին գրառում հրապարակելով տելեգրամեան իր ալիքում նշել է, որ Բաքուն ծրագրում է աւելի շատ հողեր խլել Հայաստանից՝ գերակայութիւն ձեռք բերելու համար, իսկ յետոյ գնալ խաղաղութեան: «Բաքուն զգում է, որ Հայաստանը թոյլ դիրքերում է եւ հնարաւորութիւն ունի աւելի շատ առաջ գնալ»,- գրել է նա:

Մէկ այլ հարցի պատասխանելով, փորձագէտը յաւելել է, որ Բաքուն պատրաստ չէ հայկական տարածքից Նախիջեւան մուտք գործելու համար ընդունել Երեւանի հսկողութիւնը, իսկ սա Հայաստանի ինքնիշխանութիւնն իր պաշտօնական տարածքների նկատմամբ չճանաչելու կողքին, Հայաստանի տարածքային ամբողջականութիւնը ոտնահարել է նշանակում»:

«Այս բոլոր գործողութիւնների ու միջոցառումների վերջնական նպատակը Հայաստանի հարաւը գրաւելն է, ինչպէս նաեւ Իրանի աշխարհաքաղաքականութիւնը փակուղի մտցնելով Անգլիայի, Իսրայէլի եւ Թուրքիայի դրդմամբ Իրանի քաղաքական հնարաւորութիւնները, տնտեսութիւնն ու անվտանգութիւնը թիրախաւորելն է»,- եզրակացրել է դոկտ. Մովահեդեանը։